តៃវ៉ាន់ បង្កើនកម្រិតការប្រុងប្រយ័ត្ន ខណៈមហាយក្សចិន ដាក់ពង្រាយនាវាកងទ័ពជើងទឹក និងឆ្មាំឆ្នេរសមុទ្រជិត៩០គ្រឿង នៅជិតកោះតៃវ៉ាន់
តៃប៉ិ៖ តៃវ៉ាន់បានបង្កើនកម្រិតប្រកាសអាសន្នកាលពីថ្ងៃចន្ទទី៩ ខែធ្នូ ដោយអះអាងថា មហាយក្សចិនបានត្រៀមកងទ័ពអាកាស និងបានដាក់ពង្រាយនាវាកងទ័ពជើងទឹក និងឆ្មាំឆ្នេរសមុទ្ទ ក្នុងបំណងធ្វើលំហាត់សឹកនៅទូទាំងដែនទឹកក្នុងតំបន់។
មន្ត្រីសន្តិសុខតៃវ៉ាន់ជាន់ខ្ពស់បានលើកឡើងថា ចិនបានដាក់ពង្រាយនាវាកងទ័ពជើងទឹក និងឆ្មាំឆ្នេរសមុទ្ទជិត៩០គ្រឿងនៅជិតកោះតៃវ៉ាន់ កោះភាគខាងត្បូងប្រទេសជប៉ុន និងសមុទ្ទចិនខាងកើត និងខាងត្បូង ហើយក្នុងនោះប្រហែល២ភាគ៣ជាកងនាវាចរ។ មែនទែនទៅ ចិនត្រូវបានគេរំពឹងថានឹងចាប់ផ្តើមសមយុទ្ធមួយផ្សេងទៀត ដើម្បីឆ្លើយតបទៅនឹងដំណើរទស្សនកិច្ចរបស់ប្រធានាធិបតីតៃវ៉ាន់ លោក ឡៃ ឈីងតេ ទៅកាន់តំបន់ប៉ាស៊ីហ្វិក ដែលរួមមានការឈប់សំចតនៅកោះហាវ៉ៃ និងកោះហ្គាំ ជាទឹកដីរបស់សហរដ្ឋអាម៉េរិក។
ក្រសួងសួងការពារជាតិកោះតៃវ៉ាន់ បានបង្ហាញនៅក្នុងសេចក្តីថ្លែងការណ៍មួយថា រដ្ឋធានីប៉េកាំងបានបង្កើតតំបន់ហាមឃាត់បណ្តោះអាសន្នចំនួន៧ រហូតដល់ថ្ងៃពុធទី១១ ខែធ្នូ នៅខេត្តហ្វូជាន (Fujian) និងខេត្តហ្សេជាំង (Zhejiang)។ យ៉ាងណាមិញ ចិនមិនបានប្រកាសភ្លាមៗអំពីការសាកល្បងអាវុធជាក់លាក់ ឬសមយុទ្ធយោធានោះទេ។ មន្ត្រីតៃវ៉ាន់ដែលនិយាយក្នុងលក្ខខណ្ឌមិនបញ្ចេញឈ្មោះ អះអាងថា ការដាក់ពង្រាយរបស់ចិនមានទំហំធំជាងសមយុទ្ធធំៗ២លើកកន្លងមក នៅជុំវិញកោះតៃវ៉ាន់ក្នុងឆ្នាំនេះ។ ប្រភពដដែលបានឱ្យដឹងថា៖«ជាលើកដំបូងដែលពួកគេបានកំណត់គោលដៅលើខ្សែច្រវាក់កោះទាំងមូល ដោយសំដៅទៅលើតំបន់ដែលរត់ចេញពីប្រទេសជប៉ុនឆ្លងកាត់កោះតៃវ៉ាន់ ហ្វីលីពីន និងទៅកាន់កោះ Borneo ដោយបិទសមុទ្ទជុំវិញឆ្នេរសមុទ្ទរបស់ប្រទេសចិន»។ ជាការឆ្លើយតប យោធាកោះតៃវ៉ាន់បានធ្វើឱ្យសកម្មនូវសមយុទ្ធត្រៀមប្រយុទ្ធនៅទីតាំងយុទ្ធសាស្ត្រ។
ក្រសួងការបរទេសសហរដ្ឋអាម៉េរិកអះអាងថា ខ្លួនកំពុងតាមដានយ៉ាងដិតដល់នូវសកម្មភាពយោធារបស់ចិន នៅជិតកោះតៃវ៉ាន់។ អ្នកនាំពាក្យក្រសួងការបរទេសអាម៉េរិកបានសង្កត់ធ្ងន់ថា៖«យើងបន្តអំពាវនាវឱ្យចិនធ្វើសកម្មភាពអត់ធ្មត់ និងជៀសវាងសកម្មភាពដែលអាចបំផ្លាញសន្តិភាព និងស្ថិរភាពនៅទូទាំងច្រកសមុទ្ទតៃវ៉ាន់ និងក្នុងតំបន់ផ្សេងទៀត។ ការធ្វើដំណើរទស្សនកិច្ចជាទម្លាប់របស់ប្រធានាធិបតីតៃវ៉ាន់មិនគួរប្រើជាលេសសម្រាប់ដាក់សម្ពាធយោធានោះទេ»។ ជាមួយគ្នានោះ ក្រសួងការពារជាតិកោះតៃវ៉ាន់បានលើកឡើងថា៖«រាល់សកម្មភាពបង្កហេតុ និងឯកតោភាគីដោយមិនសមហេតុផលអាចបំផ្លាញសន្តិភាព និងស្ថិរភាពនៅក្នុងតំបន់ឥណ្ឌូប៉ាស៊ីហ្វិកយ៉ាងធ្ងន់ធ្ងរ ហើយនឹងមិនត្រូវបានទទួលស្គាល់ដោយសហគមន៍អន្តរជាតិឡើយ»៕
