ប្រធានគណៈមេធាវីកម្ពុជា ដឹកនាំគណៈប្រតិភូចូលរួមវេទិកាសហប្រតិបត្តិការច្បាប់ចិន-អាស៊ានលើកទី៥ នៅប្រទេសចិន
ភ្នំពេញ៖ នាព្រឹកថ្ងៃអង្គារ ២រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣១ ខែតុលា ឆ្នាំ២០២៣ តបតាមការអញ្ជើញរបស់មជ្ឈមណ្ឌលស្រាវជ្រាវច្បាប់ចិន-អាស៊ាន (CALRC) ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា បានអញ្ជើញដឹកនាំគណៈប្រតិភូចូលរួមវេទិកាសហប្រតិបត្តិការច្បាប់ចិន-អាស៊ានលើកទី៥ ដែលប្រារព្ធធ្វើឡើងនៅថ្ងៃទី១ ខែវិច្ឆិកា ឆ្នាំ២០២៣ នៅទីក្រុងឆុងជីង (Chongqing) នៃសាធារណរដ្ឋប្រជាមានិតចិន។
ឯកឧត្តមប្រធាន នឹងអញ្ជើញថ្លែងសុន្ទរកថាគន្លឹះនៅក្នុងវេទិកាអន្តរជាតិនេះក្រោមប្រធានបទកសាងសហគមន៍អនាគតតែមួយចិន-អាស៊ានកាន់តែជិតស្និទ្ធតាមរយៈនីតិរដ្ឋ។ នៅក្នុងវេទិកាប្រចាំឆ្នាំនេះ ក៏នឹងមានកិច្ចពិភាក្សាពីអ្នកជំនាញមកពីបណ្តាប្រទេសអាស៊ាន និងប្រទេសចិន ក្រោមប្រធានបទ៖ ១. ការអភិវឌ្ឍ និងអនុវត្តច្បាប់ក្រោមគំនិតផ្តួចផ្តើមខ្សែក្រវ៉ាត់ និងផ្លូវ, ២. បទពិសោធន៍អំពីនីតិរដ្ឋ និងយន្តការសហប្រតិបត្តិការនៅក្នុងតំបន់ចិន-អាស៊ាន, ៣. ការការពារផ្លូវច្បាប់សម្រាប់ក្របខណ្ឌសហប្រតិបត្តិការមេគង្គ-ឡាងចាង និងច្រកពាណិជ្ជកម្មផ្លូវគោក និងសមុទ្រអន្តរជាតិថ្មី និង៤. ការអភិវឌ្ឍថ្នាលសម្រាប់សេវាផ្នែកច្បាប់ និងយន្តការសម្រាប់ការបណ្តុះបណ្តាលធនធានមនុស្សក្នុងនៅគំនិតផ្តួចផ្តើមខ្សែក្រវ៉ាត់។
ឯកឧត្តមប្រធាន ក៏នឹងអញ្ជើញចុះហត្ថលេខាលើអនុស្សរណៈនៃការយោគយល់ស្តីពីមិត្តភាព និងកិច្ចសហប្រតិបត្តិការរវាងគណៈមេធាវីនៃព្រះរាជាណាចក្រកម្ពុជា និងមជ្ឈមណ្ឌលស្រាវជ្រាវច្បាប់ចិន-អាស៊ាន។ តាមរយៈអនុស្សរណៈនៃការយោគយល់នេះ ស្ថាប័នទាំងពីរនឹងសហការលើភាពជាដៃគូយុទ្ធសាស្រ្ត កិច្ចសហប្រតិបត្តិការក្នុងការអភិវឌ្ឍន៍ធនធានមនុស្ស ការផ្លាស់ប្តូរបទពិសោធន៍ និងសេវាផ្នែកច្បាប់។
វេទិកាប្រចាំឆ្នាំនេះនឹងមានការចូលរួមពីតំណាងនាយកដ្ឋានកិច្ចការតុលាការ សាកលវិទ្យាល័យ គណៈមេធាវី និងក្រុមហ៊ុន ពីបណ្តាប្រទេសអាស៊ាន និងប្រទេសចិនផងដែរ ៕
