អង្គភាពប្រឆាំងអំពើពុករលួយ វាយតម្លៃខ្ពស់ និងកោតសរសើរក្នុងដំណើរការប្រឡងបាក់ឌុប សម័យប្រឡង ០៥ ធ្នូ ២០២២
ភ្នំពេញ៖ អង្គភាពប្រឆាំងអំពើពុករលួយ នៅថ្ងៃទី០៧ ខែធ្នូ ឆ្នាំ២០២២នេះ បានចេញសេចក្តីប្រកាសព័ត៌មាន ស្តីពីការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៥ ធ្នូ ២០២២។
សេចក្ដីប្រកាសព័ត៌មានបានឲ្យដឹងថា ឆ្នាំ២០២២ ជាឆ្នាំទី៨ និងជាលើកទី៩ ដែលអង្គភាពប្រឆាំងអំពើពុករលួយ បានសហការជាមួយនឹងក្រសួងអប់រំ យុវជន និងកីឡា ចូលរួមសង្កេតការណ៍លើដំណើរការ ប្រឡងសញ្ញាបត្រមធ្យមសិក្សាទុតិយភូមិ។
នាសម័យប្រឡង ០៥ ធ្នូ ២០២២នេះ មានថ្នាក់ដឹកនាំ មន្ត្រីអង្គភាពប្រឆាំងអំពើពុករលួយ និងអ្នកសង្កេតការណ៍ស្ម័គ្រចិត្តជាង ៣ ០០០ នាក់ ដោយក្នុងនោះ អង្គភាពប្រឆាំងអំពើពុករលួយ បានរៀបចំមន្ត្រីប្រចាំតាមមណ្ឌលប្រឡង ១នាក់ ក្នុង ១មណ្ឌលប្រឡង និងបានដាក់ពង្រាយអ្នកសង្កេតការណ៍ស្ម័គ្រចិត្ត ដោយអនុវត្ត តាមនិយាម ១នាក់ សង្កត ២បន្ទប់ នៅគ្រប់មណ្ឌលប្រឡងទាំង ២២១ មណ្ឌល ត្រូវជា ៥ ១៧៤ បន្ទប់ ទូទាំងរាជធានី-ខេត្ត ដើម្បីធានាឲ្យបាននូវគោលការណ៍ទាំង៤ នៃការប្រឡង គឺគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។។
