ឯកឧត្តម សែម សុវណ្ណនី នាំយកអំណោយសម្តេចតេជោចែកជូនពលរដ្ឋចាស់ជរាក្នុងស្រុកបន្ទាយស្រីចំនួនជាង៦០០នាក់

ភ្នំពេញ៖ នៅថ្ងៃទី៣ ខែវិច្ឆិកា ឆ្នាំ២០២២ នៅសាលាស្រុកបន្ទាយស្រី ខេត្តសៀមរាប ឯកឧត្តម សែម សុវណ្ណនី ប្រធានក្រុមការងាររាជរដ្ឋា ភិបាលចុះជួយស្រុកបន្ទាយស្រី និងលោកជំទាវ បាននាំយក អាវរងា អង្ករ ទឹកស៊ីអ៉ីវ ទឹកត្រី និងត្រីខ ដែលជាអំណោយដ៏ថ្លៃថ្លា របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទៅចែកជូនដល់បងប្អូនប្រជាពលរដ្ឋចាស់ជរាចំនួនជាង៦០០នាក់ មកពីឃុំទាំង៦ នៃស្រុកបន្ទាយស្រី ខេត្តសៀមរាប សម្រាប់ប្រើប្រាស់ក្នុងរដូវរំហើយ មកដល់នាពេលខាងមុខនេះ។

ក្នុងពិធីសំណេះសំណាលនិងចែកអំណោយនេះ ឯកឧត្តម សែម សុវណ្ណនី បានថ្លែងថា ក្រោមការដឹកនាំប្រកបដោយគតិបណ្តិត របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ពិសេសសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តាំងពីដើមរៀងមកសម្តេចទាំងទ្វេរ តែងតែយកចិត្តទុកដាក់ជាប់ជាប្រចាំអំពីសុខទុក្ខ និងសុខមាលភាពរបស់ប្រជាពលរដ្ឋគ្រប់ទីកន្លែង ដោយខិតខំស្វែងរកវ៉ាក់សាំងកូវីដ១៩ ចាក់ជូនមន្ត្រីរាជការ និងប្រជាពលរដ្ឋឱ្យបានគ្រប់ៗគ្នាទោះបីនៅទីកន្លែងណាក៏ដោយ។

ជាមួយគ្នា ឯកឧត្តម បានសុំទៅដល់ប្រជាពលរដ្ឋទាំងអស់ ត្រូវទៅចាក់វ៉ាក់សាំងកូវីដ១៩ នូវដូសជម្រុញ អោយបានគ្រប់ៗគ្នា និងត្រូវបន្តចូលរួមធ្វើអនាម័យជាប្រចាំ ដោយអនុវត្តតាមការណែនាំរបស់ក្រសួងសុខាភិបាលឱ្យបានត្រឹមត្រូវ ព្រមទាំងត្រូវអនុវត្តឱ្យបានម៉ឺងម៉ាត់នូវវិធានការបង្ការ ការពារ និងទប់ស្កាត់ការរីករាលដាលនៃជំងឺកូវីដ១៩ កុំឱ្យកើតក្នុងគ្រួសារ និងនៅក្នុងមូលដ្ឋានរបស់ខ្លួន ដើម្បីដំណើរការឡើងវិញនូវវិស័យអប់រំ, ទេសចរណ៍ និងសេដ្ឋកិច្ចជាតិ។

ឯកឧត្តម សែម សុវណ្ណនី បានបញ្ជាក់ថា ក្រុមការងារចុះជួយស្រុកបន្ទាយស្រី នឹងបន្តដាក់ដាក់អំពូលសូឡាបំភ្លឺ ដាំដើមផ្កាសាគូរ៉ា និងដើមក្ងោក នៅតាមដងផ្លូវ នៅទូទាំង៦ឃុំ នៃស្រុកបន្ទាយស្រី ជាការលម្អរសោភណ្ឌភាព ដើម្បីទាក់ទាញភ្ញៀវទេសចរជាតិ និងអន្តរជាតិ ឱ្យចូលមកទស្សនាកម្សាន្ត នៅមូលដ្ឋានស្រុកបន្ទាយស្រី បានច្រើនឡើងថែមទៀត។ ក្នុងឱកាសនោះដែរ ឯកឧត្តម សែម សុវណ្ណនី និងលោកជំទាវ ព្រមទាំងក្រុមការងារ ក៏បាននាំយកអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត ឧបត្ថម្ភសាលាស្រុកបន្ទាយស្រី អង្ក១តោន ថវិកា២លានរៀល និងឃុំទាំង៦ ដោយក្នុង១ឃុំអង្ក១តោន និងថវិកា១លានរៀល សម្រាប់ត្រៀមជួយដល់បងប្អូនប្រជាពលរដ្ឋដែលមានការខ្វះខាតផងដែរ។ ដោយឡែកបងប្អូនប្រជាពលរដ្ឋ លោកតា លោកយាយចូលរួមជាង៦០០ នាក់ ដោយក្នុងម្នាក់ៗ ទទួលបានអង្ករ ទឹកត្រី ទឹកសុីអ៉ីវ ត្រីខ និងអាវរងារ សរុបថវិកាទាំងអស់មានចំនួន ២២,១៩២ ដុល្លាររអាមេរិក ។

បន្ទាប់ពីពិធីសំណេះសំណាល ឯកឧត្តម សែម សុវណ្ណនី និងលោកជំទាវ ព្រមទាំងក្រុមការងារ បានអញ្ជើញចុះពិនិត្យផ្ទះសាងសង់រួច និងកំពង់ដំណើរការសាងសង់ថ្មី ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌឹត ប៊ុន រ៉ានី ហ៊ុន សែន ជូនដល់បងប្អូនប្រជាពលរដ្ឋក្រលំបាក រស់នៅក្នុងភូមិរវាងកាទុំ ឃុំរំចេក ស្រុកបន្ទាយស្រី ខេត្តសៀមរាប ផងដែរ៕