នាយឧត្តមសេនីយ៍ ឯក មនោសែន អញ្ជើញចុះហត្ថលេខាលើអនុស្សរណៈនៃការយោគយល់រវាងក្រសួងប្រៃសនីយ៍និងទូរគមនាគមន៍ និងបណ្ឌិត្យសភានគរបាលកម្ពុជា

ភ្នំពេញ៖ នៅរសៀលថ្ងៃទី២៩ ខែវិច្ឆិកា ឆ្នាំ២០២៣នេះ ឯកឧត្តមនាយឧត្តមសេនីយ៍សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញចុះហត្ថលេខាលើអនុស្សរណៈនៃការយោគយល់គ្នា នៅទីស្តីការក្រសួងប្រៃសនីយ៍និងទូរគមនាគមន៍ ស្តីពីកិច្ច សហប្រតិបត្តិការដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh ការរៀបចំហេដ្ឋារចនាសម្ព័ន្ធនិងការតភ្ជាប់អ៊ីនធឺណិត ក្រោមអធិបតីភាពដ៏ខ្ពង់ខ្ពស់ ឯកឧត្ដមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសនីយ៍និងទូរគមនាគមន៍។

MoU នេះមានខ្លឹមសារខាន់ៗ៤ចំណុច រួមមាន៖
ទី១- ការដាក់ឱ្យប្រើថ្នាលផ្ទៀងផ្ទាត់ឯកសារ verify. gov.kh សម្រាប់ផ្ទៀងផ្ទាត់សញ្ញាបត្រ វិញ្ញាបនបត្រ និងឯកសារនានា របស់បណ្ឌិត្យសភានគរបាលកម្ពុជា
ទី២- រៀបចំហេដ្ឋារចនាសម្ព័ន្ធនិងតភ្ជាប់អ៊ីនធឺណិតសម្រាប់ការប្រើប្រាស់ក្នុងបណ្ឌិត្យសភា
ទី៣- ការរៀបចំបង្កើតមជ្ឍមណ្ឌលបច្ចេកវិទ្យាឌីជីថលនៅបណ្ឌិត្យសភានិង
ទី៤- សហការបណ្តុះបណ្តាល ផ្សព្វផ្សាយ និងចែករំលែកចំណេះដឹងនិងបទពិសោធពាក់ព័ន្ធនឹងគោលនយោបាយ ច្បាប់ លិខិតបទដ្ឋានគតិយុត្ត និងបច្ចេកវិទ្យាឌីជីថល។

ផ្អែកតាមខ្លឹមសារអនុស្សរណៈនេះ បណ្ឌិត្យសភានគរបាលកម្ពុជានឹងទទួលបានផលប្រយោជន៍ជាច្រើន សម្រាប់ការងារដឹកនាំគ្រប់គ្រង ការងាររដ្ឋបាល ការងារស្រាវជ្រាវ និងការងារបណ្ដុះបណ្ដាល ដែលទាក់ទងជាសារវន្តក្នុងប្រើប្រាស់បច្ចេកវិទ្យាឌីជីថល ៕