អគ្គនាយករង ប.ស.ស ដឹកនាំមន្ត្រីបច្ចេកទេសចូលរួមកិច្ចប្រជុំស្ដីពី ការពិនិត្យឡើងវិញលើការសិក្សា និងការវាយតម្លៃរបបធានារ៉ាប់រងសុខភាពនៃ ប.ស.ស. និងវឌ្ឍនភាពនៃកិច្ចសហប្រតិបត្តិការរវាងអង្គការ ILO និង ប.ស.ស.
ភ្នំពេញ៖ ឯកឧត្ដមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងដ៏ខ្ពង់ខ្ពស់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នាថ្ងៃទី៦ ខែតុលា ឆ្នាំ២០២២ បានដឹកនាំមន្ត្រីបច្ចេកទេសចូលរួមកិច្ចប្រជុំស្ដីពី ការពិនិត្យឡើងវិញលើការសិក្សា និងការវាយតម្លៃរបបធានារ៉ាប់រងសុខភាព នៃ ប.ស.ស. និងវឌ្ឍនភាពនៃកិច្ចសហប្រតិបត្តិការរវាងអង្គការអន្តរជាតិខាងការងារ (ILO) និង ប.ស.ស.។
ឯកឧត្ដមបណ្ឌិត ហេង សុផាន់ណារិទ្ធ បានលើកថា កិច្ចប្រជុំនាព្រឹកនេះពិតជាមានសារៈសំខាន់ណាស់ក្នុងការប្រមូលធាតុចូល បន្ថែមពីនាយកដ្ឋានដែលពាក់ព័ន្ធ ទៅលើសេវាថែទាំសុខភាព ដើម្បីបញ្ចប់របាយការណ៍វាយតម្លៃរបបធានារ៉ាប់រងសុខភាពនៃ ប.ស.ស. ព្រមទាំងពិនិត្យលើវឌ្ឍនភាពនៃកិច្ចសហប្រតិបត្តិការរវាងអង្គការអន្តរជាតិខាងការងារ (ILO) និង ប.ស.ស.។
ក្នុងឱកាសជាមួយគ្នានេះ ឯកឧត្ដមបណ្ឌិត បានថ្លែងអំណរគុណ ចំពោះអង្គការ ILO អង្គការ WHO អង្គភាពM4H និងក្រុមការងារARST ដែលបានផ្ដល់ការគាំទ្រលើ ការសិក្សា និងវាយតម្លៃរបបធានារ៉ាប់រងសុខភាព នៃ ប.ស.ស. កន្លងមក។
សូមបញ្ជាក់ថា៖ កិច្ចប្រជុំ ខាងលើ ពិភាក្សាលើ របៀបវារៈ ចំនួន៥ចំណុច ដែលរួមមាន៖ (១) គម្រោងអភិវឌ្ឍន៍ប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) ថ្មី នៃគម្រោងទំនើបភាវូបនីយកម្មរបស់ ប.ស.ស. (២) វគ្គបណ្តុះបណ្តាលស្តីពីស្ថិតិ (៣) យុទ្ធសាស្រ្តផ្សព្វផ្សាយរបស់ ប.ស.ស. (៤) យន្តការនៃការជំរុញសហគ្រាសឲ្យចូលទៅក្នុងប្រព័ន្ធ និង (៥) ការងារផ្សេងៗ ដែលបានប្រព្រឹត្តទៅនៅសាលប្រជុំធំនៃ ប.ស.ស. រាជធានីភ្នំពេញ ដោយមានវត្តមានអញ្ជើញចូលរួមមកពីនាយកដ្ឋានពាក់ព័ន្ធនៃ ប.ស.ស. អង្គការអន្តរជាតិខាងការងារ (ILO) និងអង្គភាព M4H៕
