ក្រុមមន្ត្រីជំនាញ នៃក្រសួងធនធានទឹក ចុះពិនិត្យថែទាំស្ថានីយជលសាស្ត្រ ក្នុងខេត្តកំពង់ស្ពឺ និងខេត្តពោធិ៍សាត់

ភ្នំពេញ៖ នាថ្ងៃអាទិត្យ ១រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២១ ខែកក្កដា ឆ្នាំ២០២៤ ក្រុមមន្ត្រីជំនាញរបស់នាយកដ្ឋានជលសាស្ត្រ និងការងារទន្លេ នៃក្រសួងធនធានទឹក និងឧតុនិយមបានបន្តចុះធ្វើការថែទាំស្ថានីយជលសាស្រ្ដស្វ័យប្រវត្តិ ក្នុងភូមិសាស្ត្រខេត្តកំពង់ស្ពឺ និងខេត្តពោធិ៍សាត់។

ក្នុងឱកាសនេះ ក្រុមមន្ត្រីជំនាញបានបន្តចុះពិនិត្យថែទាំស្ថានីយជលសាស្រ្ដស្វ័យប្រវត្តិចំនួន ៦រួមមាន៖ ១).ស្ថានីយក្រាំងពន្លៃ ស្ថិតក្នុងភូមិអន្លង់ជ្រៃ ឃុំប្រាំបីមុម ស្រុកថ្ពង ខេត្តកំពង់ស្ពឺ, ២).ស្ថានីយកន្ទួត ស្ថិតក្នុងភូមិផ្សាកន្ទួត ឃុំសង្កែសាទប់ ស្រុកឪរាល់ ខេត្តកំពង់ស្ពឺ, ៣).ស្ថានីយតាសាល ស្ថិតក្នុងភូមិជាំ ឃុំតាសាល ស្រុកឪរាល់ ខេត្តកំពង់ស្ពឺ, ៤).ស្ថានីយឃ្លៀច ស្ថិតក្នុងភូមិរោងម៉ាសុីន ឃុំតាសាល ស្រុកឱរាល់ ខេត្តកំពង់ស្ពឺ, ៥).ស្ថានីយកណ្ដៀង ស្ថិតក្នុងភូមិចារឹក ឃុំស្យា ស្រុកកណ្ដៀង ខេត្តពោធិ៍សាត់ និង៦).ស្ថានីយក្បាលហុង ស្ថិតក្នុងភូមិក្បាលហុង ឃុំវាល ស្រុកកណ្ដៀង ខេត្តពោធិ៍សាត់។

សូមបញ្ជាក់ថា ក្នុងពេលចុះថែទាំស្ថានីយជលសាស្ត្រស្វ័យប្រវត្តិ ក្រុមការងារក៏បានធ្វើការផ្លាស់ប្ដូរអាគុយស្ថានីយ ត្រួតពិនិត្យឧបករណ៍វាស់កម្ពស់ទឹកជៀសវាងមានល្បាប់គ្របពីលើឧបករណ៍ ត្រួតពិនិត្យទិន្នន័យវាស់ដោយឧបករណ៍វាស់កម្ពស់ទឹក លាងសម្អាតផ្ទាំងស្រូបពន្លឺព្រះអាទិត្យនិងឧបករណ៍វាស់កម្រិតទឹកភ្លៀង ព្រមទាំងកាប់មែកឈឺដែលគ្របមកលើស្ថានីយ ៕