ឯកឧត្តម រាជ រ៉ា ដឹកនាំកិច្ចប្រជុំដើម្បីតាមដានវឌ្ឍនភាពការងារ និងលើកទិសដៅការងារអនុវត្តបន្ត របស់នាយកដ្ឋានគោលនយោបាយពាណិជ្ជកម្ម
ភ្នំពេញ៖ ឯកឧត្តម រាជ រ៉ា រដ្ឋលេខាធិការក្រសួងពាណិជ្ជកម្ម នាថ្ងៃទី៤ ខែកញ្ញា ឆ្នាំ២០២៣ បានដឹកនាំកិច្ចប្រជុំតាមដានវឌ្ឍនភាពការងារ និងលើកទិសដៅការងារអនុវត្តបន្តរបស់នាយកដ្ឋានគោលនយោបាយពាណិជ្ជកម្មនៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្ម ដោយមានការអញ្ជើញចូលរួមពី ឯកឧត្តម លោកជំទាវ អនុរដ្ឋលេខាធិការ ទទួលជួយការងារនាយកដ្ឋាន ឯកឧត្តមប្រតិភូរាជរដ្ឋាភិបាលទទួលបន្ទុកអគ្គនាយកជំរុញពាណិជ្ជកម្ម លោក លោកស្រី អគ្គនាយករង លោកប្រធាននាយកដ្ឋាន និងមន្ត្រីនៃនាយកដ្ឋានគោលនយោបាយពាណិជ្ជកម្មទាំងអស់ផងដែរ។
មានមតិបើកកិច្ចប្រជុំ ឯកឧត្តម រដ្ឋលេខាធិការ មានប្រសាសន៍ថា លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានដាក់ចេញនូវយន្តការដ៏មុតស្រួចក្នុងការបង្កើនប្រសិទ្ធភាពការងាររបស់ក្រសួង សម្រាប់អាណត្តិទី៧នេះ ដូច្នេះសូមមន្រ្តីនាយកដ្ឋានទាំងអស់ប្រឹងប្រែងបំពេញភារកិច្ចតាមតួនាទីរៀងខ្លួនដោយស្មារតីទទួលខុសត្រូវខ្ពស់ និងមានសាមគ្គីផ្ទៃក្នុងឱ្យបានរឹងមាំ។
ក្រោយពីបានស្តាប់នូវរបាយការណ៍វឌ្ឍនភាពការងារ និងទិសដៅអនុវត្តបន្តរបស់នាយកដ្ឋាន ដែលរាយការណ៍ដោយ លោក ទិត សីច័ន្ទលី ប្រធាននាយកដ្ឋានគោលនយោបាយពាណិជ្ជកម្ម រួចមក ឯកឧត្ដម រាជ រ៉ា ក៏បានផ្តល់នូវអនុសាសន៍ណែនាំមួយចំនួនពាក់ព័ន្ធនឹងការអនុវត្តគោលនយោបាយជាតិស្តីដំឡូងមី ២០២០-២០២៥ គោលនយោបាយជាតិស្តីពីស្វាយចន្ទីឆ្នាំ២០២២-២០២៧ និងកិច្ចសហការរៀបចំសន្និសីទស្វាយចន្ទីពិភពលោកនៅកម្ពុជានៅដើមឆ្នាំ២០២៤ ខាងមុខនេះ ។
ជាមួយគ្នានេះដែរ ឯកឧត្តមក៏បានផ្តាំផ្ញេីឱ្យនាយកដ្ឋានត្រូវធ្វើការយ៉ាងជិតស្និតជាមួយក្រសួង ស្ថាប័នពាក់ព័ន្ធ វិស័យឯកជន ដៃគូអភិវឌ្ឍន៍ និងតួអង្គពាក់ព័ន្ធទាំងអស់ក្នុងការសម្រេចឱ្យបានជោគជ័យនូវការអនុវត្តគោលនយោបាយជាតិទាំងពីរខាងលើ ព្រមទាំងសិក្សាអំពីលទ្ធភាពនៃការតាក់តែងគោលនយោបាយជាតិពាក់ព័ន្ធនឹងវិស័យពាណិជ្ជកម្មផ្សេងៗទៀត៕
