ការបំផ្ទុះរថយន្តក្រុងសម្លាប់មនុស្សម្នាក់ និងរបួស១០នាក់ទៀតនៅភាគខាងត្បូងប្រទេសហ្វីលីពីន
កូតាបាតូ៖ ក្រុមមន្ត្រីបានអោយដឹងថា គ្រាប់បែកដែលផលិតនៅផ្ទះបានធ្លាក់ក្នុងឡានក្រុង ហើយបានសម្លាប់អ្នកដំណើរម្នាក់ និងរបួស១០នាក់ទៀត នៅក្នុងទីក្រុងភាគខាងត្បូងប្រទេសហ្វីលីពីន កាលពីថ្ងៃអាទិត្យ ក្នុងការវាយប្រហារមួយ ដែលអាជ្ញាធរសង្ស័យថាអាចជាផ្នែកនៃការប៉ុនប៉ងជំរិត។
ប៉ូលីសបានបញ្ជាក់ថា រថយន្តក្រុងដែលមានចំនួនអ្នកដំណើរមិនជាក់លាក់បានទៅជិតស្ថានីយដឹកជញ្ជូនក្នុងទីក្រុង Tacurong ក្នុងខេត្ត Sultan Kudarat នៅពេលដែលគ្រាប់បែកបានធ្លាក់នៅខាងក្រោយរថយន្តនៅមុនថ្ងៃត្រង់។
មន្ត្រីយោធា និងប៉ូលីសបានអោយដឹងថា ក្រុមអ្នកស៊ើបអង្កេតកំពុងព្យាយាមកំណត់ថាតើអ្នកវាយប្រហារមកពីក្រុមប្រដាប់អាវុធដូចគ្នាដែលបានរៀបចំការបំផ្ទុះគ្រាប់បែកស្រដៀងគ្នាកាលពីឆ្នាំមុន ដើម្បីជំរិតយកប្រាក់ពីខ្សែឡានក្រុងលឿង ដែលប្រតិបត្តិការនៅក្នុងទីក្រុងសំខាន់ៗភាគខាងត្បូងឬយ៉ាងណា។
មេបញ្ជាការកងទ័ពភូមិភាគ ឧត្តមសេនីយ Roy Galido បានបញ្ជាក់ថា ក្រុមហ៊ុនរថយន្តក្រុង “បានទទួលសារជំរិតទារឥតឈប់ឈរ”។ Galido បានបន្តថា យោធា និងប៉ូលីសបាននឹងកំពុងធ្វើការជាមួយម្ចាស់រថយន្តក្រុង ដើម្បីចាប់ខ្លួនអ្នកជំរិតទារប្រាក់ ដែលប្រហែលជាមានការខឹងសម្បារចំពោះការបដិសេធរបស់ក្រុមហ៊ុនរថយន្តក្រុងមិនព្រមសង។
ប៉ូលីសបានស្តីបន្ទោសក្រុមអ្នកប្រយុទ្ធសេរីភាពអ៊ីស្លាម Bangsamoro ដែលជាកម្លាំងឧទ្ទាមតូចមួយ ដែលបានចងសម្ព័ន្ធភាពជាមួយក្រុមរដ្ឋឥស្លាមចំពោះការបំផ្ទុះគ្រាប់បែកក្នុងរថយន្តក្រុងស្រដៀងគ្នាកាលពីអតីតកាល។
Galido បានបន្ថែមថា នៅក្នុងការវាយប្រហារដាច់ដោយឡែកមួយ សមាជិកប្រហែល ១៥ នាក់នៃក្រុមប្រយុទ្ធសេរីភាពអ៊ីស្លាម Bangsamoro បានបើកការបាញ់ប្រហារទៅលើទាហានដែលយាមការងារជួសជុលនៅលើស្ពានដែលរងការខូចខាតដោយទឹកជំនន់នៅក្នុងទីក្រុង Datu Hoffer ក្នុងខេត្ត Maguindanao ភាគខាងត្បូងកាលពីយប់ថ្ងៃសុក្រ។ គាត់បានថ្កោលទោសការវាយប្រហារដែលបានសម្លាប់ទាហានម្នាក់ និងរបួសពីរនាក់ទៀត។
លោកបានអោយដឹងថា កងទ័ពកំពុងតាមប្រមាញ់អ្នកវាយប្រហារ។
ក្រុមនេះបានផ្តាច់ខ្លួនកាលពីឆ្នាំមុនពីរណសិរ្សរំដោះអ៊ីស្លាមម៉ូរ៉ូ នៅពេលដែលក្រុមចុងក្រោយនេះបានចូលទៅក្នុងកិច្ចចរចាសន្តិភាពជាមួយរដ្ឋាភិបាល ហើយបានទទួលយកការផ្តល់ជូនស្វ័យភាពរបស់មូស្លីមនៅក្នុងតំបន់ប្រាំខេត្តមួយនៅភាគខាងត្បូងនៃប្រទេសដែលភាគច្រើនជាជនជាតិរ៉ូម៉ាំងកាតូលិក។
