បទវិភាគ៖ខណៈពេលដែលពិភពលោកទាំងមូលស្វែងរកភាពប្រាកដប្រជា ”ភាពប្រាកដប្រជា”នៃសេដ្ឋកិច្ចចិនទទួលបានការទទួលស្គាល់យ៉ាងទូលំទូលាយពីសំណាក់សហគមន៍អន្តរជាតិ
ទិន្នន័យសេដ្ឋកិច្ចក្នុងរយៈពេល ៥ ខែដំបូងនៃឆ្នាំនេះរបស់ចិនត្រូវបានប្រកាសជាផ្លូវការនៅថ្ងៃទី ១៦ ខែមិថុនា៖សូចនាករសេដ្ឋកិច្ចសំខាន់ៗដូចជាឧស្សាហកម្មនិងពាណិជ្ជកម្មអន្តរជាតិជាដើមបានកើនឡើងយ៉ាងលេចធ្លោ ហើយសេដ្ឋកិច្ចជាតិមានដំណើរការស្ថិរភាពជាទូទៅនិងឆ្ពោះទៅរកភាពថ្មីនិងគុណភាពខ្ពស់ ។ល។ ប្រព័ន្ធផ្សព្វផ្សាយបរទេសបានយល់ឃើញថា តារាងពិន្ទុដែលបង្ហាញពីភាពធន់ទាំងនេះបានបង្ហាញឱ្យឃើញនូវកម្លាំងចលករផ្ទៃក្នុងដ៏ខ្លាំងក្លារបស់សេដ្ឋកិច្ចចិនម្តងទៀត ហើយក៏បានបំពេញបន្ថែមនូវកម្លាំងចលករថ្មីសម្រាប់សេដ្ឋកិច្ចពិភពលោកដែលស្តារឡើងវិញដោយទន់ខ្សោយផងដែរ ។
បើពិនិត្យមើលពី”តារាងពិន្ទុ”ឱ្យបានលម្អិត អាចឃើញពី”ស្ថិរភាព” ”នវានុវត្តន៍”និង”ភាពធន់”ជាចំណុចលេចធ្លោ ។
សូមក្រឡេកមើលពី”ស្ថិរភាព”នៃនិន្នាការជាទូទៅរបស់សេដ្ឋកិច្ចចិន ។ ក្នុងរយៈពេល ៥ ខែដើមឆ្នាំនេះ តម្លៃបន្ថែមនៃសហគ្រាសឧស្សាហកម្មធុនមធ្យមនិងធំបានកើនឡើង ៥,៤ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ។ បើមើលពីការប្រើប្រាស់អាចឃើញថា ក្នុងរយៈពេល ៥ ខែដើមឆ្នាំនេះ ទំហំលក់រាយទំនិញប្រើប្រាស់ក្នុងសង្គមនិងការប្រើប្រាស់ខាងសេវាកម្មបានកើនឡើង ២,៨ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ក្នុងនោះ ទំហំលក់រាយនៃការប្រើប្រាស់ខាងសេវាកម្មបានកើនឡើង ៥,៤ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ដែលខ្ពស់ជាងល្បឿនកំណើននៃការលក់រាយទំនិញប្រើប្រាស់ក្នុងសង្គម ។ ប្រការនេះបានបង្ហាញថា ការប្រើប្រាស់ខាងសេវាកម្មបានក្លាយជាកម្លាំងដ៏សំខាន់សម្រាប់ជំរុញការកើនឡើងនៃការប្រើប្រាស់របស់ប្រទេសចិនពីមួយថ្ងៃទៅមួយថ្ងៃ ។
ក្នុងនាមជាអង្គភាពសេដ្ឋកិច្ចធំទីពីរនៅលើពិភពលោក ”ស្ថិរភាព”នៃសេដ្ឋកិច្ចចិនបានផ្តល់នូវស្ថិរភាពដ៏កម្រនិងភាពប្រាកដប្រជាសម្រាប់ការអភិវឌ្ឍក្នុងរយៈពេលយូរដល់ពិភពលោក ។ «របាយការណ៍ស្ទង់មតិចំពោះប្រធានប្រតិបត្តិ(CEO)សកលអំពីប្រទេសចិន»ដែលចេញផ្សាយដោយក្រុមហ៊ុន Pricewaterhouse Coopers ក្នុងឆមាសទីមួយនៃឆ្នាំនេះបានបង្ហាញថា សមាមាត្រនៃប្រធានប្រតិបត្តិ(CEO)ដែលចាត់ទុកតំបន់ដីគោកនៃប្រទេសចិនថាជាគោលដៅវិនិយោគលំដាប់ ៣ លេខខាងមុខលើទូទាំងពិភពលោកត្រូវបានលើកកម្ពស់យ៉ាងច្បាស់លាស់ ។
សូមងាកមកមើល”ភាពថ្មី”នៃកម្លាំងចលករអភិវឌ្ឍន៍ ។ កម្លាំងផលិតកម្មគុណភាពថ្មីកំពុងពន្លឿនការត្រួសត្រាយវិស័យថ្មីសម្រាប់ជំរុញកំណើន ។ ពីមនុស្សយន្តរបស់ចិនដែលបានទទួលប្រជាប្រិយភាពយ៉ាងខ្លាំងតាមបណ្តាញទំនាក់ទំនងសង្គមនៅបរទេសដល់ម៉ូតូរបស់លោក Zhang Xue ដែលបានជួយអ្នកជិះម៉ូតូឱ្យយកឈ្នះការប្រកួតកីឡាម៉ូតូលំដាប់កំពូលពិភពលោក នៅពីក្រោយចំណុចលេចធ្លោទាំងនេះបានបង្ហាញពីការអភិវឌ្ឍយ៉ាងផុលផុសនៃកម្លាំងផលិតកម្មគុណភាពថ្មីរបស់ចិន ។
មិនត្រឹមតែប៉ុណ្ណោះទេ ប្រឈមមុខនឹងការកើនឡើងនៃកត្តាមិនប្រាកដប្រជាពីខាងក្រៅ ភាពធន់នៃសេដ្ឋកិច្ចចិនបានធ្វើឱ្យមជ្ឈដ្ឋានខាងក្រៅមានចំណាប់អារម្មណ៍យ៉ាងស៊ីជម្រៅ ។ សូមលើកយកពាណិជ្ជកម្មអន្តរជាតិជាឧទាហរណ៍៖ពិតមែនតែកំណើននៃសេដ្ឋកិច្ចនិងពាណិជ្ជកម្មសកលបានជួបប្រទះនឹងការលំបាកនិងការគាំពារនិយមផ្នែកពាណិជ្ជកម្មបានងើបឡើងវិញ ប៉ុន្តែទំហំនាំចេញនាំចូលទំនិញរបស់ចិនក្នុងខែឧសភាបានកើនឡើង ១៦,៩ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២៥ ក្នុងនោះ ការនាំចេញនិងការនាំចូលសុទ្ធតែបានរក្សាកំណើនពីរខ្ទង់ ។ ទិន្នន័យដ៏គួរឱ្យកត់សម្គាល់ទាំងនេះមិនត្រឹមតែបានឆ្លុះបញ្ចាំងពីភាពធន់និងភាពរស់រវើកនៃសេដ្ឋកិច្ចចិនប៉ុណ្ណោះទេ ថែមទាំងបានរួមចំណែកយ៉ាងសកម្មសម្រាប់ការអភិវឌ្ឍសេដ្ឋកិច្ចនិងពាណិជ្ជកម្មពិភពលោកនិងស្ថិរភាពនៃខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់សកលដែលបានបញ្ចេញសញ្ញាយ៉ាងច្បាស់លាស់ថា ប្រទេសចិនបាននិងកំពុងប្រកាន់ខ្ជាប់នូវការបើកទូលាយនិងការអភិវឌ្ឍព្រមទាំងចែករំលែកភាគលាភជាមួយពិភពលោក ។
បច្ចុប្បន្ននេះ កត្តាមិនប្រាកដប្រជានិងអស្ថិរភាពពីខាងក្រៅដែលយើងបាននិងកំពុងប្រឈមមុខ គឺមានច្រើនបង្គួរ ប៉ុន្តែនិន្នាការដ៏ល្អប្រសើរក្នុងរយៈពេលវែងរបស់សេដ្ឋកិច្ចចិន គឺ មិនបានកែប្រែទេ ។ ស្របពេលដែលប្រទេសចិនជំរុញការអនុវត្តផែនការអភិវឌ្ឍន៍ជាតិ ៥ ឆ្នាំទី ១៥ ឧស្សាហកម្ម តម្រូវការក្នុងស្រុកនិងសក្តានុពលនៃការបើកទូលាយដែលបង្កប់ក្នុងសេដ្ឋកិច្ចចិននឹងត្រូវបានបញ្ចេញថែមមួយកម្រិតទៀត ។ ដូច្នេះក៏មិនពិបាកយល់ថា ហេតុអ្វីបានជាស្ថាប័នវាយតម្លៃអន្តរជាតិដូចជាគ្រឹះស្ថាន Moody និង Fitch ជាដើមទទួលស្គាល់ចំពោះសមិទ្ធផលសេដ្ឋកិច្ចរបស់ចិន ហេតុអ្វីបានជាប្រាក់ទុនអន្តរជាតិនាំគ្នាបន្ថែមការបណ្តាក់ទុននៅប្រទេសចិន ។ ពីព្រោះពិភពលោកបានមើលឃើញកាន់តែច្បាស់ថា៖ការធ្វើដំណើររួមជាមួយប្រទេសចិន គឺហាក់ដូចជាការធ្វើដំណើរស្របជាមួយកាលានុវត្តភាព រីឯការវិនិយោគនៅប្រទេសចិនគឺជាការវិនិយោគដើម្បីថ្ងៃអនាគត ៕
