មន្ត្រីជាន់ខ្ពស់ក្រសួងអប់រំ អញ្ជើញបិទវគ្គបណ្តុះបណ្តាល ពង្រឹងសមត្ថភាពគ្រូបង្រៀនអប់រំពិសេស
ភ្នំពេញ៖ វិទ្យាស្ថានជាតិអប់រំពិសេស នៃក្រសួងអប់រំ យុវជន និងកីឡា បានរៀបចំវគ្គបណ្តុះបណ្តាលគ្រូបង្រៀនអប់រំពិសេស ស្តីពី “សមត្ថភាពមូលដ្ឋានគ្រូបង្រៀនសិស្សពិការភ្នែក និងគថ្លង់” រយៈពេល៥ថ្ងៃ ដោយចាប់ផ្តើមពីថ្ងៃទី២២ ដល់ថ្ងៃទី២៦ ខែមេសា ឆ្នាំ២០២៤ នៅវិទ្យាល័យអប់រំពិសេសសៀមរាប។
ពិធីបិទវគ្គបណ្តុះបណ្តាល បានប្រព្រឹត្តទៅនារសៀលថ្ងៃទី២៦ ខែមេសា ឆ្នាំ២០២៤ ស្ថិតក្រោមអធិបតី ឯកឧត្តម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា ដោយមានការអញ្ជើញចូលរួមពីថ្នាក់ដឹកនាំវិទ្យាស្ថានជាតិអប់រំពិសេស នាយកដ្ឋានអប់រំពិសេស ថ្នាក់ដឹកនាំមន្ទីរ និងលោកគ្រូ អ្នកគ្រូជាសិក្ខាកាមមកពីរាជធានី-ខេត្តគោលដៅ សរុបចំនួន ១១៨នាក់។
គោលបំណងនៃវគ្គបណ្តុះបណ្តាលនេះ គឺដើម្បីជួយពង្រឹងសមត្ថភាពគ្រូបង្រៀនសិស្សពិការភ្នែក ខ្សោយគំហើញ និងគថ្លង់ មកពីវិទ្យាល័យអប់រំពិសេសនានា និងគ្រូបង្រៀនថ្នាក់អប់រំបរិយាបន្ន ដោយផ្តោតលើវិធីសាស្រ្តជួយគាំទ្រការបង្រៀន ការរៀន និងការប្រើប្រាស់សម្ភារសម្រាប់ការរៀន និងបង្រៀន។
ជាពិសេស ការប្រើវិធីសាស្រ្តបង្រៀនផ្សេងៗ សម្រាប់ជួយបង្រៀនដល់ជនដែលស្ថិតក្នុងសេចក្ដីត្រូវការពិសេសឱ្យមានវិជ្ជាសម្បទា បំណិនសម្បទា និងចរិយាសម្បទា ប្រកបដោយគុណភាព បរិយាបន្ន និងសមធម៌៕
