សិក្ខាសាលាផ្សព្វផ្សាយ “របាយការណ៍ពិនិត្យឡើងវិញ ពាក់កណ្តាលអាណត្តិឆ្នាំ២០២១ នៃការអនុវត្តផែនការយុទ្ធសាស្ត្រវិស័យអប់រំ ២០១៩-២០២៣”

ភ្នំពេញ៖ នាយកដ្ឋានផែនការ ក្រសួងអប់រំ យុវជន និងកីឡា នាថ្ងៃទី១២ កញ្ញា បានរៀបចំសិក្ខាសាលាផ្សព្វផ្សាយ “របាយការណ៍ពិនិត្យឡើងវិញពាក់កណ្ដាលអាណត្តិឆ្នាំ២០២១ នៃការអនុវត្តផែនការយុទ្ធសាស្ត្រវិស័យអប់រំ ២០១៩-២០២៣” ក្រោមអធិបតីភាព ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងមានការអញ្ជើញចូលរួមពីគ្រប់ថ្នាក់ដឹកនាំក្រសួងអប់រំ មន្ត្រីជំនាញ និងតំណាងដៃគូអភិវឌ្ឍន៍ក្នុងវិស័យអប់រំ សរុបចំនួន ១២៩រូប ស្រី ២០រូប។

ថ្លែងក្នុងពិធីបើកសិក្ខាសាលា ឯកឧត្ដមរដ្ឋមន្ត្រី បានលើកឡើងអំពីសមិទ្ធផលអប់រំសំខាន់ៗ ដែលសម្រេចបាននាពេលកន្លងមក ទោះបីជាការរីករាលដាលនៃជំងឺកូវីដ-១៩ រយៈពេលជាង២ឆ្នាំចុងក្រោយនេះ បានធ្វើឱ្យមានផលប៉ះពាល់មកលើវិស័យអប់រំទាំងមូល ក៏ក្រសួងអប់រំ បានប្រែក្លាយវិបត្តិកូវីដ-១៩ ទៅជាឱកាសសម្រាប់ធ្វើកំណែទម្រង់ដូចជា៖ ការអប់រំឌីជីថល កំណែទម្រង់សាលារៀន កំណែទម្រង់អប់រំតាមគន្លងប្រក្រតីភាពថ្មី កំណែលម្អវិធីសាស្ត្របង្រៀន និងការអភិវឌ្ឍសមត្ថភាពឌីជីថលដល់គ្រូបង្រៀន ។

ការពិនិត្យឡើងវិញពាក់កណ្ដាលអាណត្តិ ក្រសួងបានកំណត់អាទិភាពចំនួន៨ រួមមាន៖

១.សាលារៀនបើក ដំណើរការ និងធានានូវការស្តារឡើងវិញនៃការសិក្សា និងការបន្តការសិក្សារបស់សិស្ស
២.កំណែទម្រង់សាលារៀនដែលផ្ដោតលើ គណនេយ្យភាព ស្វ័យភាព ការវាយតម្លៃ និងការចូលរួម
៣.គ្រូបង្រៀនមានគុណភាពខ្ពស់
៤.ការអប់រំឌីជីថល
៥.ការអប់រំវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា
៦.អភិវឌ្ឍជំនាញសតវត្សរ៍ទី២១ សម្រាប់យុវជន
៧.បង្កើតមជ្ឈមណ្ឌលឧត្ដមភាពក្នុងការអប់រំឧត្ដមសិក្សា
៨.ពង្រឹងសមត្ថភាពស្ថាប័ន និងការកសាងប្រព័ន្ធ

ក្រសួងនឹងបន្តបង្កើនថវិកាចរន្តជាតិសម្រាប់ការអប់រំពី ១៨ ទៅ២០ភាគរយ ព្រមទាំងធានាថា ការវិភាជន៍ និងការចំណាយថវិកាអប់រំឱ្យកាន់តែមានប្រសិទ្ធភាព និងចំទិសដៅស្របតាមការអនុវត្តថវិកាសមិទ្ធកម្មដំណាក់កាលទី៤។

ឯកឧត្ដមរដ្ឋមន្ត្រី បានថ្លែងអំណរគុណ និងសូមកោតសរសើរដល់គ្រប់ភាគីពាក់ព័ន្ធទាំងអស់ដែលបានចូលរួមគាំទ្រ និងសហការគ្នាល្អក្នុងការអនុវត្តផែនការយុទ្ធសាស្ត្រវិស័យអប់រំ និងបានចូលរួមយ៉ាងសកម្មក្នុងដំណើរការពិនិត្យឡើងវិញពាក់កណ្ដាលអាណត្តិ៕