ក្នុងអំឡុងពេលកិច្ចប្រជុំដំណាក់កាលទី ២ នៃមហាសន្និបាតភាគីហត្ថលេខីលើកទី ១៥ 《អនុសញ្ញាជីវចម្រុះ》នៃអង្គការសហប្រជាជាតិ（COP15） ភាគីចិនបានរៀបចំកិច្ចប្រជុំភាគីក្រោមប្រធានបទ”ខ្សែបន្ទាត់ក្រហមអភិរក្សអេកូឡូស៊ី”នៅ”ជ្រុងប្រទេសចិន” （CHINA PAVILION）ដើម្បីផ្តល់ផែនការរបស់ភាគីចិនដល់ការអភិរក្សជីវចម្រុះជាសកល ។
បច្ចុប្បន្ននេះ វិធីសាស្ត្រទូទៅនៃការអភិរក្សទីជម្រកលើពិភពលោកគឺបង្កើតតំបន់អភិរក្ស ។ នេះតម្រូវឱ្យមានការគ្រប់គ្រងយ៉ាងតឹងរ៉ឹងនៅតំបន់សំខាន់ៗដែលប្រភេទសត្វខ្លះរស់នៅ ហើយសកម្មភាពគ្រប់បែបយ៉ាងរបស់មនុស្សជាតិត្រូវបានហាមឃាត់នៅក្នុងតំបន់ នេះនឹងប៉ះពាល់ដល់ផលិតកម្មនិងជីវភាពរស់នៅរបស់មនុស្សជាតិ ។ តើគួរធ្វើយ៉ាងម៉េចទើបអាចបំពេញតម្រូវការមូលដ្ឋានរបស់ពលរដ្ឋដោយមិនបង្កការខូចខាតដល់បរិស្ថានអេកូឡូស៊ី វាចាំបាច់ត្រូវការឧបករណ៍ និងមធ្យោបាយផ្នែកគោលនយោបាយ ។
ប្រធាននៃការិយាល័យអភិរក្សអេកូឡូស៊ីធម្មជាតិនៃក្រសួងបរិស្ថានអេកូឡូស៊ីចិនបានថ្លែងថា ក្រោមសភាពការណ៍បែបនេះ ប្រទេសចិនបានស្នើសុំនូវប្រព័ន្ធខ្សែបន្ទាត់ក្រហមនៃការអភិរក្សអេកូឡូស៊ីក្នុងដំណើររុករកអភិរក្សបរិស្ថាន ។
ខ្លឹមសារស្នូលនៃខ្សែបន្ទាត់ក្រហមក្នុងការអភិរក្សអេកូឡូស៊ីគឺ ការពារតំបន់សំខាន់ៗនៃជីវចម្រុះ ខណៈពេលដែលធានាបាននូវការផលិតនិងជីវភាពរស់នៅរបស់ពលរដ្ឋក្នុងតំបន់នោះ ។ មានន័យថា តាមរយៈការអនុវត្តគោលនយោបាយនិងប្រព័ន្ធច្បាប់ ដើម្បីទប់ស្កាត់សកម្មភាពមនុស្សដែលបង្កការខូចខាតយ៉ាងធ្ងន់ធ្ងរដល់បរិស្ថានអេកូឡូស៊ីក្នុងតំបន់ផង និងរក្សាបាននូវផលិតកម្មនិងរបៀបរស់ដើមនៅរបស់ពលរដ្ឋផង ។ ជាមួយគ្នានេះដែរ តាម រយៈការផ្លាស់ប្តូរវិធីសាស្រ្តផលិតកម្ម ដើម្បីសម្រេចបាននូវការផ្លាស់ប្តូរពណ៌បៃតងនិងសម្រេច បាននូវការរួមរស់ជាមួយគ្នាប្រកបដោយសុខដុមរមនារវាងមនុស្សជាតិនិងធម្មជាតិ ។
លោកបានថ្លែងថា ប្រព័ន្ធច្បាប់ខ្សែបន្ទាត់ក្រហមក្នុងការអភិរក្សអេកូឡូស៊ីអាចធ្វើឱ្យមានតុល្យភាពនូវការអភិវឌ្ឍនិងការអភិរក្ស នេះជាឧបករណ៍គ្រប់គ្រងនិងមធ្យោបាយគោលនយោបាយប្រកបដោយប្រសិទ្ធភាពដែលប្រទេសចិនផ្តល់ដល់ពិភពលោក ។ ឥឡូវនេះ ក្នុងបរិយាកាសអន្តរជាតិជាច្រើន សំឡេងអំពាវនាវកាន់តែច្រើនឡើងដែលសង្ឃឹមថា ប្រទេសចិនជំរុញនិងប្រើប្រាស់វិធីសាស្រ្តបច្ចេកទេសនៃការកំណត់បន្ទាត់ក្រហមអេកូឡូស៊ីនៅក្នុងប្រទេសកំពុងអភិវឌ្ឍន៍តាមរយៈការបណ្តុះបណ្តាល ។
“ជ្រុងប្រទេសចិន” ត្រូវបានប្រារព្ធធ្វើនៅថ្ងៃទី ៧ ខែធ្នូតាមម៉ោងក្នុងតំបន់នៅម៉ុងរ៉េអាល់ ប្រទេសកាណាដា ។ “ជ្រុងប្រទេសចិន”បានបើកបង្អួចសម្រាប់ពិភពលោក ស្វែងយល់អំពីការអនុវត្តល្អរបស់ចិនក្នុងការកសាងអរិយធម៌អេកូឡូស៊ីនិងការអភិរក្សជីវចម្រុះ ប្រទេសចិនក៏រីករាយក្នុងការចែករំលែកបទពិសោធន៍របស់ខ្លួនជាមួយប្រទេសនានាដែរ ៕
