សម្តេចធិបតី ហ៊ុន ម៉ាណែត៖ គ្រូពេទ្យ និងគ្រូបង្រៀន មិនមែនជាទេវតា ប៉ុន្តែជាអ្នកធ្វើកិច្ចការមួយចំនួន របស់ទេវតា
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២២ ខែកុម្ភៈ ឆ្នាំ២០២៤នេះ បានលើកឡើងថា គ្រូពេទ្យ និងគ្រូបង្រៀន មិនមែនជាទេវតា ប៉ុន្តែជាអ្នកដែលធ្វើកិច្ចការមួយចំនួន របស់ទេវតា ក្នុងន័យនេះសម្តេចបានលើកទឹកចិត្ត ឲ្យលោកគ្រូអ្នកគ្រូទាំងអស់ បន្តប្រឹងប្រែងធ្វើកិច្ចការទេវតានេះ ដើម្បីជួយប្រទេសជាតិ និងប្រជាជនយើង ។
ក្នុងឱកាស អញ្ជើញប្រកាសទទួលស្គាល់ជ័យលាភី អង្គភាពផ្តល់សេវាសាធារណៈគំរូ អនុវិទ្យាល័យ សាលាបឋសិក្សា និង មណ្ឌលសុខភាព នាថ្ងៃទី២២ ខែកុម្ភៈ ឆ្នាំ២០២៤ បញ្ជាក់ថា «ខ្ញុំតែងតែនិយាយថាលោកគ្រូអ្នកគ្រូពេទ្យ ជាអ្នកធ្វើការងារមួយចំនួនរបស់ទេវតា ហេតុអី? បើអ្នកទៅបន់ស្រន់ភាគច្រើន ខ្ញុំឃើញតែពីរទេធំៗ គឺទី១ បន់ឱ្យសុខភាពល្អ អាយុយឺនយូរ បន់ឱ្យម្តាយឪពុកដែលឈឺឱ្យជា ទី២ សុំឱ្យរកស៊ីមានបាន អីចឹងទេវតាអាចផ្តល់បាន ប៉ុន្តែវិធីសាស្ត្រធ្វើជាក់ស្តែងមានតែលោកគ្រូអ្នកគ្រូ ពេទ្យមិនមែនទេវតា តែធ្វើការងាររបស់ទេវតា អីចឹងការភារកិច្ច និងការខិតខំរបស់លោកគ្រូអ្នកគ្រូ ដែលចាត់ទុកថាជាសេនាឱ្យទេវតា ធ្វើការងារទេវតា នេះជាការចាប់អារម្មណ៍របស់ខ្ញុំ។ អីចឹងសុខភាព ទៅរកគ្រូពេទ្យ សមត្ថភាព ចំណេះដឹង ដើម្បីជោគជ័យ ក្នុងការងារ គឺរកគ្រូបង្រៀន ។ ចឹងលោកគ្រូអ្នកគ្រូទាំងអស់ទូទាំងប្រទេស ខ្ញុំសូមលើកទឹកចិត្តដែលទទួលជ័យលាភី ឬមិនជ័យលាភី សូមលោកគ្រូអ្នកគ្រូបន្តកិច្ចការទេវតានេះ ដើម្បីជួយប្រទេសជាតិ និងប្រជាជនយើង»។
សម្តេចធិបតី ថ្លែងថា គ្មានអ្វីដែលរីករាយជាង ឃើញមនុស្សយើងបង្រៀនទទួលបានជោគជ័យ មនុស្សដែលយើងព្យាបាល បានជាសះស្បើយជួបជុំគ្រួសារនោះទេ ៕
