រដ្ឋមន្ដ្រីក្រសួងសុខាភិបាល អំពាវនាវដល់ប្រជាពលរដ្ឋកាត់បន្ថយទទួលទានភេសជ្ជៈផ្អែមប៉ូវកម្លាំង ដែលអាចធ្វើឱ្យប៉ះពាល់ដល់សុខភាព
ភ្នំពេញ៖ ឯកឧត្តមសាស្ដ្រាចារ្យ ឈាង រ៉ា រដ្ឋមន្ដ្រីក្រសួងសុខាភិបាល បានថ្លែងអំពាវនាវដល់ប្រជាពលរដ្ឋទាំងអស់ ទាំងកុមារ រហូតដល់វ័យចំណាស់ អំពីការទទួលទាននូវភេសជ្ជៈផ្អែមប៉ូវកម្លាំង សូមមេត្ដាកាត់បន្ថយ និងឈានទៅដល់ការឈប់បរិភោគ ព្រោះក្នុងរយៈពេលមិនចំពោះមុខ តែក៏មិនយូរប៉ុន្មាននឹងធ្វើឱ្យប៉ះពាល់ដល់សុខភាព។
ថ្លែងក្នុងសន្និសីទសារព័ត៌ នៅថ្ងៃបើកសន្និបាតសុខាភិបាលលើកទី៤៣ នៅថ្ងៃទី១៨ ខែមីនា ឆ្នាំ២០២៤ ឯកឧត្តមសាស្ដ្រាចារ្យរដ្ឋមន្ដ្រី ក៏បានគូសរម្លឹកពីការកាត់បន្ថយនូវការបរិភោគគ្រឿងស្រវឹងផងដែរ ព្រោះគ្រឿងស្រវឹង អាចបណ្ដាលឱ្យលើសជាតិខ្លាញ់នៅក្នុងខ្លួន អាចធ្វើឱ្យស្ទះសរសៃឈាមបេះដូង និងសរសៃឈាមខួរក្បាល ដូចនឹងការបរិភោគភេសជ្ជៈផ្អែមដែរ។ ដូចនេះលោកសាស្ដ្រាចារ្យរដ្ឋមន្ដ្រី សូមឱ្យប្រជាពលរដ្ឋ ត្រូវថែទាំសុខភាពជារៀងរាល់ថ្ងៃ ដែលចាប់ផ្ដើមពីថ្ងៃនេះតទៅ។
ឯកឧត្តមរដ្ឋមន្ដ្រីសុខាភិបាល ក៏បានលើកឡើងពីការបរិភោគចំណីអាហារ ដោយអំពាវនាវដល់បងប្អូនប្រជាពលរដ្ឋ ត្រូវស្វែងយល់ពីចំណីអាហារ ដែលមិនសូវមានភាពជាតិផ្អែម ខ្លាញ់ និងជាតិប្រៃ ដូច្នេះតិចអំបិល តិចខ្លាញ់ តិចស្ករ ធ្វើឱ្យយើងមានសុខភាពល្អ។
ជាមួយគ្នានោញឯកឧត្តមរដ្ឋមន្ដ្រី ក៏បានលើកទឹកចិត្ដដល់ប្រជាពលរដ្ឋទាំងអស់ សូមធ្វើលំហាត់ប្រាណ ឱ្យបានគ្រប់ៗគ្នា មិនថាវ័យកុមារ ឬវ័យចាស់នោះទេ ដើម្បីទទួលបានសុខភាពទាំងអស់គ្នា, សុខភាពល្អ គឺផ្ដើមចេញពីខ្លួនយើងទាំងអស់គ្នា៕
