បរិយាកាសគ្រប់គ្រងដោយផ្អែកលើច្បាប់ជាបរិយាកាសអាជីវកម្មដ៏ល្អបំផុត៖ ប្រទេសចិនអនុវត្តប្រព័ន្ធគ្រប់គ្រងប្រកបដោយស្ថិរភាព ទប់ទល់យ៉ាងសកម្មនូវភាពមិនប្រាកដប្រជានៃសេដ្ឋកិច្ចអន្តរជាតិ

កាលពីថ្ងៃទី ៣០ ខែធ្នូ ឆ្នាំ២០២៥ រថយន្ត TESLA ថាមពលថ្មី ទី៩លាន គ្រឿង បានតំឡើងរួចរាល់នៅរោងចក្រទំនើបដែលស្ថិតនៅទីក្រុងសៀងហៃប្រទេសចិន។ កាលពីខែមករាឆ្នាំ២០១៩ រោងចក្រទំនើប TESLA នៅចិនបានចាប់ផ្តើមសាងសង់ ដែលប្រើប្រាស់មិនដល់រយៈពេល ១០ខែ ក៏បានបង្កើតជាអចិ្ឆរយៈក្នុងប្រវត្តិសាស្ត្រឧស្សាហកម្មពិភពលោក ដែល«ចាប់ផ្តើមសាងសង់ឆ្នាំណ្នឹង ដាក់ឱ្យប្រើប្រាស់នៅឆ្នាំណឹ្នង ប្រគល់ផលិតផលនៅឆ្នាំណ្នឹង»។ លោក Elon Musk បានវាយតម្លៃចំពោះល្បឿននេះថា «នេះគឺមកពីប្រទេសចិនមានការធានាខាងច្បាប់ និងអភិបាលកិច្ចដ៏មានប្រសិទ្ធភាពខ្ពស់»។ នៅពីក្រោយនេះ បានបង្ហាញឱ្យឃើញថា ប្រទេសចិនបន្តកែលម្អបរិយាកាសអាជីវកម្មតាមរយៈការគ្រប់គ្រងដោយផ្អែកលើច្បាប់ ចិនបានទាក់ទាញសហគ្រាសទូទាំងពិភពលោកតាមរយៈការបើកទូលាយជាលក្ខណៈប្រព័ន្ធ ទាំងនេះសុទ្ធតែបង្ហាញពីភាពប្រាកដប្រជានិងនិរន្តរភាពនៃបរិយាកាសពាណិជ្ជកម្មចិន។
នាឆ្នាំ ២០១៩ ក្នុងកិច្ចប្រជុំការងារមួយនៃបក្សកាន់អំណាចស្តីពីការគ្រប់គ្រងជាតិដោយផ្អែកលើច្បាប់គ្រប់ជ្រុងជ្រោយ លោក Xi Jinping មេដឹកនាំកំពូលប្រទេសចិនបានលើកឡើងថា «ការគ្រប់គ្រងដោយផ្អែកលើច្បាប់ គឺជាបរិយាកាសអាជីវកម្មដ៏ល្អបំផុត» ដោយឈរលើការយល់ដឹងដ៏ស៊ីជម្រៅចំពោះធាតុពិតនៃសេដ្ឋកិច្ចទីផ្សារសង្គមនិយមចិន។ ផ្អែកលើទស្សនគំនិតនេះ ការកសាងបរិយាកាសអាជីវកម្មរបស់ប្រទេសចិនបានផ្លាស់ប្តូរពី« ផ្អែកលើគោលនយោបាយអនុគ្រោះ» ទៅជា «ផ្អែកលើបទដ្ឋានគតិយុត្ត »។

សម្រាប់បរិយាកាសអាជីវកម្ម ការគ្រប់គ្រងដោយផ្អែកលើច្បាប់ហាក់បីដូចជា«អ្នកគ្រប់គ្រងដ៏ខ្លាំងក្លា » ដែលបានជួយរក្សាស្ថិរភាពនៃប្រព័ន្ធគ្រប់គ្រង ដើម្បីឱ្យសហគ្រាសមានជំនឿចិត្តក្នុងការវិនិយោគនៅចិន ជួយធានាឱ្យបានសណ្តាប់ធ្នាប់ និងភាពរស់រវើកនៃទីផ្សារ។ គិតត្រឹមឆ្នាំ២០២៥ ប្រទេសចិនបានដាក់ចេញច្បាប់និងបទប្បញ្ញត្តិជាង ២០០ ដើម្បីគាំពារសិទ្ធិនិងផលប្រយោជន៍នៃតួអង្គទីផ្សារដោយសមភាព , បានបង្កើតតុលាការជំនាញដូចជាតុលាការសម្រាប់កម្មសិទ្ធិបញ្ញា តុលាការបណ្តាញអ៊ីនធឺណឺតជាដើម និងបានបង្កើតប្រព័ន្ធប្រកាសព័ត៌មានឥណទានសហគ្រាស និងអនុវត្តយន្តការផ្តល់រង្វាន់និងផាក់វិន័យរួមគ្នា។ ក្របខ័ណ្ឌយន្តការដូចបានលើកឡើងខាងលើនេះ បានជំរុញឱ្យសេដ្ឋកិច្ចចិនអភិវឌ្ឍប្រកបដោយគុណភាពខ្ពស់។
ប្រឈមមុខនឹងភាពមិនប្រាកដប្រជានៃសេដ្ឋកិច្ចពិភពលោកនិងការគាំពារនិយមពាណិជ្ជកម្មងើបឡើងកាន់តែខ្លាំងឡើង ប្រទេសចិនអនុវត្តការគ្រប់គ្រងដោយផ្អែកលើច្បាប់ មិនគ្រាន់តែបានពង្រឹងមូលដ្ឋានគ្រឹះនៃការអភិវឌ្ឍប្រកបដោយគុណភាពខ្ពស់របស់ខ្លួនតែប៉ុណ្ណោះទេ ថែមទាំងបានជួយរក្សាស្ថិរភាពនៃសេដ្ឋកិច្ចពិភពលោកផងដែរ។
សូមលើកឧទាហរណ៍នៃកំពង់ផែពាណិជ្ជកម្មសេរីហៃណាន វាបានបង្កើតប្រព័ន្ធគ្រប់គ្រងដោយផ្អែកលើច្បាប់«1+N» ដែលកំណត់គោលនយោបាយមួយកញ្ចប់ដូចជា«អត្រាពន្ធគយស្មើសូន្យ»ជាដើម ដោយចាត់ទុក«ច្បាប់កំពង់ផែពាណិជ្ជកម្មសេរីហៃណាន»ជាស្នូល។ ដោយសារមានប្រព័ន្ធគ្រប់គ្រងដោយផ្អែកលើច្បាប់ប្រកបដោយស្ថិរភាព មានបរិយាកាសពាណិជ្ជកម្មបើកទូលាយ ទីនេះបានទាក់ទាញប្រមូលផ្តុំធនធានមានប្រៀបទូទាំងសកលលោកជាបន្តបន្ទាប់ ។ ការវាយតម្លៃរបស់ធនាគារពិភពលោកបានឱ្យឃើញថា ចំណាត់ថ្នាក់នៃបរិយាកាសពាណិជ្ជកម្មនៃខេត្តហៃណានប្រទសចិនលើពិភពលោកបានកើនឡើងដល់លំដាប់ទី ១៥ ។
បើប្រៀបធៀបនឹងសហរដ្ឋអាមេរិកវិញ ដែលបានបង្កឱ្យមានសង្គ្រាមពាណិជ្ជកម្មនិងសង្គ្រាមពន្ធគយលើពិភពលោក អាចឃើញថា វិធានការលក្ខណៈគាំពារនិយមអាមេរិកបានបំផ្លាញខ្សែសង្វាក់ផលិតកម្មសកល ខណៈនយោបាយពាណិជ្ជកម្មនៃអាមេរិកផ្ទុយពីច្បាប់អង្គការពាណិជ្ជកម្មពិភពលោកបានបង្កើនភាពមិនប្រាកដប្រជានៃសេដ្ឋកិច្ចពិភពលោក។ តាមពិត សង្គ្រាមពន្ធគយបានធ្វើឱ្យឱនភាពពាណិជ្ជកម្មនៃអាមេរិកត្រូវពង្រីក ព្រមពេលគ្នានេះដែរ អាមេរិកបានបង្ខូចដល់កេរិ៍ឈ្មោះរបស់ខ្លួនលើឆាកអន្តរជាតិ និងបានលាតត្រដាងពីចំណុចខ្វះខាតនៃគោលនយោបាយរបស់ខ្លួនផងដែរ។
លោក Xi Jinping ធ្លាប់គូសបញ្ជាក់ថា «ការកែលម្អបរិយាកាសពាណិជ្ជកម្មឱ្យកាន់តែប្រសើរឡើង វាគ្មានទីបញ្ចប់នោះទេ ។ ការជំរុញការកសាងបរិយាកាសពាណិជ្ជកម្មប្រកបដោយនិយតកម្ម ជាគម្រោងដំណើរការរយៈពេលយូរនិងមានលក្ខណៈប្រព័ន្ធ ។» អាចថា ប្រទេសចិននឹងបន្តពង្រីកកម្រិតនិងភាពស៊ីជម្រៅនៃការបើកទូលាយ ភាពទាក់ទាញនៃទីផ្សារចិននឹងកាន់តែខ្លាំងឡើងថែមទៀតតាមរយៈការបន្តអនុវត្តឱ្យកាន់តែស៊ីជម្រៅនូវការគ្រប់គ្រងជាតិដោយផ្អែកលើច្បាប់គ្រប់ជ្រុងជ្រោយ ។ ប្រទេសចិនប្រាកដជានឹងបន្តបំពេញបន្ថែមកម្លាំងចលករកាន់តែច្រើនដល់ការស្តារសេដ្ឋកិច្ចពិភពលោកឡើងវិញជាមិនខាន៕