សម្តេចធិបតី ហ៊ុន ម៉ាណែត ស្នើឱ្យក្រុមការងាររាជរដ្ឋាភិបាលទទួលបន្ទុកដំណើរការអនុវត្តមុខងារសេសសល់ និងរដ្ឋបាលនៃអ.វ.ត.ក បន្តពិចារណឱ្យបានស៊ីជម្រៅទៅលើចំណុចចំនួន៦
ភ្នំពេញ៖ ក្នុងឱកាសអញ្ជើញបញ្ចុះបឋមសិលា និងសម្ពោធសមិទ្ធផលអគារអនុវត្តមុខងារសេសសល់របស់អង្គជំនុំជម្រះវិសាមញ្ញ ក្នុងតុលាការកម្ពុជា នាព្រឹកថ្ងៃទី១៦ ខែកក្កដា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានស្នើឱ្យក្រុមការងាររាជរដ្ឋាភិបាលទទួលបន្ទុកដំណើរការអនុវត្តមុខងារសេសសល់ និងរដ្ឋបាលនៃអ.វ.ត.ក បន្តពិចារណឱ្យបានស៊ីជម្រៅទៅលើចំណុចចំនួន៦ ទៀតរួមមាន៖
ទី១.អំពីតួនាទី និងការទទួលខុសត្រូវស្នូលរបស់វិទ្យាស្ថាន
ទី២.អំពីឈ្មោះ និងរចនាសម្ព័ន្ធ
ទី៣.អំពីឋានៈ និងទម្រង់
ទី៤.អំពីដៃគូសហប្រតិបត្តិការ
ទី៥.អំពីការវាយតម្លៃផលប៉ះពាល់
ទី៦.អំពីតម្រូវការថវិកា។
ក្នុងឱកាសនេះ សម្តេចធិបតី ហ៊ុន ម៉ាណែត បានថ្លែងអំណរគុណដល់សហគមន៍អន្តរជាតិដែលបានគាំទ្រទាំងផ្នែកនយោបាយ បច្ចេកទេស និងថវិកា ដែលអនុញ្ញាតឱ្យតុលាការនេះបានបញ្ចប់ទាំងស្រុងនូវដំណើរការកាត់សេចក្តីរបស់ខ្លួន ប្រកបទៅដោយភាពរលូន ជោគជ័យ និងមានការទទួលស្គាល់ជាអន្តរជាតិ។
ជាមួយគ្នានេះ សម្តេចធិបតី នាយករដ្ឋមន្ត្រី បានបញ្ជាក់ថា ជោគជ័យរបស់តុលាការនេះត្រូវបានចាត់ទុកជាជោគជ័យរួមទាំងអស់គ្នា ដូចជា រាជរដ្ឋាភិបាល អង្គការសហប្រជាជាតិ និងសហគមន៍អន្តរជាតិ ជាពិសេសគឺជាជោគជ័យសម្រាប់ជនរងគ្រោះ និងមនុស្សជាតិទាំងមូល ៕
