សម្តេចធិបតី៖ ឆ្នាំ២០០៤ ជាឆ្នាំដែលកូនខ្មែរគ្រប់រូប តោងចងចាំ ដែលកម្ពុជាជាប្រទេសតូច អភិវឌ្ឍតិចតួច អាចសម្រេចបានជោគជ័យដ៏កម្រ ក្លាយជាសមាជិក WTO ពេញសិទ្ធិ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា ឆ្នាំ២០០៤ គឺជាឆ្នាំដែលកូនខ្មែរគ្រប់រូបតោងចងចាំដែលកម្ពុជាជាប្រទេសតូច ជាប្រទេសអភិវឌ្ឍតិចតួច (LDC) អាចសម្រេចបានជោគជ័យដ៏កម្រ ដោយបានក្លាយជាសមាជិកអង្គការពាណិជ្ជកម្មអន្តរជាតិ (WTO)។
ក្នុងឱកាសអញ្ជើញជាអធិបតីភាព ក្នុងពិធីអបអរសាទរខួប២០ឆ្នាំ នៃកម្ពុជាចូលជាសមាជិកអង្គការពាណិជ្ជកម្មពិភពលោក (WTO) ដែលធ្វើឡើងនៅសណ្ឋាគារសុខាភ្នំពេញ នាថ្ងៃទី១៤ ខែតុលា ឆ្នាំ២០២៤នេះ សម្តេចធិបតីបញ្ជាក់ថា «ឆ្នាំ២០០៤ គឺជាឆ្នាំ ដែលកូនខ្មែរគ្រប់រូប តោងចងចាំ នៅពេលកម្ពុជា ដែលជាប្រទេសតូច និងជាប្រទេសដែលមានការអភិវឌ្ឍតិចតួច (LDC) អាចសម្រេចបាននូវជោគជ័យដ៏កម្រ នៅក្នុងបរិការណ៍នៃក្របខ័ណ្ឌពាណិជ្ជកម្មពហុភាគី ដែលយើងបានក្លាយជាសមាជិក WTO ពេញសិទ្ធិ។ យើងនៅចងចាំបានថា តាមរយៈជោគជ័យដ៏ត្រចះត្រចង់នេះ កិត្តិនាមរបស់កម្ពុជាបានលេចខ្ពស់ត្រដែត ហើយបណ្តាប្រទេស ដែលមានការអភិវឌ្ឍតិចតួចទាំងឡាយ បានមកស្នើសុំរៀនសូត្រពី បទពិសោធរបស់កម្ពុជា»។
សម្តេចថ្លែងថា សមិទ្ធផលនេះ មិនមែនកើតចេញដោយចៃដន្យនោះទេ ប៉ុន្តែកើតចេញពីការដាក់ចេញប្រកបដោយគោលនយោបាយច្បាស់លាស់ និងចក្ខុវិស័យវែងឆ្ងាយ។ សម្តេចបានរំលឹកអំពីប្រវត្តិរបស់កម្ពុជា ក្នុងការស្នើចូលរួមជាសមាជិក WTO ដែលពេលនោះមិនមែនដាក់ថ្ងៃនេះហើយស្អែកគេឱ្យចូលនោះទេ គឺត្រូវការពេលវេលាជាង១ទសវត្ស ដោយចាប់ផ្តើមចរចាពីឆ្នាំ១៩៩៤ មកម្ល៉េះ។ សម្តេចថា ២០ឆ្នាំមកនេះ ក្រោយចូលជាសមាជិក WTO លទ្ធផលដែលកម្ពុជាទទួលបាន គឺតាមរយៈការកែប្រែភាពឯកោ ទាំងការទូត សេដ្ឋកិច្ច កម្ពុជាបានចូលរួមជាមួយយន្តការទ្វេភាគី យន្តការតំបន់ និងទទួលបានការអភិវឌ្ឍជាបន្តបន្ទាប់៕
