ក្រសួងអប់រំ និងទីភ្នាក់ងារ JICA ដាក់ប្រើប្រាស់កម្មវិធី Think!Think នៅសាលាបឋមសិក្សាវត្តបូព៌

ភ្នំពេញ៖ ក្រសួងអប់រំ យុវជន និងកីឡា និងទីភ្នាក់ងារសហប្រតិបត្តិការអន្តរជាតិជប៉ុន (JICA) បានដាក់ឲ្យប្រើប្រាស់កម្មវិធី Think!Think របស់ប្រទេសជប៉ុន នៅសាលាបឋមសិក្សាវត្តបូព៌ ដែលសាលានេះគឺជាសាលាគោលដៅមួយ ក្នុងចំណោមសាលាគោលដៅចំនួន៩ ក្នុង៦ខេត្ត ហើយកម្មវិធីកំពុងដំណើរការក្នុងភាពជាដៃគូសាធារណៈ ឯកជនជាមួយទីភ្នាក់ងារ JICA និង ក្រុមហ៊ុន WonderLab Co.,Ltd.។

លោកស្រី Shiori Tokugawa ជាអ្នកគ្រប់គ្រងផ្នែកវិស័យអប់រំ របស់ទីភ្នាក់ងារ JICA បាននិយាយថា Think!Think! គឺជាកម្មវិធី STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា)ឈានមុខគេពីប្រទេសជប៉ុន ដែលបានទទួលពានរង្វាន់ផ្នែកបច្ចេកវិទ្យាអប់រំ (Edtech) ល្អបំផុតរបស់ប្រទេសជប៉ុន និងពានរង្វាន់ Google លើកម្មវិធីល្អបំផុតសម្រាប់កុមារ។ លោកស្រី មានក្តីសប្បាយរីករាយក្នុងការបានដាក់ឲ្យប្រើប្រាស់កម្មវិធីនេះនៅសាលាបឋមសិក្សាវត្តបូព៌ ព្រមទាំងសង្ឃឹមថាកម្មវិធីនេះអាចជួយសិស្សឱ្យទទួលបានការអប់រំកាន់តែប្រសើរឡើង។

ប្រធាននាយកដ្ឋានបច្ចេកវិទ្យាព័ត៌មាន ក្រសួងអប់រំ យុវជន និងកីឡា បានលើកឡើងថា Think!Think! ជាល្បែងសិក្សាដ៏ល្អមួយដែលអាចជួយកុមារឲ្យរៀនជំនាញការគិតស៊ីជម្រៅ និងជំនាញទន់ ដែលជាជំនាញចាំបាច់ក្នុងសតវត្សទី ២១។ ជាលទ្ធផលវិជ្ជមាន ការប្រើប្រាស់កម្មវិធីនេះ បានជួយកុមារទទួលបានលទ្ធផលខ្ពស់លើមុខវិជ្ជាគណិតវិទ្យា ភាពឆ្លាតវៃ ការគោរព និងជឿជាក់លើខ្លួនឯងខ្ពស់។
ក្នុងនាមជាអ្នកឯកទេសបច្ចេកវិទ្យាអប់រំ លោកពិតជាមានសេចក្ដីរីករាយយ៉ាងខ្លាំង ដែលកម្មវិធីសិក្សាបន្ថែមលំដាប់អន្តរជាតិនេះ ត្រូវបានដាក់ឲ្យអនុវត្តនៅសាលារៀនសាធារណៈ។

សូមជម្រាបថា Think!Think! គឺជាកម្មវិធីសិក្សា STEM ថ្មីមួយពីប្រទេសជប៉ុន ដែលមានបំណងអភិវឌ្ឍជំនាញការគិត ភាពច្នៃប្រឌិត និងបំណិនទន់របស់សិស្ស ដូចជាការលើកទឹកចិត្ត និងការចង់ដឹងចង់ឃើញ ដែលត្រូវបានគេស្គាល់ថាជាបំណិនសតវត្សន៍ទី២១៕