ពលរដ្ឋចាស់ជរា គ្មានទីពឹង ស្រ្តីមេម៉ាយ ស្ត្រីមានផ្ទៃពោះ ស្ត្រីមានកូន ៣១គ្រួសារ បានទទួលអំណោយមនុស្សធម៌ ពីសមាគមនារីកម្ពុជា ដើម្បីសន្តិភាព និងអភិវឌ្ឍខេត្តបន្ទាយមានជ័យ

ភ្នំពេញ៖ នៅថ្ងៃទី២២ ខែមិថុនា ឆ្នាំ២០២៣ ម្សិលមិញ លោកជំទាវ ជ័យ ណារី អ៊ុំ រាត្រី អនុប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍខេត្តបន្ទាយមានជ័យ និងលោកស្រី រស់ សុផានី អភិបាលរងខេត្ត និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍខេត្ត ព្រមទាំងក្រុមការងារថ្នាក់ខេត្តស្រុក-ក្រុង បានអញ្ជើញនាំយកអំណោយមនុស្សធម៌ របស់សមាគមនារីកម្ពុជា ខេត្តបន្ទាយមានជ័យ ផ្តល់ជូនដល់ពលរដ្ឋចាស់ជរា គ្មានទីពឹង ស្រ្តីមេម៉ាយ ២១គករួសារ និងស្ត្រីមានផ្ទៃពោះ ស្ត្រីមានកូនតូច ១០នាក់ នៅស្រុក-ក្រុងជាប់បន្ទាត់ព្រំដែនកម្ពុជា-ថៃ រួមមានស្រុកម៉ាឡៃ, ក្រុងប៉ោយប៉ែត និងស្រុកអូរជ្រៅ។

សំណេះសំណាលនាឱកាសនោះ លោកជំទាវ ជ័យ ណារី អ៊ុំរាត្រី ក៏បានពាំនាំប្រសាសន៍ផ្ដាំផ្ញើសាកសួរសុខទុក្ខពីសំណាក់លោកជំទាវអគ្គមហាឧបាសិកាហេមចិន្តាពុទ្ធសាន៍នូបត្ថម្ភ បណ្ឌិត ម៉ៅ ម៉ាល័យ កែគឹមយ៉ាន ប្រធានកិត្តិយសសមាគមនារីកម្ពុជា ដើម្បីសន្តិភាព និងការអភិវឌ្ឍខេត្តជូនចំពោះបងប្អូនស្ត្រីដែលក្ដីនឹករលឹក។

ជាមួយគ្នានោះលោកជំទាវ ក៏បានអំពាវនាវដល់បងប្អូនប្រជាពលរដ្ឋទាំងអស់គ្នា សូមទៅចូលរួមបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ខាងមុខ ឱ្យបានគ្រប់ៗគ្នា ដើម្បីបំពេញកាព្វកិច្ចជាពលរដ្ឋម្ចាស់សម្លេងឆ្នោត ជ្រើសរើសមេដឹកនាំដែលខ្លួនពេញចិត្ត ជាពិសេសអ្នកដែលនាំនូវសន្តិភាពជូនប្រទសជាតិយើង។
ប្រជាពលរដ្ឋ ក៏បានថ្លែងអំណរគុណយ៉ាងជ្រាលជ្រៅចំពោះប្រមុខថ្នាក់ដឹកនាំកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ដែលតែងតែគិតគូរពីសុខទុក្ខរបស់ពួកគាត់ជាពិសេសនៅពេលពួកគាត់ជួបទុក្ខលំបាក តែងតែមានមុខថ្នាក់ដឹកនាំចុះមកជួយជានិច្ច ដែលធ្វើឱ្យពួកគាត់មានភាពកក់ក្តៅ បង្ហាញពីការយកចិត្តទុកដាក់ ស្រឡាញ់ប្រជាពលរដ្ឋនៅមូលដ្ឋាន ដោយមិនទុកឲ្យពួកគាត់រងទុក្ខវេទនាឡើយ។ ជាមួយគ្ននោះពួកគាត់ក៏បានប្តេជ្ញាគាំទ្រ លើការដឹកនាំរបស់ប្រមុខរាជរដ្ឋាភិបាលកម្ពុជា មានសម្តេចតេជោគឺមានសុខសន្តិភាព ពេញផ្ទៃប្រទេស ពិសេសសម្តេចបានខិតខំដឹកនាំប្រទេសពីបាត់ដៃទទេ រហូតមានការអភិវឌ្ឍគ្រប់ទីកន្លែង។

សូមបញ្ជាក់ថា ៖ ចាស់ជរា គ្មានទីពឹង ស្រ្តីមេម៉ាយ ទាំង៣ស្រុក សរុបចំនួន ២១គ្រួសារ ក្នុងមួយគ្រួសារ ទទួលបានអង្ករ២០គីឡូក្រាម, មី០១កេស, ទឹកសុទ្ធ០១កេស គ្រឿងឧបភោគបរិភាគ រួមនឹងថវិកាចំនួន២០ម៉ឺនរៀល។ ក្នុងនោះស្រ្តីមានផ្ទៃពោះ ស្ត្រីកូនខ្ចី សរុបចំនួន១០នាក់ ក្នុងម្នាក់ទទួលបាន ឃីត០១ សារុង០១ រួមនឹងថវិកាមួយចំនួន។ ក្នុងនោះលោកជំទាវ ជ័យ ណារី បានផ្តល់សារុងម្នាក់មួយជូនពលរដ្ឋដែលបានចូលរួម ប្រមាណជិត១០០នាក់សារុង ព្រមទាំងឧបត្ថម្ភ ឈុតកីឡា ដល់ក្មេងៗម្នាក់មួយផងដែរ ៕