អភិបាលខេត្តកំពង់ស្ពឺ៖ គោលនយោបាយ «ភូមិ ឃុំ សង្កាត់ មានសុវត្ថិភាព» មានគោលបំណងធ្វើឱ្យប្រជាពលរដ្ឋរស់នៅដោយសុខសាន្ត គ្មានភាពភ័យខ្លាច និងមានសន្តិសុខល្អនៅមូលដ្ឋាន

កំពង់ស្ពឺ៖ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ បានលើកឡើងថា គោលនយោបាយ «ភូមិ ឃុំ សង្កាត់ មានសុវត្ថិភាព» គឺជាគោលនយោបាយដ៏សំខាន់របស់រាជរដ្ឋាភិបាល មានគោលបំណងធ្វើឱ្យប្រជាពលរដ្ឋរស់នៅដោយសុខសាន្ត គ្មានភាពភ័យខ្លាច និងមានសន្តិសុខល្អនៅមូលដ្ឋាន។ គោលនយោបាយនេះ ផ្តោតលើការទប់ស្កាត់បទល្មើស ការពង្រឹងសេវាសាធារណៈ និងការកែលម្អសណ្តាប់ធ្នាប់សង្គម។

ក្នុងឱកាសជួបសំណេះសំណាលជាមួយនាយនគរបាល និងនាយនគរបាលរងវគ្គបណ្តុះបណ្តាលកម្រិតវិជ្ជាជីវៈនគរបាលជំនាន់ទី២០ លើកទី១ នៃសាលានគរបាលភូមិភាគ៣ នាថ្ងៃទី៩ ខែមេសា ឆ្នាំ២០២៦ ឯកឧត្តមបណ្ឌិត ជាម ច័ន្ទសោភ័ណ បានចែករំលែកនូវបទពិសោធន៍ថា ការអនុវត្តគោលនយោបាយនេះឱ្យមានប្រសិទ្ធភាព គឺត្រូវការការសហការល្អរវាងអាជ្ញាធរមូលដ្ឋាន កម្លាំងនគរបាល និងប្រជាពលរដ្ឋ។ កម្លាំងនគរបាលត្រូវមានតួនាទីសំខាន់ក្នុងការការពារ បង្ការ និងបង្ក្រាបបទល្មើសគ្រប់ប្រភេទ ដូចជា អំពើចោរកម្ម គ្រឿងញៀន អំពើហិង្សា និងបញ្ហាសង្គមផ្សេងៗ ដែលអាចបង្កភាពអសន្តិសុខនៅក្នុងសហគមន៍។

ឯកឧត្តមបណ្ឌិតបន្ដថា បទពិសោធន៍ជាក់ស្តែងបង្ហាញថា កន្លែងណាដែលអាជ្ញាធរ និងប្រជាពលរដ្ឋមានការសហការល្អ កន្លែងនោះមានសុវត្ថិភាពល្អ និងអភិវឌ្ឍន៍បានលឿន។ ដូច្នេះ ការចូលរួមពីប្រជាពលរដ្ឋ គឺជាចំណុចស្នូលក្នុងការអនុវត្តគោលនយោបាយនេះឱ្យទទួលបានជោគជ័យ។

ក្នុងឱកាសនោះផងដែរ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺក៏បានផ្តល់អនុសាសន៍ដល់សិស្សនគរបាលទាំងអស់ ដែលជាអ្នកអនុវត្តច្បាប់នាពេលអនាគត ត្រូវគោរពនិងអនុវត្តច្បាប់ដោយយុត្តិធម៌ មិនលំអៀង និងគោរពសិទ្ធិមនុស្ស។ ត្រូវបំពេញភារកិច្ចដោយស្មោះត្រង់ មានវិន័យ និងទទួលខុសត្រូវខ្ពស់ ត្រូវបង្កើនភាពភាពជិតស្និទ្ធជាមួយប្រជាពលរដ្ឋ ស្តាប់មតិ និងដោះស្រាយបញ្ហាជូនពួកគាត់ទាន់ពេលវេលា។ជាងនេះត្រូវអភិវឌ្ឍសមត្ថភាពជំនាញជាបន្តបន្ទាប់ ដើម្បីឆ្លើយតបទៅនឹងបញ្ហាប្រឈមថ្មីៗក្នុងសង្គម។ត្រូវចូលរួមយ៉ាងសកម្មក្នុងការផ្សព្វផ្សាយច្បាប់ និងការពារការកើតមានបទល្មើសជាមុន។ក្នុងនាមជាប្រតិបត្តិករក្នុងការអនុវត្តច្បាប់ ត្រូវមានស្មារតីជាអ្នកបម្រើប្រជាពលរដ្ឋ និងជាអ្នកថែរក្សាសន្តិសុខសង្គម ដើម្បីចូលរួមអនុវត្តគោលនយោបាយ «ភូមិ ឃុំ មានសុវត្ថិភាព» ឱ្យទទួលបានលទ្ធផលល្អប្រសើរ និងធ្វើឱ្យសង្គមមានភាពសុខសាន្តយូរអង្វែង៕