គណៈប្រតិភូរដ្ឋសភាកម្ពុជា ចូលរួមកិច្ចពិភាក្សាតុកាហ្វេ ស្តីពីមូលដ្ឋាននៃជំនឿ និងសិទ្ធិ និងសុខភាពបន្តពូជ

ភ្នំពេញ៖ នៅរសៀលថ្ងៃទី១២ ខែមេសា ឆ្នាំ២០២៤ គណៈប្រតិភូរដ្ឋសភាកម្ពុជា ដឹកនាំដោយ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា បានចូលរួមនៅក្នុងកិច្ចពិភាក្សាតុកាហ្វេ (world cafe) ស្តីពីមូលដ្ឋាននៃជំនឿ និងសិទ្ធិ និងសុខភាពបន្តពូជ។ កិច្ចពិភាក្សានេះ មានគោលបំណងចែករំលែកនូវទស្សនៈមួយចំនួនដែលទាក់ទងទៅនឹងជំនឿសាសនា និងជំនឿនានា ដែលរឹតត្បិតសិទ្ធិ និងសុខភាពបន្តពូជរបស់ស្រ្តី និងក្មេងស្រី ដែលនៅក្នុងប្រទេសមួយចំនួនស្រ្តី និងក្មេងស្រី នៅតែជាជនរងគ្រោះនៃអំពើហិង្សាប្រឆាំងនឹងភេទ មិនអាចទទួលបានព័ត៌មានពេញលេញអំពីសិទ្ធិ និងសុខភាពបន្តពូជ មិនអាចសម្រេចចិត្តអំពីចំនួននៃការមានកូនដោយប្រាថ្នា និងអាពាហ៍ពិពាហ៍កុមារជាដើម។

តាមរយៈអង្គការសុខភាពពិភពលោក ក្មេងស្រីអាយុក្រោម១៥ឆ្នាំ ប្រមាណ២លាននាក់ ផ្តល់កំណើតដល់ទារកជារៀងរាល់ឆ្នាំ និងប្រហែល៩០%នៃការផ្តល់កំណើតទាំងនេះ កើតមាននៅក្នុងប្រទេសដែលមានចំណូលទាប និងប្រទេសដែលមានចំណូលមធ្យម។ តាមរយៈអ្នកជំនាញរបស់អង្គការ Act Alliance ដែលជាអ្នកសម្របសម្រួលកិច្ចពិភាក្សា យល់ឃើញថា អ្នកដឹកនាំសាសនា អាចារ្យកាតូលិក ឬមេកុលសម្ព័ន្ធជាដើម មានឥទ្ធិពលនៅក្នុងការផ្លាស់ប្តូរផ្នត់គំនិត និងការយល់ឃើញរបស់សង្គមចំពោះឋានៈ និងតួនាទីរបស់ស្រ្តី និងក្មេងស្រី ដូច្នេះក្នុងនាមជាសមាជិកសភា គប្បីពិចារណាពិភាក្សាជាមួយអ្នកទាំងនោះ ដោយឈរលើគោលការណ៍ជាមូលដ្ឋាន គឺផ្តល់សុខសុវត្ថិភាព និងសុខុមាលភាពជូនមាតា និងទារក។

នៅក្នុងឱកាសនោះ លោកជំទាវ ឡោក ខេង បានលើកឡើងថា ក្នុងនាមលោកជំទាវជាប្រធានគណៈកម្មការទី៨ លោកជំទាវបានធ្វើការងារយ៉ាងសកម្មជាមួយអាជ្ញាធរមូលដ្ឋាន និងយុវជន ទាក់ទងនឹងសុខភាពប្រជាជននិយាយជារួម និងសិទ្ធិសុខភាពបន្តពូជ និយាយដោយឡែក។ ជាក់ស្តែងសភាកម្ពុជាបានកៀរគរយុវជនតាមរយៈ ស.ស.យ.ក ដែលជាភ្នាក់ងារនៅក្នុងការផ្តល់ព័ត៌មានជូនយុវជននៅតាមសហគមន៍ដែលគេរស់នៅ និងប្រធានភូមិ ប្រធានឃុំជាដើម ៕