លោក វ៉ូឡូឌីមៀ ហ្សេលេនស្គី បានអោយដឹងថាជនសង្ស័យម្នាក់ត្រូវបានចាប់ខ្លួន ពាក់ព័ន្ធករណីឃាតកម្មសម្លាប់អតីតប្រធានសភា
បរទេស៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានឱ្យដឹងនៅថ្ងៃចន្ទនេះថា ជនសង្ស័យម្នាក់ត្រូវបានចាប់ខ្លួន ពាក់ព័ន្ធករណីឃាតកម្មសម្លាប់អតីតប្រធានសភា លោក Andriy Parubiy។
តាមបណ្តាញតេឡេក្រាម លោក ហ្សេលេនស្គី បញ្ជាក់ថា «ជនសង្ស័យបានផ្តល់ចម្លើយដំបូងហើយ។ ឥឡូវនេះ សកម្មភាពស៉ើបអង្កេតជាបន្ទាន់កំពុងដំណើរការ ដើម្បីកំណត់ហេតុនៃឃាតកម្មនេះ» ដោយបន្ថែមថា «គ្រប់កាលៈទេសៈទាំងអស់នៃឃាតកម្មដ៏រន្ធត់នេះ ត្រូវតែលាតត្រដាង»។
តាមរដ្ឋមន្ត្រីក្រសួងកិច្ចការផ្ទៃរបស់អ៊ុយក្រែន លោក Ihor Klymenko ជនសង្ស័យត្រូវបានឃុំខ្លួនមួយយប់ នៅក្នុងតំបន់ Khmelnytskyi ភាគខាងលិចប្រទេស។
លោក Klymenko និយាយថា ព័ត៌មានលម្អិតជាច្រើនមិនទាន់អាចចែករំលែកបានទេ ដោយគ្រាន់តែអាចប្រាប់បានថា «ឧក្រិដ្ឋកម្មនេះត្រូវបានគ្រោងទុកយ៉ាងប្រុងប្រយ័ត្ន»។
គួរបញ្ជាក់ថា លោក Parubiy អាយុ ៥៤ឆ្នាំ គឺជាអតីតប្រធានសភាអ៊ុយក្រែន ពីខែមេសា ឆ្នាំ ២០១៦ ដល់ខែសីហា ឆ្នាំ ២០១៩។ លោកត្រូវបានគេបាញ់សម្លាប់នៅទីក្រុង Lviv ភាគខាងលិច កាលពីថ្ងៃសៅរ៍ចុងសប្តាហ៍កន្លងទៅ៕
