ប្រធានាធិបតីកូរ៉េខាងត្បូង អះអាងថា ប្រេង ១៤ពាន់លានបារ៉ែល អាចកប់នៅក្នុងដែនទឹកភាគខាងកើតរបស់ប្រទេសខ្លួន

សេអ៊ូល៖ ប្រធានាធិបតីកូរ៉េខាងត្បូង លោក Yoon Suk-yeol បានឲ្យដឹងកាលពីថ្ងៃចន្ទថា ប្រេងឆៅ និងឧស្ម័នធម្មជាតិរហូតដល់ ១៤ពាន់លានធុង អាចត្រូវបានកប់នៅក្នុងដែនទឹកភាគខាងកើតរបស់ប្រទេស។

លោក Yoon Suk-yeol បានប្រាប់សន្និសីទសារព័ត៌មានតាមទូរទស្សន៍ថា ការរុករកភូមិសាស្ត្របានបង្ហាញពីលទ្ធភាពខ្ពស់សម្រាប់ការស្តុកទុកប្រេង និងឧស្ម័នដ៏ច្រើននៅឆ្នេរសមុទ្រ Yeongil Bay ក្នុងទីក្រុង Pohang ចម្ងាយប្រហែល ២៦០គីឡូម៉ែត្រភាគអាគ្នេយ៍នៃរដ្ឋធានីសេអ៊ូល។

ការរុករកត្រូវបានចាប់ផ្តើមកាលពីខែកុម្ភៈឆ្នាំមុន លើការរំពឹងទុកថាមានអណ្តូងប្រេង និងឧស្ម័នកាន់តែច្រើននៅជុំវិញតំបន់ឧស្ម័នក្នុងដែនទឹកភាគខាងកើត ដែលកន្លែងស្តុកឧស្ម័នធម្មជាតិចំនួន ៤៥លានបារ៉ែលត្រូវបានរកឃើញនៅចុងទសវត្សរ៍ឆ្នាំ១៩៩០ ហើយត្រូវបានផលិតជាលក្ខណៈពាណិជ្ជកម្មដល់ទីបញ្ចប់រហូតដល់ឆ្នាំ២០២១។

លោក Yoon Suk-yeol បានបញ្ជាក់ថា ការរុករកបានបង្ហាញពីលទ្ធភាពខ្ពស់ សម្រាប់ទុនបម្រុងប្រេង និងឧស្ម័នដ៏ធំរហូតដល់ ១៤ពាន់លានបារ៉ែល ដែលអាចបំពេញតម្រូវការឧស្ម័នធម្មជាតិរបស់កូរ៉េខាងត្បូងសម្រាប់រយៈពេល២៩ឆ្នាំ និងតម្រូវការប្រេងឆៅសម្រាប់រយៈពេល៤ឆ្នាំ។

ប្រធានាធិបតីកូរ៉េខាងត្បូង បានបន្ថែមថា លោកបានអនុម័តផែនការខួងរុករករបស់ក្រសួងពាណិជ្ជកម្ម ឧស្សាហកម្ម និងថាមពល ដោយរំពឹងថាលទ្ធផលបឋមនឹងត្រូវបានប្រកាសនៅក្នុងឆមាសទីមួយនៃឆ្នាំក្រោយ។