ភ្នំពេញ៖ ឯកឧត្តមបណ្ឌិត ម៉ុក ម៉ារ៉េត តំណាងរាស្រ្តមណ្ឌលខេត្តតាកែវ រួមជាមួយឯកឧត្តម ទេស សុខម៉េង ឯកឧត្តម ហាវ ប៊ុនសែ ឯកឧត្តម ហង់ បូ និងឯកឧត្តម អ៊ុ អួក នាថ្ងៃទី៥ ខែតុលា ឆ្នាំ២០២២ បានអញ្ជើញចុះពិនិត្យការដ្ឋានជួសជុលផ្លូវក្រាលដីគ្រួសស នៅភូមិដកពរ ឃុំបឹងត្រាញ់ខាងត្បូង ស្រុកសំរោង ប្រវែង៣០០០ម៉ែត្រ និងចុះពិនិត្យផ្លូវក្រាលគ្រួសក្រហម១ខ្សែទៀតតភ្ជាប់ពីផ្លូវជាតិលេខ២ ទៅភូមិមហារាជ ដែលរងការខូចខាតដោយអន្លើ និងកាយដាក់លូកាត់ថ្នល់ ២កន្លែង ដោយប្រើត្រាក់ទរ័ឈូសពង្រីកផ្លូវចូលភូមិមហារាជ ស្ថិតនៅក្នុងឃុំលំចង់ ស្រុកសំរោង ខេត្តតាកែវ។
ក្នុងឱកាសនោះដែរ ឯកឧត្តមបណ្ឌិត ម៉ុក ម៉ារ៉េត បានចូលរួមឧបត្ថម្ភថវិកាចំនួន ២លានរៀល និងក្រុមការងារបានឧបត្ថម្ភថវិកា ១លានរៀល សម្រាប់ជួសជុលផ្លូវក្រាលដីគ្រួសស នៅភូមិដកពរ នោះផងដែរ។
តមកនៅរសៀលថ្ងៃដដែល ឯកឧត្តមបណ្ឌិត ម៉ុក ម៉ារ៉េត និងក្រុមការងារ បានអញ្ជើញចុះជួបសំណេះសំណាល និងចែកអំណោយដល់បងប្អូនប្រជាពលរដ្ឋដែលមានជីវភាពខ្វះខាតចំនួន៤៤គ្រួសារ នៅក្នុងទីអារាមវត្តធម្មនិមិត្តអង្គប្រិយ៍ ស្ថិតក្នុងឃុំលំចង់ ស្រុកសំរោង ខេត្តតាកែវ។
សូមបញ្ជាក់ផងដែរថា អំណោយដែលបានផ្ដល់ជូនក្នុង១គ្រួសារៗទទួលបាន អង្ករ៣០គីឡូក្រាម ទឹកត្រី១យួរ សារុង១ ក្រមា១ និងថវិកា៣ម៉ឺនរៀល ដែលជាអំណោយមនុស្សធម៌របស់ព្រះចៅអធិការវត្តធម្មនិមិត្តអង្គប្រិយ៍លើកទី៧៣ដែលព្រះគ្រូចៅអធិការបានចែកជូនប្រជាពលរដ្ឋខ្វះខាតខ្លាំងក្នុងឃុំលំចង់ ស្រុកសំរោង និងជូនលោកមេឃុំលំចង់នូវអង្ករ១២បាវ ទឹកត្រី១២យួរ មី១២កេះ ថវិកា៤០ម៉ឺន៥ពាន់រៀលសម្រាប់ទុកចែកបន្តជូនបងប្អូនខ្វះខាតក្នុងឃុំ និងក្រុមប្រជាការពារក្នុងម្នាក់ៗ ទទួលបានថវិកា៣ម៉ឺនរៀលផងដែរ ៕
