អ្នកផ្ទុកមេរោគអេដស៍ ៦៤គ្រួសារ ទទួលបានអំណោយមនុស្សធម៌ពីកាកបាទក្រហមកម្ពុជា និងក្រុមការងារឥស្សរជនឆ្នេីមថ្នាក់ជាតិ នៅថ្នាក់សាខា
ភ្នំពេញ៖ ដើម្បីចូលរួមទិវាពិភពលោកប្រយុទ្ធនឹងជំងឺអេដស៍ ១ ធ្នូ ឆ្នាំ២០២២ ក្រោមប្រធានបទ «ធ្វើឱ្យមានសមភាព» ជាក់ស្តែងនៅថ្ងៃទី ៨ ខែធ្នូ ឆ្នាំ២០២២លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និងជាអនុប្រធានក្រុមការងារឥស្សរជនឆ្នេីមថ្នាក់ជាតិ និងសហការី រួមជាមួយសាខាកាកបាទក្រហមកម្ពុជា ខេត្តកំពង់ឆ្នាំង បានជួបសំណេះសំណាល សួរសុខទុក្ខ និងចែកអំណោយមនុស្សធម៌ ជូនអ្នកផ្ទុកមេរោគអេដស៍ចំនួន ៦៤គ្រួសារ ដែលមកពី២២ភូមិ ក្នុងឃុំចំនួន៨ នៃស្រុកទឹកផុស ខេត្តកំពង់ឆ្នាំង។
ក្នុងឱកាសនោះ លោកជំទាវ ពុំ ចន្ទីនី បានសម្តែងនូវក្តីសោមនស្សរីករាយ និងបានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នេីមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិកឆ្លេីយតបមេរោគអេដស៍ជំងឺអេដស៍ និងការអភិវឌ្ឍនៅកម្ពុជា និងជាឥស្សរជនឆ្នេីមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដេីម្បីសុខភាពស្ត្រីនិងកុមារ ដែលផ្តាំផ្ញេីសួរសុខទុក្ខ និងសារអប់រំសុខភាពស្តីពីអត្ថប្រយោជន៍នៃការមកពិនិត្យផ្ទៃពោះឱ្យបានទៀងទាត់ ការសម្រាលកូននៅមណ្ឌលសុខភាព ការបំបៅកូនដោយទឹកដោះម្តាយ ការចាក់វ៉ាក់សាំងបង្ការដល់កុមារ ការផ្តល់អាហាររូបត្ថម្ភដល់កុមារជាដេីម។
ជាមួយគ្នានេះ លោកជំទាវបានមានប្រសាសន៍ថា« ស្ត្រីជាមាតាទាំងអស់ត្រូវរស់នៅមានអនាម័យ ផឹកទឹកឆ្អិន បរិភោគអាហារមានជីវជាតិគ្រប់គ្រាន់ និងជាពិសេសអ្នកដែលរស់នៅជាមួយរោគអេដស៍សូមកុំបាក់ទឹកចិត្តឱ្យសោះ ខិតខំព្យាបាលតាមការណែនាំរបស់លោកគ្រូពេទ្យ និងបន្តប្រកបរបរចិញ្ចឹមជីវិតដេីម្បីជីវភាពគ្រួសារ»។
ឆ្លៀតក្នុងឱកាសនោះ លោកជំទាវអគ្គលេខាធិការ រួមជាមួយគណៈកម្មាធិការសាខា បានប្រគល់ ថ្នាំពេទ្យ (Amoxicillin) ៥កេស អាវពេទ្យ ចំនួន៥កេស និងអាល់កុលចំនួន ១០០លីត្រ ជូនមណ្ឌលសុខភាពទឹកផុស ដើម្បីយកទៅប្រើប្រាស់តាមតម្រូវការចាំបាច់ផងដែរ។
បន្ថែមពីលើនេះអ្នកផ្ទុកមេរោគអេដស៍ទាំង៦៤គ្រួសារ ដោយគ្រួសារនីមួយៗ ទទួលបានអំណោយមនុស្សធម៌រួមមាន ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកស៊ីអ៉ីវ ១យួរ, ឃីត ១កញ្ចប់ (សារុង មុង ភួយ ក្រមា) សាប៊ូដុសខ្លួន ១ដប ជែលលាងដៃចំនួន១ដប និងថវិកា ២ម៉ឺនរៀល។ ដោយឡែកសាខាកាកបាទក្រហមកម្ពុជា ខេត្តកំពង់ឆ្នាំង ឧបត្ថម្ភបន្ថែមនូវ បន្ទះសូឡា និងអំពូលភ្លើង ចំនួន ១គ្រឿង និងថវិកា ២ម៉ឺនរៀលផងដែរ៕
