ឯកឧត្តម សួស យ៉ារ៉ា ប្រជុំពិនិត្យ រៀបចំរបាយការណ៍ ដំណើរទស្សនកិច្ចផ្លូវការរបស់សម្តេច ឃួន សុដារី នៅវៀតណាម ឡាវ និងចូលរួមកិច្ចប្រជុំកំពូលសភា CLV លើកទី១

ភ្នំពេញ៖ ឯកឧត្តម សួស យ៉ារ៉ា ប្រធានគណ:កម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា នាព្រឹកថ្ងៃទី១៩ ខែធ្នូ ឆ្នាំ២០២៣ បានអញ្ជើញដឹកនាំកិច្ចប្រជុំស្តីពីការរៀបចំរបាយការណ៍ ដំណើរទស្សនកិច្ចផ្លូវការរបស់​ សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នៅសាធារណរដ្ឋសង្គមនិយមវៀតណាម និងសាធារណរដ្ឋប្រជាធិបតេយ្យប្រជាមានិតឡាវ ព្រមទាំងអញ្ជើញចូលរួមកិច្ចប្រជុំកំពូលសភា CLV លើកទី១ នៅសាធារណរដ្ឋប្រជាធិបតេយ្យប្រជាមានិតឡាវ ដែលបានប្រព្រឹត្តទៅកាលពីថ្ងៃទី៣០ ខែវិច្ឆិកា ដល់ថ្ងៃទី៧ ខែធ្នូ ឆ្នាំ២០២៣ កន្លងទៅនេះ។

កិច្ចប្រជុំនេះ​ មានការអញ្ជើញចូលរួមពីសំណាក់​ លោកជំទាវ គ្រួច សំអាន អនុប្រធានគណ:កម្មការទី៦ នៃរដ្ឋសភា លោកជំទាវ អ៊ុន សុគន្ធា លេខាធិការគណ:កម្មការទី៤ នៃរដ្ឋសភា ឯកឧត្តម ទី សុគន្ធ លេខាធិការគណ:កម្មការទី៥ នៃរដ្ឋសភា និងឯកឧត្តម លោកជំទាវ​ ជាសមាជិក សមាជិការដ្ឋសភា ឯកឧត្តមអគ្គលេខាធិការរង ឯកឧត្តមទីប្រឹក្សា ឯកឧត្តមអគ្គនាយក អគ្គនាយករង ជំនួយការ ប្រធាននាយកដ្ឋាន អនុប្រធាននាយកដ្ឋាន និងមន្រ្តីជំនាញពាក់ព័ន្ធមួយចំនួនផងដែរ ៕