ប័ណ្ណព្រំដែន ប្រមាណជាង១ម៉ឺន ត្រូវបាន រដ្ឋបាលខេត្តជាប់ព្រំដែន ថៃ និងឡាវ បន្តផ្តល់ជូនពលរដ្ឋប្រើប្រាស់
ភ្នំពេញ៖ ឯកឧត្តមបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានឱ្យដឹងថា ក្នុងរយៈពេល១ខែ គិតចាប់ពីថ្ងៃទី២៦ ខែតុលា រហូតដល់ថ្ងៃទី២៥ ខែវិច្ឆិកា ឆ្នាំ២០២៤ រដ្ឋបាលខេត្តជាប់ព្រំដែនប្រទេសថៃ បានផ្ដល់សេវាប័ណ្ណព្រំដែនជូនប្រជាពលរដ្ឋប្រើប្រាស់បានចំនួន១៩.២០២ក្បាល ក្នុងនោះ ខេត្តបន្ទាយមានជ័យ ផ្ដល់បាន៩.៨១៩ក្បាល ខេត្តប៉ៃលិន ផ្ដល់បាន៣.៥២១ក្បាល ខេត្តឧត្តរមានជ័យ ផ្ដល់បាន២.៩៩៩ក្បាល ខេត្តបាត់ដំបង ផ្ដល់បាន២.៤៦៧ក្បាល និងខេត្តកោះកុង ផ្ដល់បានចំនួន៣៩៦ក្បាល។
ក្នុងរយៈពេលដូចគ្នានេះ អគ្គនាយកដ្ឋានរដ្ឋបាលនៃក្រសួងហាផ្ទៃ ក៏បានបន្តផ្តល់ប័ណ្ណព្រំដែនជូនរដ្ឋបាលខេត្តជាប់ព្រំដែនកម្ពុជា-ថៃ សម្រាប់បំពេញបែបទផ្ដល់សេវាប័ណ្ណព្រំដែនជូនពលរដ្ឋចំនួន១៦.០០០ក្បាលផងដែរ។ ក្នុងចំណោមប័ណ្ណព្រំដែនដែលក្រសួងបានផ្ដល់ជូនរដ្ឋបាលខេត្តជាប់ព្រំដែនទាំងនោះ ខេត្តបន្ទាយមានជ័យ មានចំនួន១២.០០០ក្បាល ខេត្តបាត់ដំបង មានចំនួន៣.០០០ក្បាល និងខេត្តកោះកុង ចំនួន១.០០០ក្បាល។
ឯកឧត្តមបណ្ឌិត បានឱ្យដឹងដែរថា សម្រាប់ខេត្តជាប់ប្រទេសឡាវវិញ ការបើកផ្ដល់ប័ណ្ណព្រំដែនពីក្រសួង គិតចាប់ពីថ្ងៃទី២៦ ខែកញ្ញា ដល់ថ្ងៃទី២៥ ខែតុលា ឆ្នាំ២០២៤ មិនទាន់មាននោះទេ។ ដោយឡែក ក្នុងរយៈពេលដូចគ្នានេះ រដ្ឋបាលខេត្តជាប់ព្រំដែនកម្ពុជា-ឡាវ បានចេញប័ណ្ណព្រំដែនជូនប្រជាពលរដ្ឋប្រើប្រាស់ក្នុងខេត្តស្ទឹងត្រែង ចំនួន១៧ក្បាល។ ចំនួននេះ បើធៀបនឹងបណ្ដាខែកន្លងទៅ គឺមានប្រហាក់ប្រហែលគ្នា ពោលគឺពលរដ្ឋខ្មែរជាប់ព្រំដែនឡាវ មានតម្រូវការសេវាប័ណ្ណព្រំដែនតិច ៕
