នៅព្រឹកស្អែកនេះ សម្តេចតេជោ ហ៊ុន សែន និងមេដឹកនាំអាស៊ាន អញ្ជើញបើកកម្មវិធីប្រជុំកំពូលអាស៊ានជាផ្លូវការ
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន ក៏ដូចជាមេដឹកនាំកំពូល របស់អាស៊ាន នៅព្រឹកថ្ងៃសុក្រ ទី១១ ខែវិច្ឆិកា ឆ្នាំ២០២២ស្អែកនេះ នឹងអញ្ជើញបើកកិច្ចប្រជុំកំពូលអាស៊ានលើកទី៤០ និង៤១ជាផ្លូវការ។ ពិធីដ៏មហោឡារិកនេះនឹងប្រព្រឹត្តទៅ នៅសណ្ឋាគារសុខាភ្នំពេញ។
បន្ទាប់ពិធីកិច្ចប្រជុំកំពូលអាស៊ានជាផ្លូវការសម្តេចតេជោ ហ៊ុន សែន និងមេដឹកនាំកំពូលអាស៊ានដទៃទៀត នឹងអញ្ជើញទស្សនាពិព័រណ៍រូបថតបង្ហាញពីការរួមចំណែករបស់កម្ពុជា.អាស៊ាន ក្រោយពេលក្លាយជាសមាជិកអាស៊ានរយៈពេលប្រមាណ២៣ឆ្នាំ។
បន្ទាប់ពីកម្មវិធីទាំងពីរខាងលើនេះ សម្តេចតេជោ ហ៊ុន សែន ព្រមទាំងប្រមុខដឹកនាំរដ្ឋរាជរដ្ឋាភិបាលសមាជិកអាស៊ាន នឹងអញ្ជើញចាប់ផ្តើមកិច្ចប្រជុំកំពូលលើកទី៤០ និងកិច្ចប្រជុំកំពូល៤១។
នារសៀលថ្ងៃដដែលនោះ សម្តេចតេជោ ហ៊ុន សែន និងមេដឹកនាំអាស៊ាន ព្រមទាំងមេដឹកនាំនៃប្រទេសរបស់អាស៊ាន នឹងចាប់ផ្តើមនូវកិច្ចប្រជុំសំខាន់ៗមួយចំនួនរួមមាន៖ កិច្ចប្រជុំកំពូលអាស៊ាន,ចិន លើកទី២៥,
កិច្ចប្រជុំកំពូលអាស៊ាន,កូរ៉េខាងត្បូង លើកទី២៣ និងកិច្ចប្រជុំកំពូលអាស៊ាន,អង្គការសហប្រជាជាតិលើកទី១២
ក្រៅពីកិច្ចប្រជុំខាងលើទៅ សម្តេចតេជោ ហ៊ុន សែន នឹងអញ្ជើញជួបពិភាក្សាការងារទ្វេភាគីជាបណ្តាមេដឹកនាំប្រទេស និងអង្គការអភិវឌ្ឍន៍ ដែលកំពុងមានវត្តមាននៅក្នុងប្រទេសកម្ពុជា។
សូមបញ្ជាក់ថា កិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធ ដែលរៀបចំឡើងជាលើកទី៣ នៅកម្ពុជាក្នុងនាមជាប្រធានប្តូរវេន នឹងត្រូវរៀបចំឡើងចាប់ពីថ្ងៃទី១០ ដល់ ១៣ ខែវិច្ឆិកា ឆ្នាំ២០២២។
កិច្ចប្រជុំកម្រិតកំពូលដែលនឹងប្រព្រឹត្តទៅក្នុងរយៈពេល ៤ថ្ងៃនេះ រួមមាន៖ កិច្ចប្រជុំកំពូលអាស៊ានលើកទី៤០ និងលើកទី៤១ កិច្ចប្រជុំកំពូលអាស៊ាន,ចិន លើកទី២៥,កិច្ចប្រជុំកំពូលអាស៊ាន,ជប៉ុន លើកទី២៥,កិច្ចប្រជុំកំពូលអាស៊ាន,សាធារណរដ្ឋកូរ៉េ លើកទី២៣,កិច្ចប្រជុំកំពូលអាស៊ានបូកបី លើកទី២៥,កិច្ចប្រជុំកំពូលរំលឹកខួប៣០ឆ្នាំ នៃទំនាក់ទំនងដៃគូសន្ទនាអាស៊ាន,ឥណ្ឌា, កិច្ចប្រជុំកំពូលអាស៊ាន,សហរដ្ឋអាមេរិក លើកទី១០,កិច្ចប្រជុំកំពូលអាស៊ាន,អូស្ត្រាលី លើកទី២, កិច្ចប្រជុំកំពូលរំព្ញកខួប,ទំនាក់ទំនងអាស៊ាន,កាណាដា និង កិច្ចប្រជុំកំពូលអាស៊ាន,អង្គការសហប្រជាជាតិ និងកិច្ចប្រជុំកំពូលអាសុីបូព៌ា [អាស៊ាន១០ ចិន អាមេរិក រុស្សុី ជប៉ុន កូរ៉េខាងត្បូង អូស្ត្រាលី ឥណ្ឌា នូវ៉ែលហ្សេឡង់] លើកទី១៧។
ថ្នាក់ដឹកនាំកំពូលរបស់អាស៊ាន ក៏អញ្ជើញចូលរួមកិច្ចសន្ទនាអាស៊ានជាសាកលលើកទី២ ស្តីពីការស្តារឡើងវិញក្រោយជំងឺកូវីដ-១៩។ កិច្ចប្រជុំនេះ នឹងមានការអញ្ជើញចូលរួមពីប្រធានអង្គការអន្តរជាតិសំខាន់ៗមួយចំនួន ហើយ ថ្នាក់ដឹកនាំដៃគូសន្ទនាអាស៊ានមួយចំនួន ក៏រំពឹងថានឹងចូលរួមក្នុងកិច្ចសន្ទនានេះផងដែរ។
សូមបញ្ជាក់ ឆ្នាំ២០២២នេះ គឺជាលើកទី៣ហើយ ដែលកម្ពុជាក្លាយជាប្រធានប្តូរវេនរបស់អាស៊ាន បន្ទាប់ពីក្លាយជាសមាជិកនៅថ្ងៃទី៣០ ខែមេសា ឆ្នាំ១៩៩៩។ ក្នុងនាមជាប្រធានប្តូរវេននៅឆ្នាំនេះ កម្ពុជាបានកំណត់យកប្រធានបទរួមនៃកិច្ចប្រជុំ (អាស៊ានរួមគ្នាធ្វើ.ដោះស្រាយបញ្ហាប្រឈមទាំងអស់គ្នា)។
កម្ពុជាក្នុងនាមជាប្រធានប្តូរវេននៅឆ្នាំនេះប្រឈមនឹងបញ្ហាធំៗជាច្រើន ដែលមិនធ្លាប់មានក្នុងប្រវត្តិសាស្ត្ររបស់អាស៊ាន។ បញ្ហាទាំងនោះរួមមាន៖ វិបត្តិនយោបាយនៅមីយ៉ាន់ម៉ា សមុទ្រចិនខាងត្បូង ឧបទ្វីបកូរ៉េ និងបញ្ហាសង្គ្រាមនៅអ៊ុយក្រែនជាដើម។
សម្តេចតេជោ ហ៊ុន សែន ធ្លាប់បានបញ្ជាក់នៅពេលទទួលបានញញួរជាប្រធានអាស៊ានថា ក្នុងនាមជាប្រធានអាស៊ានឆ្នាំ២០២២នេះ កម្ពុជានឹងខំដឹកនាំអាស៊ាន ឲ្យឈានទៅសម្រេចបានសមិទ្ធផលសំខាន់ៗ៕
