អភិបាលរងខេត្តស្ទឹងត្រែង ជំរុញដល់អ្នកពាក់ព័ន្ធ ចូលរួមផ្សព្វផ្សាយឲ្យទូលំទូលាយអំពីពិធីបុណ្យជាតិ និងបុណ្យសំខាន់ៗនានា ដែលខេត្តនឹងរៀបចំខាងមុខនេះ
ភ្នំពេញ៖ លោក ស៊្រន សំឫទ្ធី អភិបាលរងខេត្តស្ទឹងត្រែង បានជំរុញដល់អាជ្ញាធរពាក់ព័ន្ធទាំងអស់ ចាប់ពីថ្នាក់ខេត្ត រហូតដល់ក្រុងស្រុក ត្រូវចូលរួមផ្សព្វផ្សាយនិងជូនដំណឹងដល់ប្រជាពលរដ្ឋគ្រប់មូលដ្ឋានឲ្យបានទូលំទូលាយ ពាក់ព័ន្ធនិងការរៀបចំពិធីបុណ្យជាតិនិងពិធីបុណ្យសំខាន់ៗនានាដែលអាជ្ញាធរខេត្តនឹងរៀបចំនាពេលខាងមុខ។
ការជំរុញបែបនេះធ្វើឡើងក្នុងឱកាស លោកអភិបាលរងខេត្ត ដឹកនាំកិច្ចប្រជុំគណៈកម្មាធិការរៀបចំបុណ្យជាតិ-អន្តរជាតិថ្នាក់ខេត្ត នាព្រឹកថ្ងៃទី១១ ខែតុលា ឆ្នាំ២០២៤ ដែលមានការចូលរួមពីកងកម្លាំងប្រដាប់អាវុធទាំងបីប្រភេទ នាយករដ្ឋបាលសាលាខេត្ត អភិបាលក្រុង ស្រុក និងថ្នាក់ដឹកនាំមកពីមន្ទីរអង្គភាពនានាជុំវិញខេត្តស្ទឹងត្រែង។
លោក ស៊្រន សំឫទ្ធី បានមានប្រសាសន៍ថា ការផ្សព្វផ្សាយឲ្យប្រជាពលរដ្ឋយល់ជ្រាបពីពិធីបុណ្យជាតិនិងបុណ្យសំខាន់ៗនានាដែលអាជ្ញាធរខេត្តស្ទឹងត្រែងនឹងរៀបចំខាងមុខ ដើម្បីឲ្យប្រជាពលរដ្ឋមានឱកាសក្នុងចូលរួម ឲ្យបានច្រើន ជាពិសេសអាចឲ្យប្រជាពលរដ្ឋចូលរួមចងទង់ ចងបដាពាក្យស្លោកនានា ដើម្បីអបអរសាទរបុណ្យជាតិ និងពិធីបុណ្យផ្សេងៗទៀតដែលខេត្តរៀបចំ។
ទន្ទឹមនិងនេះ លោកអភិបាលរងខេត្ត ក៏បានស្នើដល់អាជ្ញាធរពាក់ព័ន្ធទាំងអស់ចូលរួមសហការទាំងអស់គ្នាឲ្យបានល្អ ដើម្បីខេត្តស្ទឹងត្រែង ជាពិសេសអំឡុងពេលដែលខេត្តកំពុងតែមានការចាប់អារម្មណ៍យ៉ាងច្រើនពីសំណាក់ប្រជាពលរដ្ឋទូទៅ ហើយយើងទាំងអស់គ្នាត្រូវ ចូលរួមរៀបចំតុបតែងល្អខេត្តឲ្យមានសោភ័ណភាពនិងមានការទាក់ទាញ។
លោក ញ៉ែម វណ្ណយុត្តិ នាយករដ្ឋបាលខេត្តស្ទឹងត្រែង បានឲ្យដឹងថា ពិធីបុណ្យជាតិនិងបុណ្យសំខាន់ៗដែលអាជ្ញាធរខេត្តស្ទឹងត្រែងនឹងរៀបចំនៅពេលខាងមុខនេះរួមមាន៖
ទី១៖ បុណ្យគោរពព្រះវិញ្ញាណក្ខន្ធព្រះបរមរតនកោដ្ឋ (ថ្ងៃទី១៤ ខែតុលា ឆ្នាំ២០២៤ ដែលនឹងប្រារព្ធឡើងនៅស្រុកបុរីអូរស្វាយសែនជ័យ) ។
ទី២៖ បុណ្យកឋិនទានដើម្បីដង្ហែរទៅវេរប្រគេនព្រះសង្ឃគង់ចាំព្រះវស្សា បានផ្តួចផ្តើមឡើងដោយសម្តេច វិបុលសេនាភក្តី សាយ ឈុំ ដែលគ្រោងធ្វើចំនួនបីវត្តគឺ: វត្តពោធ៍ជ័យ (វត្តសៀមប៉ាង វត្តទួលរលួស (វត្តផាបាំង) វត្តរស្មីចន្ទារាម (ហៅវត្តចន្ទុក្រៅ)។
ទី៣៖ ពិធីប្រណាំងទូក ង នៅថ្ងៃទី២៦, ២៧ ខែតុលា ឆ្នាំ២០២៤។
ទី៤៖ ពិធីបុណ្យគ្រងរាជសម្បត្តិព្រះករុណាព្រះបាទសម្តេចព្រះបរមនាថ នរោត្តម សីហមុនី ដែលស្រប់ទៅតាមប្រតិទិនជាតិ ៕
