លោក អេម៉ានុយអែល ម៉ាក្រុង គ្រោងនឹងធ្វើទស្សនកិច្ចទៅកាន់តំបន់អាស៊ីអាគ្នេយ៍ ក្នុងគោលបំណងបង្ហាញថា បារាំង និងអឺរ៉ុប ជាដៃគូដែលអាចទុកចិត្តបាន ដើម្បីប្រជ្រៀតខ្លួនប្រជែងឥទ្ធិពលជាមួយមហាអំណាចពិភពលោកទាំង២

ប៉ារីស៖ លោក អេម៉ានុយអែល ម៉ាក្រុង (Emmanuel Macron) ប្រធានាធិបតីបារាំង គ្រោងនឹងធ្វើទស្សនកិច្ចទៅកាន់តំបន់អាស៊ីអាគ្នេយ៍ ក្នុងគោលបំណងបង្ហាញថា ប្រទេសបារាំង និងអឺរ៉ុប ជាដៃគូដែលអាចទុកចិត្តបាន ដើម្បីប្រជ្រៀតខ្លួនប្រជែងឥទ្ធិពលជាមួយមហាអំណាចពិភពលោកទាំង២ (សហរដ្ឋអាម៉េរិក និងចិន)។

លោក ម៉ាក្រុង គ្រោងនឹងទៅដល់រដ្ឋធានីហាណូយនៅថ្ងៃអាទិត្យទី២៥ ខែឧសភា ដែលជាដំណើរទស្សនកិច្ចលើកដំបូងរបស់ប្រធានាធិបតីបារាំង ក្នុងរយៈពេលជិតមួយទសវត្សរ៍។ បន្ទាប់មក លោកនឹងធ្វើដំណើរទៅកាន់ប្រទេសបងធំប្រចាំតំបន់អាស៊ាន គឺឥណ្ឌូណេស៊ី រួចបន្តដំណើរទៅកាន់កូន នាគ អាស៊ី [សិង្ហបុរី] ដែលជាប្រទេសចុងក្រោយនៃដំណើរទស្សនកិច្ចរបស់លោក។

លោកម៉ាក្រុង ក៏នឹងថ្លែងសុន្ទរកថា នៅឯកិច្ចប្រជុំប្រចាំឆ្នាំ Shangri-La Dialogue ដែលជាសន្និសីទការពារជាតិកំពូលរបស់អាស៊ី។

លោកប្រធានាធិបតីវ័យក្មេងដ៏មានឥទ្ធិពលរូបនេះ ក៏នឹងបង្ហាញប្រាប់បណ្តាប្រទេសក្នុងតំបន់អាស៊ីអាគ្នេយ៍ដែរថា បារាំង និងអឺរ៉ុប ជាអ្នកការពារកិច្ចសហប្រតិបត្តិការអន្តរជាតិ និងពាណិជ្ជកម្មផ្អែកលើច្បាប់ ខណៈមហាអំណាចផ្សេងទៀត ដូចជា សហរដ្ឋអាម៉េរិក និងចិន តែងប្រើវិធីបង្ខិតបង្ខំ ឬការសម្លុតគំរាម។

វៀតណាមដែលពឹងផ្អែកលើការនាំចេញ ត្រូវបានជាប់គាំងដោយការគំរាមកំហែងនៃពន្ធខ្ពស់ពីសហរដ្ឋអាម៉េរិក ខណៈបារាំងចង់ធ្វើពិពិធកម្មប្រភពផ្គត់ផ្គង់ និងទីផ្សាររបស់ខ្លួនដើម្បីកាត់បន្ថយការពឹងផ្អែកលើប្រទេសចិន។ កិច្ចព្រមព្រៀងមួយចំនួន កំពុងត្រូវបានរៀបចំ ហើយអាចត្រូវបានចុះហត្ថលេខាក្នុងអំឡុងពេលដំណើរទស្សនកិច្ចរដ្ឋបីនេះ។

លោក ម៉ាក្រុង កំពុងដើរតាមគន្លងមេដឹកនាំចិន ជប៉ុន និងបណ្តាប្រទេសអឺរ៉ុបផ្សេងទៀត ដែលផ្តោតលើដំណើរទស្សនកិច្ចក្នុងតំបន់ដ៏មានសក្តានុពលមួយរបស់ពិភពលោក នាប៉ុន្មានសប្តាហ៍ថ្មីៗ ស្របពេលដែលពិភពលោកកំពុងរង្គោះរង្គើលើភាពមិនច្បាស់លាស់នៃខ្សែច្រវាក់ផ្គត់ផ្គង់ និងពាណិជ្ជកម្មសកល បន្ទាប់ពីមេដឹកនាំបងធំពិភពលោកថ្មី ដូណាល់ ត្រាំ ក្រឡុកសេដ្ឋកិច្ចមួយប្រាវមកនេះ៕