ឯកឧត្តម ស៊ុយ សែម អញ្ជើញសម្ពោធដាក់ឲ្យប្រើប្រាស់ជាផ្លូវការ នូវអគាររដ្ឋបាលថ្មី និងសមិទ្ធផលនានា របស់មន្ទីររ៉ែខេត្តប៉ៃលិន
ភ្នំពេញ៖ ឯកឧត្តម ស៊ុយ សែម រដ្ឋមន្ត្រីនៃក្រសួងរ៉ែនិងថាមពល និងលោកជំទាវ បាន ស្រីមុំ អភិបាលខេត្តប៉ៃលិន នាថ្ងៃទី២៦ តុលានេះ បានអញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគាររដ្ឋបាលថ្មី និងសមិទ្ធផលនានារបស់មន្ទីររ៉ែនិងថាមពលខេត្តប៉ៃលិន ដោយមានការអញ្ជើញចូលរួមពីសំណាក់ ឯកឧត្តម លោកជំទាវប្រតិភូអមដំណើរ សមាជិកក្រុមប្រឹក្សាខេត្ត អភិបាលរងខេត្ត និងអភិបាលក្រុង-ស្រុក។
អគាររដ្ឋបាលថ្មីនេះត្រូវបានសាងសង់ឡើងអស់រយៈពេល ៥ខែ ១៩ថ្ងៃ គឺមានទំហំ ២០ម៉ែត្រx១០ម៉ែត្រ មានកម្ពស់ ២ជាន់ ដែលក្នុងនោះ ជាន់ក្រោមមានចំនួន ៧បន្ទប់ មានបន្ទប់ទឹកចំនួន០២ នៅជាន់លើមានចំនួន ០៣បន្ទប់ (សាលប្រជុំចំនួន ០១) និងបន្ទប់ទឹកចំនួន ០២ និងបានបំពាក់ម៉ាស៊ីនត្រជាក់ និងសង្ហារឹមសម្រាប់បំពេញការងាររួចរាល់។
ថ្លែងក្នុងពិធីនេះផងដែរ ឯកឧត្តមរដ្ឋមន្ត្រី ស៊ុយ សែម ក៏បានមានប្រសាសន៍កោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្រ្តីរាជការនៃមន្ទីររ៉ែនិងថាមពលខេត្តប៉ៃលិនទាំងអស់ ដែលបានខិតខំប្រឹងប្រែងយកចិត្តទុកដាក់ ធ្វើការងារអស់កម្លាំងកាយចិត្ត និងបានអនុវត្តទៅតាមគោលការណ៍ បែបបទរបស់ក្រសួង ដែលបានដាក់ជូនបានយ៉ាងល្អប្រសើរ ហើយជាមួយនឹងការទទួលបាននូវសមិទ្ធិផលថ្មីៗ ដែលរាជដ្ឋាភិបាលបានផ្តល់នូវអគាររដ្ឋបាលថ្មីនេះ គឺត្រូវយកចិត្តទុកដាក់ថែរក្សា ដើម្បីប្រើប្រាស់បានយូរអង្វែង ៕
