ភ្នំពេញ៖ ករណីគ្រោះថ្នាក់ចរាចរណ៍បង្កដោយរថយន្ត ១គ្រឿងម៉ាក LEXUS GS300 ពាក់ស្លាកលេខភ្នំពេញ 2BM-2573 បើកបរដោយឈ្មោះ សយ ចាន់ភក្តី ភេទប្រុស អាយុ២៦ឆ្នាំ នៅទំពាច ឃុំតាំងក្រូច ស្រុកសំរោងទង ខេត្តកំពង់ស្ពឺ បានចង្កូតបុកបង្កាន់ដៃសុវត្ថិភាពលើកំណាត់ផ្លូវល្បឿនលឿន។
ករណីខាងលើនេះកើតឡើង នៅថ្ងៃទី២២ ខែវិច្ឆិកា ឆ្នាំ២០២២ វេលាម៉ោង១៥និង៣០នាទី លើកំណាត់ផ្លូវល្បឿនលឿន ចន្លោះគីឡូម៉ែត្រ ៥២-៥៣ ត្រង់ចំណុចភូមិត្រពាំងក្រឡឹង ឃុំគីរីវន្ត ស្រុកភ្នំស្រួច ខេត្តកំពង់ស្ពឺ។
សមត្ថកិច្ចបានឲ្យដឹងថា មុនពេលកើតហេតុ រថយន្តខាងលើបើកបរក្នុងទិសដៅពីលិចទៅ ខាងកើត ពេលមកដល់ចំណុចកើតហេតុ បានផ្ទុះកង់ហើយរេចង្កូតទៅបុករនាំងសុវត្ថិភាព (ទ្រូងកណ្តាលនៃផ្លូវ) បណ្ដាលឲ្យខូចខាត សម្ភារៈរនាំងសុវត្ថិភាព៦ផ្ទាំង ប្រងែង២៤ម៉ែត្រ និងខូចរថយន្ដយ៉ាងដំណំផ្នែកខាងមុខ ។
តាមការបញ្ជាក់ពី លោកវរសេនីយ៍ទោ ពៅ នឿន អធិការនគរបាលស្រុកភ្នំស្រួច ទទួលបន្ទុកផ្នែកចរាចរណ៍ ឲ្យដឹងថា គ្រោះថ្នាក់ខាងលើបណ្ដាលមកពីកត្ដាធ្វេសប្រហែស និងបែកកង់ រថយន្តបើកលឿនធ្វើអោយការទប់លំនឹងមិនជាប់បាត់ម្ចាស់ការតែម្ដង ។
បច្ចុប្បន្ន រថយន្តត្រូវបានយកមករក្សាទុកនៅក្រុមហ៊ុនផ្លូវល្បឿនលឿន K26 ស្រុកសំរោងទង ដើម្បីដោះស្រាយសំណងការខូចខាតជូនក្រុមហ៊ុន៕
