ក្រុមការងារក្រសួងធនធានទឹក បញ្ជូនគ្រឿងចក្រ និងម៉ាស៊ីនបូមទឹក ជួយអន្តរាគមន៍សង្គ្រោះស្រូវប្រាំងប្រជាពលរដ្ឋចំនួន ៣៨៥ហិកតា ក្នុងឃុំបន្ទាយស្ទោង ស្រុកស្ទោង
ភ្នំពេញ៖ នៅថ្ងៃចន្ទ ទី២០ ខែមករា ឆ្នាំ២០២៥ ក្រុមការងារក្រសួង សហការជាមួយលោកប្រធានមនី្ទរធនធានទឹក និងឧតុនិយមខេត្តកំពង់ធំ លោកមេឃុំបន្ទាយស្ទោង លោកមេភូមិទាំង១០ និងបងប្អូនប្រជាពលរដ្ឋ បានចុះអន្តរាគមន៍បូមទឹកសង្គ្រោះស្រូវប្រាំងរបស់ប្រជាពលរដ្ឋចំនួន ៣៨៥ហិកតា ដែលប្រឈមនឹងការខ្វះខាតទឹកក្នុងឃុំបន្ទាយស្ទោង ស្រុកស្ទោង ខេត្តកំពង់ធំ។
សូមជម្រាបថា ក្នុងកិច្ចអន្តរាគមន៍នេះ ក្រុមការងារបានបញ្ជូនគ្រឿងចក្រ ដែលរួមមាន អេស្កាវាទ័រ ១គ្រឿង ប៊ូដូស័រ ១គ្រឿង រ៉ូឡូ ១គ្រឿង ត្រៃល័រ ១គ្រឿង ម៉ាស៊ីនបូមទឹក ២គ្រឿង និងប្រេងម៉ាស៊ូតចំនួន ១២០លីត្រ ទៅកាន់ទីតាំងបូមទឹកស្ថិតក្នុងភូមិសាស្ត្រស្ទឹងស្ទោង ក្នុងភូមិបន្ទាយស្ទោង ឃុំបន្ទាយស្ទោង ស្រុកស្ទោង ដើម្បីអន្តរាគមន៍បូមទឹកចេញពីស្ទឹងទៅប្រឡាយមេ និងប្រឡាយរងសម្រាប់ស្រោចស្រពដំណាំស្រូវដែលខ្វះខាតទឹក។
សូមបញ្ជាក់ថា ស្រូវប្រាំងចំនួន ៣៨៥ហិកតា របស់បងប្អូនប្រជាពលរដ្ឋ ៥០១គ្រួសារ នៃភូមិចំនួន១០ នៃឃុំបន្ទាយស្ទោង បានប្រឈមនឹងការខ្វះខាតទឹកស្រោចស្រព បន្ទាប់ពីទឹកក្នុងធារាសាស្ត្រ៣០កញ្ញា នៅសល់តិចតួចមិនអាចផ្គត់ផ្គង់គ្រប់។ ស្រូវប្រាំងនេះមានអាយុពី ២៥ ទៅ ៦០ថ្ងៃ ហើយអាចនឹងប្រមូលផលនៅពាក់កណ្តាលខែមីនា ឆ្នាំ២០២៥ខាងមុខ៕
