ឯកឧត្តម ហ៊ុន ម៉ានី អញ្ជើញបើកវេទិកាយុវជន អាស៊ាន-ចិន ស្តីពី ការងារស្ម័គ្រចិត្ត ប្រព្រឹត្តទៅតាមប្រព័ន្ធនិម្មិត

ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានក្រុមប្រឹក្សាយុវជនអាស៊ី (Asian Youth Council — AYC) បានអញ្ជើញជាអធិបតីបើកវេទិកាយុវជន អាស៊ាន-ចិន ស្តីពី ការងារស្ម័គ្រចិត្ត ដែលប្រព្រឹត្តទៅតាមប្រព័ន្ធនិម្មិត នាព្រឹកថ្ងៃទី០៣ ខែវិច្ឆិកា ឆ្នាំ២០២២ ដោយមានការចូលរួមពីសំណាក់គណៈប្រតិភូយុវជនមកពីបណ្តាប្រទេសអាស៊ាន និងចិន សរុបប្រមាណ ២០០ នាក់។

ប្រធានបទសម្រាប់ឆ្នាំនេះ គឺ “លើកកម្ពស់ការអភិវឌ្ឍប្រកបដោយចីរភាពតាមរយៈការងារស្ម័គ្រចិត្ត កសាងភាពជាដៃគូដើម្បីការអភិវឌ្ឍយុវជន” ដែលជាការឆ្លុះបញ្ចាំងនៃទំនាក់ទំនងរវាងយុវជន និងការងារស្ម័គ្រចិត្តក្នុងការសម្រេចបានការអភិវឌ្ឍប្រកបដោយចីរភាព។

លោកជំទាវ Wang Hongyan ប្រធានសហព័ន្ធយុវជនទូទាំងប្រទេសចិន បានរំលេចនូវទំនាក់ទំនងដ៏ល្អរវាងអាស៊ាន និងចិន ដែលបានកសាងភាពជាដៃគូអភិវឌ្ឍអស់រយៈពេល ៣១ ឆ្នាំកន្លងមក ហើយដែលបានឈានមួយជំហានទៅកាន់ភាពជាដៃគូយុទ្ធសាស្រ្តគ្រប់ជ្រុងជ្រោយ។

ដោយឡែក ឯកឧត្តម ហ៊ុន ម៉ានី ក្នុងនាមក្រុមប្រឹក្សាយុវជនអាស៊ី បានឆ្លៀតឱកាសនោះ ធ្វើការថ្លែងអំណរគុណដល់បណ្តាអង្គការយុវជនទាំងក្នុងតំបន់អាស៊ាន ទ្វីបអាស៊ី ក៏ដូចជាសកលលោកទាំងមូល ដែលបានរួមចំណែកយ៉ាងសកម្មក្នុងអំឡុងផ្ទុះការឆ្លងរាលដាលនៃជំងឺកូវីដ-១៩ កាលពីពេលកន្លងទៅ។ បទពិសោធន៍ជាក់ស្តែងនេះ គឺជាមូលដ្ឋានដ៏មានសារៈសំខាន់សម្រាប់ការពិភាក្សាលើប្រធានបទរបស់វេទិកានេះផងដែរ។

សូមបញ្ជាក់ផងដែរថា ឯកឧត្តម ហ៊ុន ម៉ានី ត្រូវបានជាប់ឆ្នោតជ្រើសតាំងជាប្រធានក្រុមប្រឹក្សាយុវជនអាស៊ី កាលពីថ្ងៃទី ២៥ ខែកុម្ភៈ ឆ្នាំ២០១៦។ ក្រុមប្រឹក្សាយុវជនអាស៊ីជាអង្គការយុវជនថ្នាក់តំបន់ ដែលប្រមូលផ្តុំស្ថាប័នយុវជនប្រមាណ ២០ ប្រទេស ទូទាំងទ្វីបអាស៊ី ក៏ជាស្ថាប័នប្រឹក្សាយោបល់នៃក្រុមប្រឹក្សាសេដ្ឋកិច្ច សង្គម នៃអង្គការសហប្រជាជាតិផងដែរ៕