នាយករដ្ឋមន្ត្រីម៉ាឡេស៊ីថា សង្រ្គាមស៊ីវិលក្នុងប្រទេសមីយ៉ាន់ម៉ា ជារបៀបវារៈនៃកិច្ចប្រជុំកំពូលអាស៊ីអាគ្នេយ៍រយៈពេលពីរថ្ងៃ នៅសប្តាហ៍ក្រោយ
គូឡាឡាំពួ៖ លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី បានឱ្យដឹងថា សង្រ្គាមស៊ីវិលក្នុងប្រទេសមីយ៉ាន់ម៉ា ជម្លោះដែនសមុទ្ទនៅសមុទ្ទចិនខាងត្បូង និងការដំឡើងពន្ធរបស់សហរដ្ឋអាម៉េរិក នឹងជារបៀបវារៈដ៏ចម្បងនៃកិច្ចប្រជុំកំពូលអាស៊ីអាគ្នេយ៍រយៈពេលពីរថ្ងៃ នៅសប្តាហ៍ក្រោយ។
កិច្ចប្រជុំនៅប្រទេសម៉ាឡេស៊ី ដែលជាប្រធានអាស៊ានបច្ចុប្បន្ន នឹងប្រព្រឹត្តទៅនៅថ្ងៃចន្ទទី២៦ ខែឧសភា នឹងបន្តដោយកិច្ចប្រជុំកំពូលនៅថ្ងៃអង្គារទី២៧ ខែឧសភាជាមួយនាយករដ្ឋមន្ត្រីចិន លោក លី ឈាង និងមេដឹកនាំមកពីក្រុមប្រឹក្សាសហប្រតិបត្តិការឈូងសមុទ្ទ (GCC) ដែលរួមមាន៖ បារ៉ែន គុយវ៉ែត អូម៉ង់ កាតា អារ៉ាប៊ីសាអូឌីត និងអេមីរ៉ាត់អារ៉ាប់រួម។
លោក អាន់វ៉ា និយាយ ថា ក្រុមប្រឹក្សាសហប្រតិបត្តិការឈូងសមុទ្ទមាន ទំនាក់ ទំនង យ៉ាង ខ្លាំង ជាមួយ សហរដ្ឋ អាម៉េរិក រួច ហើយ។ ហើយ ចង់ មាន ភាព ស្និទ្ធស្នាល ជាមួយ ប្រទេស ចិន ផង ដែរ។ មេដឹកនាំម៉ាឡេស៊ីរូបនេះ បាននិយាយនៅក្នុងសន្និសីទសារព័ត៌មានមួយ កាលពីល្ងាចថ្ងៃពុធថា ៖«យើងចង់ឱ្យមានការរួមបញ្ចូលគ្នា ដើម្បីបង្កើនការវិនិយោគពាណិជ្ជកម្ម កិច្ចសហប្រតិបត្តិការកាន់តែមានប្រសិទ្ធភាព»។
ប្រទេសអាស៊ានជាច្រើនដែលពឹងផ្អែកលើការនាំចេញទៅកាន់សហរដ្ឋអាម៉េរិក បានរងការវាយប្រហារដោយពន្ធរបស់សហរដ្ឋអាម៉េរិក ចាប់ពី១០ទៅ៤៩ភាគរយ។
ប្រធានាធិបតីអាម៉េរិក លោក ដូណាល់ ត្រាំ កាលពីខែមុន បានប្រកាសផ្អាករយៈពេល៩០ថ្ងៃលើពន្ធបដិការ ជំរុញឱ្យប្រទេសជាច្រើនរួមមាន៖ កម្ពុជា ម៉ាឡេស៊ី ឥណ្ឌូណេស៊ី ថៃ និងវៀតណាម ចាប់ផ្តើមបើកការចរចាពាណិជ្ជកម្មយ៉ាងឆាប់រហ័សជាមួយរដ្ឋធានីវ៉ាស៊ីនតោន។
លោក អាន់វ៉ា ឱ្យដឹងបន្ថែមថា៖«អាស៊ាន កំពុង ធ្វើ ការ ជាមួយ គ្នា ដើម្បី មើល ពី របៀប ដែល ខ្លួន អាច ចរចា ជាមួយ សហរដ្ឋ អាម៉េរិក ក្នុង នាម ជា ប្លុក។ ទន្ទឹមនឹងនោះ អាស៊ានត្រូវតែកសាងភាពធន់នឹងសេដ្ឋកិច្ចរបស់ខ្លួន ដោយធ្វើឱ្យទំនាក់ទំនងកាន់តែស៊ីជម្រៅជាមួយដៃគូផ្សេងទៀត ដូចជាប្រទេសចិន ឥណ្ឌា និងសហភាពអឺរ៉ុប»។
នាយករដ្ឋមន្ត្រីម៉ាឡេស៊ី បរិយាយថា ការប្រជែងគ្នារវាងសហរដ្ឋអាម៉េរិក និងចិន នឹងមិនបំបែកប្លុកនេះទេ ដោយសារតំបន់នេះបន្តចូលរួមជាមួយមហាអំណាចទាំងពីរ។ លោកក៏បានលើកឡើងពីជម្លោះទឹកដីរវាងសមាជិកអាស៊ាន និងចិន នៅសមុទ្ទចិនខាងត្បូង ដែលរដ្ឋធានីប៉េកាំងទាមទារស្ទើរតែទាំងស្រុង ក៏ដូចជាជម្លោះដ៏រ៉ាំរ៉ៃរបស់មីយ៉ាន់ម៉ា ចាប់តាំងពីការកាន់កាប់ដោយយោធានៅឆ្នាំ២០២១។
កាលពីខែមុន លោក អាន់វ៉ា បានជួបជាមួយប្រមុខយោធាមីយ៉ាន់ម៉ា ឧត្តមសេនីយ៍ មីន អ៊ុងឡាំង នៅរាជធានីបាងកក និងបានជួបពិភាក្សាតាមប្រព័ន្ធអនឡាញជាមួយរដ្ឋាភិបាលរួបរួមជាតិ ដែលជាក្រុមប្រឆាំងរបបសឹក។ ទោះជាកិច្ចពិភាក្សាត្រូវបានផ្តោតលើជំនួយមនុស្សធម៌ បន្ទាប់ពីការរញ្ជួយដីដ៏បំផ្លិចបំផ្លាញក្នុងខែមីនា ដែលបានសម្លាប់មនុស្សជាង៣៧០០នាក់។លោក អាន់វ៉ា សង្ឃឹមថា នៅទីបំផុតពួកគេអាចជំរុញដំណើរការសន្តិភាពឆ្ពោះទៅមុខ។
គួរជម្រាបថា ប្រមុខរបបសឹកមីយ៉ាន់ម៉ា លោក មីន អ៊ុងឡាំង ត្រូវបានហាមឃាត់មិនឱ្យចូលរួមក្នុងកិច្ចប្រជុំអាស៊ាន បន្ទាប់ពីយោធាបដិសេធមិនអនុវត្តតាមផែនការសន្តិភាពរបស់អាស៊ាន រួមមាន៖ ការផ្ដល់ជំនួយមនុស្សធម៌ និងការចរចា។ អ្នកប្រឆាំង និងអ្នករិះគន់រដ្ឋាភិបាលយោធា និយាយថា ជំនួយមិនត្រូវបានអនុញ្ញាតដោយសេរីនៅក្នុងតំបន់ដែលមិនស្ថិតនៅក្រោមការគ្រប់គ្រងរបស់កងទ័ពរំដោះ ហើយចោទប្រកាន់កងទ័ពរំដោះ ថាបានបំពានបទឈប់បាញ់ ដែលបានប្រកាសដោយខ្លួនឯងជាមួយនឹងការវាយប្រហារតាមអាកាសរាប់សិបដង៕
