ឧត្តមសេនីយ៍ឯក លឹម តុងហួត ៖ ទំនើបកម្មឌីជីថល App NoDrug ជួយដោះស្រាយបញ្ហាគ្រឿងញៀនបានជាង ៧.០០០ ករណី ត្រឹមរយៈពេលខ្លី

ភ្នំពេញ៖ អាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ) បាននាំយកនូវសមិទ្ធផលបច្ចេកវិទ្យាចំនួន ២ សំខាន់ៗ គឺ App NoDrug និង ថ្នាលឌីជីថលប្រមូលទិន្នន័យអ្នកញៀនគ្រឿងញៀន ទៅដាក់បង្ហាញក្នុងទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកទី៤ នៅមជ្ឈមណ្ឌលកោះពេជ្រ ដើម្បីឆ្លុះបញ្ចាំងពីវឌ្ឍនភាពនៃ “នវានុវត្តន៍ដើម្បីវឌ្ឍនភាពជាតិ”។
ក្នុងសកម្មភាពដឹកនាំក្រុមការងារនាថ្ងៃទី២៦ ខែមីនា ឆ្នាំ២០២៦ នេះ ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ បានបញ្ជាក់ថា នេះជាជំហានដ៏សំខាន់ក្នុងការអនុវត្តតាមយុទ្ធសាស្ត្របច្ចេកវិទ្យារបស់រាជរដ្ឋាភិបាល ដើម្បីបង្កើនប្រសិទ្ធភាព និងតម្លាភាពក្នុងកិច្ចប្រតិបត្តិការបង្ក្រាប និងអប់រំ។
ឯកឧត្តមបន្តថា ក្នុងរយៈពេលខ្លីនេះ មានអ្នកទាញយកប្រើប្រាស់ (Download) កម្មវិធីApp NoDrugនេះ ជាង ៨ ម៉ឺននាក់ , ទទួលបានសេចក្តីរាយការណ៍ពីប្រជាពលរដ្ឋសរុបជាង ៨.០០០ ករណី និងសមត្ថកិច្ចបានអន្តរាគមន៍ និងដោះស្រាយបានជោគជ័យជាង ៧.០០០ ករណី។
សមិទ្ធផលនេះមិនត្រឹមតែបង្ហាញពីភាពជោគជ័យនៃយុទ្ធនាការឌីជីថលប៉ុណ្ណោះទេ ប៉ុន្តែថែមទាំងបង្ហាញពីការចូលរួមយ៉ាងសកម្មរបស់មហាជន ក្នុងការសហការជាមួយអាជ្ញាធរដើម្បីភាពស្អាតស្អំក្នុងសហគមន៍។
ក្នុងនាម ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ក្នុងឱកាសនោះដែរ ឧត្តមសេនីយ៍ឯក លឹម តុងហួត ពាំនាំប្រសាសន៍ផ្តាំផ្ញើពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ឋប្រឆាំងគ្រឿងញៀន អរគុណដល់មហាជនទាំងអស់ដែលបានទាញយកនិងប្រើប្រាស់App NoDrug របស់អាជ្ញាធរជាតិប្រយុទ្ឋប្រឆាំងគ្រឿងញៀន ៕