នាយករដ្ឋមន្ត្រីជប៉ុន គ្រោងនឹងចូលរួមកិច្ចប្រជុំកំពូលសន្តិភាពអ៊ុយក្រែននៅប្រទេសស្វីសក្នុងខែមិថុនា
តូក្យូ៖ ប្រភពរដ្ឋាភិបាលមួយបានឲ្យដឹងកាលពីថ្ងៃព្រហស្បតិ៍ថា នាយករដ្ឋមន្រ្តីជប៉ុន លោក Fumio Kishida គ្រោងនឹងចូលរួមកិច្ចប្រជុំកម្រិតមេដឹកនាំអន្តរជាតិនៅប្រទេសស្វីសនៅខែក្រោយ ដើម្បីរិះរកវិធានការដើម្បីសម្រេចបានសន្តិភាពនៅក្នុងប្រទេសអ៊ុយក្រែន។
លោក Fumio Kishida ត្រូវបានគេរំពឹងថានឹងទៅទស្សនារមណីយដ្ឋាន Burgenstock ដែលជាកន្លែងកិច្ចប្រជុំកំពូលស្តីពីសន្តិភាពនៅអ៊ុយក្រែន ជាលើកដំបូងដែលគ្រោងនឹងប្រព្រឹត្តទៅ បន្ទាប់ពីបានចូលរួមក្នុងកិច្ចប្រជុំកំពូលក្រុមប្រាំពីររយៈពេលបីថ្ងៃ ដែលគ្រោងនឹងប្រារព្ធធ្វើនៅទីក្រុង Fasano ភាគខាងត្បូងប្រទេសអ៊ីតាលី ចាប់ពីថ្ងៃទី១៣ ខែមិថុនា។
ប្រភពបានបន្តថា នៅឯការជួបជុំពហុជាតិរយៈពេលពីរថ្ងៃរហូតដល់ថ្ងៃទី១៦ ខែមិថុនា លោកនាយករដ្ឋមន្ត្រីជប៉ុន មានគោលបំណងបង្ហាញពីជំហរសកម្មរបស់ជប៉ុនក្នុងការដោះស្រាយសង្រ្គាមនៅអ៊ុយក្រែនដែលបានចាប់ផ្តើមដោយរុស្ស៊ីក្នុងខែកុម្ភៈ ឆ្នាំ២០២២ ខណៈពេលដែលជំរុញឱ្យទីក្រុងម៉ូស្គូដកកងទ័ពរបស់ខ្លួនជាបន្ទាន់។
ប្រទេសស្វីសបានឲ្យដឹងថា ក្នុងអំឡុងពេលនៃកិច្ចប្រជុំនេះ មេដឹកនាំពិភពលោកនឹងផ្លាស់ប្តូរទស្សនៈលើគំនិតផ្តួចផ្តើមកសាងសន្តិភាពរបស់ប្រធានាធិបតីអ៊ុយក្រែន លោក Volodymyr Zelenskyy ដែលហៅថា រូបមន្តសន្តិភាព និងសំណើសន្តិភាពផ្សេងទៀតដោយផ្អែកលើធម្មនុញ្ញអង្គការសហប្រជាជាតិ និងគោលការណ៍សំខាន់ៗនៃច្បាប់អន្តរជាតិ។
រូបមន្តនេះមាន ១០ចំណុច ដែលរួមមានការទាមទារឱ្យមានការដកទ័ពរុស្ស៊ីទាំងស្រុងចេញពីអ៊ុយក្រែន និងការបញ្ជាក់ពីការបញ្ចប់សង្គ្រាមតាមរយៈការចុះហត្ថលេខាលើឯកសារដោយភាគីពាក់ព័ន្ធទាំងអស់។
ប្រទេសស្វីសបានបន្តថា ប្រទេសនេះបានអញ្ជើញគណៈប្រតិភូជាង១៦០ មកពីជុំវិញពិភពលោក ដើម្បីចូលរួមក្នុងការជួបជុំនាពេលខាងមុខនៅរមណីយដ្ឋានមាត់បឹងក្បែរទីក្រុង Lucerne កណ្តាល បន្ទាប់ពីការស្នើសុំពីអ៊ុយក្រែន។
ក្នុងអំឡុងពេលនៃកិច្ចប្រជុំនេះ លោកនាយករដ្ឋមន្ត្រីជប៉ុន ត្រូវបានគេរំពឹងថានឹងបង្ហាញពីការប្តេជ្ញាចិត្តជាបន្តរបស់ប្រទេសជប៉ុនក្នុងការគាំទ្រដល់កិច្ចខិតខំប្រឹងប្រែងកសាងឡើងវិញនៅក្នុងប្រទេសអ៊ុយក្រែន រួមទាំងការរួមចំណែកដល់ការបោសសម្អាតមីន និងគំនិតផ្តួចផ្តើមកសិកម្ម។
នៅខែកុម្ភៈ ឆ្នាំ២០២៤ ប្រទេសជប៉ុនបានរៀបចំសន្និសីទស្តីពីការកសាងឡើងវិញអ៊ុយក្រែននៅទីក្រុងតូក្យូដោយសន្យាផ្តល់ជំនួយចំនួន ១៥.៨ពាន់លានយ៉េន (១០១លានដុល្លារ) ដើម្បីជួយដល់ការស្ដារឡើងវិញនូវអគ្គិសនី ហេដ្ឋារចនាសម្ព័ន្ធថាមពល និងគម្រោងសំខាន់ៗផ្សេងទៀត។
