ឯកឧត្តម ស្វាយ សំអ៊ាង៖ អនុគម្រោងសាងសង់ទុកដាក់សំរាមក្រុងស្ទឹងត្រែង ជាទីលានចាក់សំរាមលើក ដំបូងនៅខេត្តស្ទឹងត្រែង
ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានបញ្ជាក់ថា អនុគម្រោងសាងសង់ទុកដាក់សំរាមក្រុង ស្ទឹងត្រែង ដែលបានចំណាយទឹកប្រាក់ជិត៥លានដុល្លាសហរដ្ឋអាមេរិក ជាកម្ចីឥណទានធនាគារអភិវឌ្ឍន៍អាស៊ី (ADB) ជាទីលានចាក់សំរាមលើក ដំបូងនៅខេត្តស្ទឹងត្រែង។
ក្នុងឳកាសអញ្ជើញចូលរួមក្នុងពិធីប្រគល់លានចាក់សំរាម ក្រោមគម្រោងក្រុងរបៀង៤ របស់ធនាគារអភិវឌ្ឍន៍អាស៊ី(ADB) ដែលមានទីតាំងនៅក្នុងស្រុកថាឡាបរិវ៉ាត់ ចំងាយប្រហែល១១គីឡូម៉ែត្រពីទីប្រជុំជនក្រុងស្ទឹងត្រែងជូន ក្រសួងសាធារណៈការនិងដឹកជញ្ជូន ក្រោមអធិបតីភាព ឯកឧត្តម រស់ វណ្ណា ជារដ្ឋលេខាធិការក្រសួងសាធារណការ និងដឹកជញ្ជូន នារសៀលថ្ងៃទី០៧ ខែកុម្ភៈ ឆ្នាំ២០២៤ ឯកឧត្តម ស្វាយ សំអ៊ាង បានពិនិត្យឃើញថា៖ អនុគម្រោងសាងសង់ទុកដាក់សំរាមក្រុង ស្ទឹងត្រែង ដែលបានចំណាយទឹកប្រាក់ជិត៥លានដុល្លាសហរដ្ឋអាមេរិក ជាកម្ចីឥណទានធនាគារអភិវឌ្ឍន៍អាស៊ី (ADB) ជាទីលានចាក់សំរាមលើក ដំបូងនៅខេត្តស្ទឹងត្រែង ដែលបង្កើតឡើងមាន លក្ខណៈស្តង់ដារ ត្រឹមត្រូវតាមបច្ចេកទេសធំទូលាយ គឺក្រុងស្ទឹងត្រែងទទួលបានទីលានទុកដាក់សំរាម សម្រាប់ប្រជាពលរដ្ឋឱ្យប្រើប្រាស់ ដើម្បីលើកកម្ពស់គុណភាពការរស់នៅរបស់ពលរដ្ឋក្នុងតំបន់ និងតំបន់ជុំវិញ ជាពិសេសកាត់បន្ថយបញ្ហាប្រឈមទៅលើកត្តាសុខភាពនិងការបំពុលបរិស្ថាន។
សូមបញ្ជាក់ថា ទីលានទុកដាក់សំរាម ក្រុងស្ទឹងត្រែង បានសាងសង់តាមលក្ខណៈបច្ចេកទេស មានរយៈពេល១៨ខែ គឺសាងសង់ពីថ្ងៃទី០៨ ខែមេសា ឆ្នាំ២០២២ បានបញ្ចប់ការសាងសង់នៅខែធ្នូ ឆ្នាំ២០២៣ ជាស្ថាពរ និងសម្ពោធឱ្យប្រើប្រាស់នៅឆ្នាំ២០២៤ នាពេលឆាប់ៗខាងមុខនេះ។
តាមការឱ្យដឹងពីតំណាងក្រុមហ៊ុន អឹម ធី អេ ខូអិលធីឌី បានបញ្ជាក់ថា ទីលាននេះ មានសមត្ថភាពទទួលសំរាមពីសង្កាត់ចំនួន៥ គឺសង្កាត់ស្ទឹងត្រែង ស្រះឫស្សី ព្រះបាទ សាមគ្គី (ភូមិហាខូសួន និងភូមិហាខូបាន ថាឡាបរិវ៉ាត់ (ភូមិថាឡាបរិវ៉ាត់ ភូមិអូរត្រែល និងភូមិកាំងតេជោ) ដែលរណ្តៅដាក់សំរាមអាចផ្ទុកសំរាមបានចំនួន១៣៧,៤១៦ម៉ែត្រគីប។
ទីលានចាក់សំរាមនេះ ក្រោមគម្រោងក្រុងរបៀង៤ របស់ធនាគារអភិវឌ្ឍន៍អាស៊ី(ADB) ដែលមានរណ្តៅទុកដាក់សំរាមទី១ទំហំ១៥ពាន់៩៩៦ម៉ែត្រការ៉េអាចផ្ទុកបរិមាណសំរាមបានចំនួន១៨៥ពាន់១៥១ម៉ែត្រគីប ចាប់ពីឆ្នាំ២០២៤ ដល់ឆ្នាំ២០៣០ និងស្រះប្រតិកម្មទឹកស្អុយចេញពីសំរាមចំនួន៤ ស្រះទំហំសរុបចំនួន១ម៉ឺន២០០០ម៉ែត្រគីប។
ក្នុងនោះមានផ្លូវបេតុងចូលទៅកាន់ទីលានចាក់សំរាមមានទទឹង៦ម៉ែត្រ ប្រវែង១ពាន់៤៥០ ម៉ែត្រ។ និងមានអគាររដ្ឋបាល អគារញែកសំរាម អគារស្តុកសំណល់គ្រោះថ្នាក់ កន្លែងជញ្ជីងថ្លឹងទំងន់៕
