ឯកឧត្តម ជួន ប៊ិតថុល ណែនាំឲ្យក្រុមហ៊ុនសាងសង់ទំនប់អាងទឹកដងកាំបិត ត្រូវបន្តយកចិត្តទុកដាក់ឱ្យបានម៉តចត់លើគុណភាពសំណង់ និងសោភ័ណភាព
ភ្នំពេញ៖ ឯកឧត្តម ជួន ប៊ិតថុល អនុរដ្ឋលេខាធិការ ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅថ្ងៃទី១៤ ខែកុម្ភៈ ឆ្នាំ២០២៥ បានអញ្ជើញដឹកនាំក្រុមបច្ចេកទេសក្រសួងធនធានទឹក និងឧតុនិយម ចុះពិនិត្យវឌ្ឍនភាពការងារសាងសង់ទំនប់អាងទឹកដងកាំបិត ដែលស្ថិតនៅ ឃុំដងកាំបិត ស្រុកសណ្តាន់ ខេត្តកំពង់ធំ។
ឯកឧត្តមរដ្ឋលេខាធិការបានបញ្ជាក់ឱ្យដឹងថា វឌ្ឍនភាពការងារសាងសង់ទំនប់អាងទឹកដងកាំបិត មកដល់ពេលនេះសម្រេចបានប្រមាណ ៥០% ក្នុងនោះការងារកំពុងអនុវត្តរួមមាន៖ ១) ការងាររៀបចំថ្មស្ងួតនៅតាមជើងទេរទំនប់ដីខាងឆ្វេង ផ្នែកខាងមុខ (upstream)បានប្រវែង៥០០ម៉ែត្រ ២) ការដឹកជញ្ជូនសន្លឹកបន្ទះទ្វារទឹកមកដល់ការដ្ឋានបានចំនួន១២ទ្វារ និង ៣) ត្រៀមរៀបចំបិទស្ទឹងផ្នែកខាងស្តាំដើម្បីសាងសង់សំណង់ទ្វារទឹកបន្តទៀត។
ទន្ទឹមនឹងនេះ ឯកឧត្តមអនុរដ្ឋលេខាធិការ បានក្រើនរំលឹក និងណែនាំដល់ក្រុមការងារបច្ចេកទេសរបស់ក្រុមហ៊ុនសាងសង់ និង ក្រុមការងារក្រុមហ៊ុនត្រួតពិនិត្យបច្ចេកទេសត្រូវបន្តយកចិត្តទុកដាក់ឱ្យបានម៉តចត់លើគុណភាពសំណង់ និងសោភ័ណភាព ព្រមទាំងជំរុញការងារសាងសង់ឱ្យសម្រេចបានតាមផែនការគ្រោងទុក។
សូមបញ្ជាក់ថា គម្រោងអភិវឌ្ឍន៍អាងទឹកដងកាំបិតត្រូវប្រើរយៈពេល ៤៨ខែ ដើម្បីសាងសង់ ដោយគិតចាប់ពីថ្ងៃទី៤ ខែធ្នូ ឆ្នាំ២០២៣។
ក្នុងនោះមានការសាងសង់ខ្នងទំនប់សរុបប្រវែង ២ ៦៨០ម៉ែត្រ ដែលរួមមានទំនប់ដីខាងឆ្វេងប្រវែង ១ ១៣៦ម៉ែត្រ ទំនប់បង្ហៀរទឹកប្រវែង ៣០៦ម៉ែត្រ ទំនប់បេតុងប្រវែង ៥០ម៉ែត្រ និងទំនប់ដីខាងស្តាំប្រវែង ១ ១៨៨ម៉ែត្រ ខ្នងទំនប់មានកម្ពស់ ៤០ម៉ែត្រធៀបនឹងនីវ៉ូទឹកសមុទ្រ។ ក្រោយការសាងសង់រួចប្រជាកសិករចំនួន ២៥ ០០០គ្រួសារ ស្មើនឹង ៨៥ ៣០០នាក់ ក្នុងស្រុកបារាយណ៍ ស្រុកសណ្តាន់ ស្រុកសន្ទុក ស្រុកស្ទោង ស្រុកកំពង់ស្វាយ និងស្រុកប្រាសាទសំបូរ នៃខេត្តកំពង់ធំនឹងបានទទួលផលពីការអភិវឌ្ឍអាងនេះ៕
