ឯកឧត្តម ហ៊ុន ម៉ានី បន្តជួបសំណេះសំណាល និងថ្លែងអំណរគុណក្រុមការងារ រចនាសម្ព័ន្ធគណៈកម្មាធិការបក្ស និងសមាជិកបក្សប្រជាជនកម្ពុជា ក្នុងស្រុកសាមគ្គីមុនីជ័យ
ភ្នំពេញ៖ កាលពីថ្ងៃទី៣ ខែកញ្ញា ឆ្នាំ២០២៣ ឯកឧត្តម ហ៊ុន ម៉ានី អនុប្រធានទី១ នៃក្រុមការងារគណបក្សចុះជួយខេត្តកំពង់ស្ពឺ បានបន្តអញ្ជើញជួបសំណេះសំណាល និងថ្លែងអំណរគុណជូនដល់ក្រុមការងារ រចនាសម្ព័ន្ធគណៈកម្មាធិការគណបក្ស និងសមាជិក សមាជិកាគណបក្សប្រជាជនកម្ពុជាក្នុងឃុំ ជំពូរព្រឹក្ស និង ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ។
មានប្រសាសន៍នាឱកាសនោះ ឯកឧត្តមបានធ្វើការកោតសរសើរ ថ្លែងអំណរគុណដល់គណៈកម្មការចុះជួយស្រុកឃុំ ក្រុមការងារ រួមទាំងសមាជិក សមាជិកាបក្សទាំងអស់ ដែលបានខិតខំប្រឹងប្រែង លះបង់កម្លាំងកាយចិត្តបំពេញភារកិច្ច ផ្ដល់ជំនឿចិត្តជូនគណបក្សប្រជាជនកម្ពុជា ដែលបានចេញទៅបោះឆ្នោតកាលពីថ្ងៃទី ២៣ ខែ កក្កដា ឆ្នាំ ២០២៣ កន្លងទៅ។ ជាមួយគ្នានេះ ឯកឧត្តមបានចូលរួមអបអរសាទរជាមួយបងប្អូនប្រជាពលរដ្ឋ ចំពោះជ័យជម្នះដ៍ត្រចេះត្រចង់នាឱកាសនោះផងដែរ។
ឯកឧត្តមបានលើកឡើងបន្ថែមថា ជ័យជម្នះនេះ គឺជាជ័យជម្នះដ៏វិសេសវិសាល ហើយក្នុងនាមជាមន្ទីរគណបក្សប្រជាជនគឺត្រូវបម្រើប្រជាជនឱ្យកាន់តែប្រសើរបន្ថែមទៀត។ ជាមួយនឹងការលើកឡើងនេះ ឯកឧត្តមានគូសបញ្ជាក់ថា មិនថាក្នុងរាជរដ្ឋាភិបាលឯកឧត្តមមានតួនាទីណាក៏ដោយ ឯកឧត្តមនៅតែជាមន្រ្តីគណបក្សប្រជាជន គឺនៅតែចូលរួមជាមួយសកម្មភាពគណបក្ស ក្នុងការដោះស្រាយបញ្ហារបស់ប្រជាជន មិនថាពេលសប្បាយ ឬ លំបាក គឺនឹងនៅជាមួយប្រជាជនគ្រប់កាលៈទេសៈណាទាំងអស់។
ជាចុងក្រោយ ឯកឧត្តមក៏អំពាវនាវដល់បងប្អូនប្រជាពលរដ្ឋទាំងអស់ បន្តការគាំទ្រ និងជឿជាក់លើគណបក្សប្រជាជនកម្ពុជា និងការដឹកនាំរបស់ សម្តេចមហាបវរធិបតី ហ៊ុន ម៉ាណែតក្នុងការបន្តបេសសកម្ម ដើម្បីធានាឱ្យបាននូវសន្តិភាព ស្ថេរភាព និងការអភិវឌ្ឍគ្រប់វិស័យជូនជាតិ មាតុុភូមិ។
