វីដេអូបង្ហាញពីកងកម្លាំងសន្តិសុខអ៊ីរ៉ង់បានវាយដំ និងបាញ់សម្លាប់បុរសម្នាក់ ខណៈដែលមន្ត្រីបញ្ជាការស៊ើបអង្កេត
អ៊ីរ៉ង់÷ប៉ូលិសអ៊ីរ៉ង់បានអោយដឹងថា ពួកគេនឹងស៊ើបអង្កេតឧបទ្ទវហេតុដែលចាប់បាននៅលើកាមេរ៉ាដែលបង្ហាញពីកងកម្លាំងសន្តិសុខបានវាយប្រហារ និងបាញ់សម្លាប់បុរសម្នាក់ ខណៈដែលក្រុមសិទ្ធិមនុស្សឈានមុខគេបានថ្កោលទោសអ្វីដែលគេហៅថា “វិបត្តិនិទណ្ឌភាព” នៅក្នុងប្រទេស។វីដេអូបង្ហាញពីមន្រ្តីសន្តិសុខជាច្រើននាក់បានវាយបុរសម្នាក់ដែលដេកនៅលើដីនៅមុខអគារលំនៅដ្ឋានមួយ មុនពេលដែលមន្រ្តីម្នាក់បានចង្អុលកាំភ្លើងរបស់គាត់ទៅបុរសនោះហើយបាញ់។អ្នកថតវីដេអូបានឮគេនិយាយថា “គេបាញ់បុរសនោះដោយគ្រាប់កាំភ្លើង… គេច្បាស់ជាសម្លាប់បុរសនោះហើយ”។វាមិនច្បាស់ថាមានអ្វីកើតឡើងមុនពេលដែលវីដេអូត្រូវបានគេថតនោះ ឬតើបុរសនោះស្ថិតក្នុងស្ថានភាពអ្វីទេ។ CNN មិនអាចផ្ទៀងផ្ទាត់ដោយឯករាជ្យពីកាលបរិច្ឆេទ ឬទីតាំងនៃវីដេអូដែលបានផ្សព្វផ្សាយយ៉ាងទូលំទូលាយលើបណ្ដាញសង្គម។
ប៉ូលីសបានថ្លែងនៅក្នុងសេចក្តីថ្លែងការណ៍មួយថា “បន្ទាប់ពីការផ្សព្វផ្សាយវីដេអូឃ្លីបបង្ហាញពីការវាយដំលើប្រជាពលរដ្ឋដោយមន្រ្តីប៉ូលីសនឹងចេញបញ្ជាពិសេសមួយដើម្បីស៊ើបអង្កេតពេលវេលានិងទីកន្លែងពិតប្រាកដហើយដើម្បីកំណត់អត្តសញ្ញាណជនល្មើសនៅកន្លែងកើតហេតុ” ។ នេះបើតាមទីភ្នាក់ងារព័ត៌មានរដ្ឋ Fars បានរាយការណ៍កាលពីថ្ងៃអង្គារ។ “ប៉ូលីសមិនយល់ព្រមចំពោះអាកប្បកិរិយាហឹង្សា និងមិនធម្មតាបែបនេះទេ ហើយប្រាកដជានឹងដោះស្រាយជាមួយអ្នកបំពាន”។
អង្គការលើកលែងទោសអន្តរជាតិបានចែករំលែកវីដេអូដូចគ្នានេះ ហើយបាននិយាយកាលពីថ្ងៃអង្គារថា វាគឺជា “ការរំលឹកដ៏គួរឱ្យរន្ធត់មួយទៀតដែលថា ភាពឃោរឃៅរបស់កងកម្លាំងសន្តិសុខអ៊ីរ៉ង់ មិនដឹងពីព្រំដែនទេ”។
Amnesty បានបន្ថែមថា “ចំពេលមានវិបត្តិនៃនិទណ្ឌភាព ពួកគេត្រូវបានផ្តល់សេរីភាពក្នុងការវាយដំ និងបាញ់សម្លាប់អ្នកតវ៉ាយ៉ាងឃោរឃៅ” ហើយបានអំពាវនាវឱ្យក្រុមប្រឹក្សាសិទ្ធិមនុស្សអង្គការសហប្រជាជាតិ “ស៊ើបអង្កេតឧក្រិដ្ឋកម្មទាំងនេះជាបន្ទាន់” ។
នេះមិនមែនជាលើកទីមួយទេ ដែលប៉ូលិសបានអំពាវនាវឱ្យមានការស៊ើបអង្កេតលើវីដេអូនៃកងកម្លាំងសន្តិសុខវាយប្រហារលើជនស៊ីវិល។នៅក្នុងខែតុលា ប៉ូលីសបានអោយដឹងថា ខ្លួននឹង “ចេញបញ្ជាពិសេស” ដើម្បីដោះស្រាយជាមួយមន្រ្តីដែលបានបៀតបៀនរាងកាយនារីម្នាក់នៅតាមដងផ្លូវនៃទីក្រុង Tehran នេះបើយោងតាម ISNA របស់រដ្ឋ។ ឧបទ្ទវហេតុនេះត្រូវបានថតជាប់តាមកាមេរ៉ា ហើយបានបង្ហាញប៉ូលីសម្នាក់បានចាប់នារីម្នាក់ដោយមិនសមរម្យ ខណៈពេលដែលព្យាយាមចាប់ខ្លួននាងជាមួយនឹងក្រុមមន្ត្រីផ្សេងទៀត។
