សម្ដេចក្រឡាហោម ស ខេង វាយតម្លៃខ្ពស់ចំពោះកិច្ចខិតខំប្រឹងប្រែងរបស់ ឯកអគ្គរដ្ឋទូត វៀតណាមដែលខិតខំក្នុងការជំរុញនិងលើកកម្ពស់ទំនាក់ទំនងរវាងប្រទេសទាំងពីរ
ភ្នំពេញ៖ នារសៀលថ្ងៃទី១១ ខែធ្នូ ឆ្នាំ២០២៤ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ បានអនុញ្ញាតឯកឧត្តម ង្វៀន ហ៊ុយតាំង (Nguyen Huy Tang) ឯកអគ្គរដ្ឋទូតសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងជម្រាបលា ក្នុងឱកាសដែលឯកឧត្តមបញ្ចប់បេសកកម្មការទូតនៅកម្ពុជា នៅវិមានរដ្ឋសភា ។
ជាកិច្ចចាប់ផ្ដើមសម្តេច បានថ្លែងអំណរគុណ និង វាយតម្លៃខ្ពស់ចំពោះកិច្ចខិតខំប្រឹងប្រែងរបស់ ឯកអគ្គរដ្ឋទូត ក្នុងអាណត្ដិបេសកកម្មការទូតនៅកម្ពុជា ដែលបានខិតខំក្នុងការជំរុញនិងលើកកម្ពស់ទំនាក់ទំនងរវាងប្រទេសទាំងពីរកម្ពុជា-វៀតណាម។
សម្តេចជឿជាក់ថាទោះបីចប់អាណត្តិបេសកកម្មនៅកម្ពុជាក៏ប៉ុន្តែ សម្ដេចសង្ឃឹមជឿជាក់ ថា ឯកឧត្តម នៅតែបន្តរួមចំណែកពីគ្រប់លទ្ធភាពដើម្បី ជំរុញនិងលើកកម្ពស់ដល់ទំនាក់ទំនងប្រទេសទាំងពីរបន្តរីកចម្រើនលូតលាស់ទៅមុខថែមទៀត។
ក្នុងនាមសម្តេច ផ្ទាល់ សូមអបអរសាទរចំពោះអ្វីដែលជាសមិទ្ធផលនៃកិច្ចសហប្រតិបត្តិការរវាងប្រទេសទាំងពីរ រវាងរដ្ឋាភិបាលទាំងពីរ រវាងក្រសួងមហាផ្ទៃ និងក្រសួងសន្តិសុខ នៃប្រទេសទាំងពីរ ដែលមានរហូតមកដល់ពេលនេះ។
សម្តេច ក៏នៅតែបន្តលើកទឹកចិត្តឲ្យគ្រប់យន្តការនៃសហប្រតិបត្តិការរវាងប្រទេសទាំងពីរ បន្តអភិវឌ្ឍរីកចម្រើន ល្អប្រសើរទៅមុខថែមទៀត។
សម្តេច ក៏សូមយកឱកាសនេះផ្ដាំផ្ញើនូវការសាកសួរសុខទុក្ខនិងថ្លែងអំណរគុណចំពោះថ្នាក់ដឹកនាំ នៃសាធារណរដ្ឋសង្គមនិយមវៀតណាម ជាពិសេសថ្នាក់ដឹកនាំដែល ធ្លាប់ជា សមភាគី ក្នុងពេលដែល សម្ដេច ធ្លាប់បំពេញការងារជារដ្ឋមន្ត្រីក្រសួងមហាផ្ទៃ សូមជូនពរសព្វសាធុការពរចំពោះថ្នាក់ដឹកនាំរបស់វៀតណាម។
ជាការឆ្លើយតបឯកអគ្គរដ្ឋទូត សូមថ្លែងអំណរគុណចំពោះសម្តេច ក្នុងពាក្យពេចន៍ដ៏ល្អទាំងនេះ ឯកឧត្តម បានមានប្រសាសន៍ថាក្នុងរយៈពេលប្រមាណជាងបីឆ្នាំ កន្លែង មកនេះ ដែល ឯកឧត្តម ទទួលតួនាទីជាឯកអគ្គរដ្ឋទូត នៅកម្ពុជា ឯកឧត្តម សូមថ្លែងអំណរគុណចំពោះការគាំទ្រពីសំណាក់ថ្នាក់ដឹកនាំក្រសួងស្ថាប័នពាក់ព័ន្ធនៃរាជរដ្ឋាភិបាលកម្ពុជា ដែលបានគាំទ្រដល់ការបំពេញបេសកកម្មរបស់ឯកឧត្តម និងសហការីនៅព្រះរាជាណាចក្រកម្ពុជារហូតដល់ចប់អាណត្តិ។
ឯកឧត្តម ក៏បានជម្រាបជូនអំពី វឌ្ឍនភាពនៃកិច្ចសហប្របត្តិការរវាងប្រទេសទាំងពីរ ដែលបន្តអភិវឌ្ឍ ល្អប្រសើរជាលំដាប់ ទាំងលើវិស័យនយោបាយ វិស័យពាណិជ្ជកម្ម ទេសចរណ៍ អប់រំ សិក្សាធិការ និងវិស័យសន្តិសុខ ដែល ភាគីទាំងពីរបានខិតខំរួមគ្នាថែរក្សាបរិយាកាសសង្គម នៃប្រទេសទាំងពីរបានល្អប្រសើរ ដែលបម្រើដល់ការអភិវឌ្ឍ របស់ប្រទេសទាំងពីរ។
ឯកឧត្តម ក៏សង្ឃឹមជឿជាក់ ហើយក៏បន្ត គាំទ្រដល់កិច្ចសហប្រតិបត្តិការ និងជំរុញដល់ទំនាក់ទំនងទៅវិញទៅមករវាងប្រទេសទាំងពីរ ឲ្យកាន់តែរីកចម្រើនជាលំដាប់។
នៅក្នុងឱកាសនេះដែរឯកឧត្តម ក៏សូមថ្លែងអំណរគុណនិងជូនពរសម្ដេចក្រឡាហោម អោយមានសុខភាពល្អ និងបន្តចូលរួមគាំទ្រទៅដល់ការលើកកម្ពស់ទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរជាបន្តទៀត។
ជាថ្មីម្តងទៀតសម្តេច សង្ឃឹមជឿជាក់ថាឯកអគ្គរដ្ឋទូតថ្មីរបស់វៀតណាមនឹងបន្ត ពង្រឹងពង្រីកនូវអ្វីដែលជាសមិទ្ធផល ដែល ឯកឧត្តម ង្វៀន ហ៊ុយតាំង សម្រេចបានដល់ពេលនេះ សម្តេចក៏សូមជូនពរដល់ ឯកឧត្ដម ទទួលបានជោគជ័យនៅក្នុងបេសកកម្មថ្មីៗ របស់ឯកឧត្ដម តទៅថ្ងៃមុខបន្ទាប់ពីបញ្ចប់អាណត្តិការងារនៅកម្ពុជា៕
