ក្រសួងសង្គមកិច្ច ប្រារព្ធទិវាអន្តរជាតិនារី ៨ មីនា ដើម្បីរំលេចពីសក្តានុពល និងភាពចាំបាច់នៃការលើកកម្ពស់ការចូលរួមរបស់ស្រ្តីនិងក្មេងស្រី ក្នុងវិស័យឌីជីថល
ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទា នាថ្ងៃទី៧ ខែមីនា ឆ្នាំ២០២៤នេះ បានប្រារព្ធកម្មវិធីអបអរសាទរខួបលើកទី១១៣ ទិវាអន្តរជាតិនារី ៨ មីនា ឆ្នាំ២០២៤ ដែលធ្វើឡើងក្រោមមូលបទ «ស្រ្តី និងក្មេងស្រី ក្នុងបរិវត្តកម្មឌីជីថល» ក្នុងគោលបំណងរំលេចអំពីសក្តានុពល និងភាពចាំបាច់នៃការលើកកម្ពស់ការចូលរួម និងភាពជាតំណាងរបស់ស្រ្តីនិងក្មេងស្រី ក្នុងវិស័យឌីជីថលប្រកបដោយប្រសិទ្ធភាព និងសុវត្ថិភាព។
ថ្លែងនាឱកាសនេះ ឯកឧត្ដម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា រាជរដ្ឋាភិបាលបានរៀបចំយុទ្ធនាការទិវាអន្តរជាតិនារី ៨មីនា ជារៀងរាល់ឆ្នាំ ក្នុងគោលបំណងរំលឹកពីការតស៊ូទាមទារសិទ្ធិសេរីភាព និងឆ្លុះបញ្ចាំងអំពីវឌ្ឍភាពសមិទ្ធផល បញ្ហាប្រឈម ការប្តេជ្ញាចិត្ត និងវិធានការជាវិជ្ជមាននានាក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី និងក្មេងស្រី និងបានកំណត់ទិវានេះជាថ្ងៃឈប់សម្រាកជាផ្លូវការទៀតផង។
ឯកឧត្ដមបន្ថែមថា ក្នុងយុគសម័យឌីជីថលនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្រ្តីនិងក្មេងស្រីនៅគ្រប់វិស័យ ជាអាទិភាពក្នុងរបៀបវារ:គោលនយោបាយ និងយុទ្ធសាស្រ្តបញ្ចកោណដំណាក់កាលទី១ តាមរយ:ការពង្រឹងភាពជាពលរដ្ឋ ក្នុងសង្គមដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្នដែលក្នុងនោះ ស្រ្តីគឺជាស្នូល។ ទន្ទឹមនឹងនេះ រាជរដ្ឋាភិបាលតែងតែបង្កឱកាសឲ្យស្រ្តីមាន ឋាន: និងតួនាទី ក្នុងការចូលរួមធ្វើសេចក្តីសម្រេចចិត្តជាក់ស្តែងក្នុងជួររាជរដ្ឋាភិបាល ស្រ្តីបានទទួលឋាន:តួនាទីជា ប្រធានរដ្ឋសភា រដ្ឋមន្រ្តី រដ្ឋលេខាធិការ និងអនុរដ្ឋលេខាធិការនៅតាមក្រសួងស្ថាប័ននានា ដែលបញ្ជាក់យ៉ាងច្បាស់ពីការយកចិត្តទុកដាក់ដល់ស្រ្តីក្នុងសកម្មភាពសង្គមតាមតួនាទី និងសមត្ថភាពរៀងៗខ្លួន។
ឯកឧត្ដម ជា សុមេធី ក្នុងអាណត្តិទី៧នេះ ក្រសួងសង្គមកិច្ច អតីតយុទ្ធជន និងយុវនីតិសម្បទា មានមន្ត្រីរាជការជាស្ត្រី សរុប៧៨៥នាក់ ក្នុងនោះមន្ត្រីក្របខ័ណ្ឌចំនួន ៤៦៨នាក់ ដែលមានចាប់ពីមន្ត្រីរហូតដល់រដ្ឋលេខាធិការ និងមន្ត្រី ជាប់កិច្ចសន្យាជាស្ត្រីចំនួន ៣១៧នាក់ កំពុងបម្រើការងារជូនក្រសួងផងដែរ។
លោកជំទាវ ញ៉េប សុភាព រដ្ឋលេខាធិការ និងជាប្រធានប្រតិបត្តិគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ នៃក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា ក្រោមការដឹកនាំរបស់ លោក ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា តែងតែផ្តល់ឱកាសឱ្យមន្រ្តីរាជការជាស្រ្តីមាន ឋានៈ និងតួនាទី ក្នុងការចូលរួមធ្វើសេចក្តីសម្រេចចិត្តដែលមានចាប់ពីមន្រ្តីរហូតដល់រដ្ឋលេខាធិការ ដែលបញ្ជាក់ពីការយកចិត្តទុកដាក់ដល់ស្រ្តី ដើម្បីលើកកម្ពស់ការចូលរួម និងតួនាទីស្រ្តីនៅក្នុងកម្រិតបច្ចេកទេស និងនយោបាយ ជាពិសេសនៅក្នុងបរិបទនៃការធ្វើបរិវត្តកម្មឌីជីថលនៅកម្ពុជា។
លោកជំទាវ ច័ន្ទ ហារ៉ានវតដ្តី អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានកត់សម្គាល់ថា បច្ចុប្បន្ននេះស្រ្តីបានអភិវឌ្ឍន៍ខ្លួនទៅតាមសម័យកាល ប៉ុន្តែយ៉ាងណាមិញគួរកុំភ្លេចអំពីទំនៀមទម្លាប់ ប្រពៃណី និងសីលធម៌ ក្នុងនាមជាស្រ្តីខ្មែរ។
លោកជំទាវលើកឡើងថា ស្រ្តីមានសិទ្ធមិនមែនតែមួយថ្ងៃទេ ប៉ុន្តែមានសិទ្ធិជារៀងរាល់ថ្ងៃ ហើយក្នុងនាមជាស្រ្តីត្រូវប្រើប្រាស់សិទ្ធិនេះឱ្យសមស្របតាមការដឹកនាំរបស់រាជរដ្ឋាភិបាល ស្របតាមសីលធម៌ និងច្បាប់ និងចូលរួមចំណែកក្នុងការអប់រំកូនចៅ និងស្រ្តីដទៃ ដើម្បីប្រើប្រាស់សិទ្ធរបស់ខ្លួន ឱ្យបានត្រឹមត្រូវ ដើម្បីចូលចំណែកលើកកម្ពស់សេដ្ឋកិច្ច វប្បធម៌ និងទំនៀមទម្លាប់៕
