សិស្សានុសិស្សចំនួន ៥០នាក់ ទទួលបានវគ្គបណ្តុះបណ្តាលពីសាខាកាកបាទក្រហមកម្ពុជា ខេត្តកំពង់ឆ្នាំង អំពីចលនា អន្តរជាតិ កាកបាទក្រហម អឌ្ឍចន្ទក្រហម

ភ្នំពេញ៖ លោក ប្រាក់ សោភ័ណ្ឌ នាយកប្រតិបត្តិសាខា រួមជាមួយលោកគ្រូ សៅ សម្បត្តិ ទីប្រឹក្សាយុវជនប្រចាំវិទ្យាល័យ ប៊ុន រ៉ានី ហ៊ុន សែន រលាប្អៀរ បានអញ្ជើញបើកវគ្គបណ្តុះបណ្តាលស្ដីអំពីចលនា អន្តរជាតិ កាកបាទក្រហម អឌ្ឍចន្ទក្រហម ច្បាប់មនុស្សធម៌អន្តរជាតិ និងគោលនយោបាយយុវជនកាកបាទក្រហមកម្ពុជា ចំនួន៥០នាក់ ក្នុងនោះ ស្រី ៣៩នាក់ ប្រុស ១១នាក់ ដែលធ្វើឡើងនៅថ្ងៃទី ៩ ខែមិថុនា ឆ្នាំ២០២៣ (១ថ្ងៃពេញ) ស្ថិតនៅសាលាវិទ្យាល័យ ប៊ុន រ៉ានី ហ៊ុន សែនរលាប្អៀរ នៅក្នុងស្រុករលាប្អៀរ ខេត្តកំពង់ឆ្នាំង។

វគ្គបណ្តុះបណ្តាលនេះត្រូវបានបញ្ចប់ដោយទទួលលទ្ធផលតាមការគ្រោងទុក ហើយយុវជនស្ម័គ្រចិត្តដែលមកចូលរួមទទួលបានចំណេះដឹងថ្មីៗ និងមានការប្តេជ្ញាចិត្តខ្ពស់ក្នុងការអនុវត្តសកម្មភាពមនុស្សធម៌ ដើម្បីបម្រើដល់ប្រជាពលរដ្ឋនៅតាមសហគមន៍ ។

ឆ្លៀតក្នុងឱកាសនោះដែរ លោក ប្រាក់ សោភ័ណ្ឌ នាយកប្រតិបត្តិសាខាបានថ្លែងអំណរគុណយ៉ាងជ្រាលជ្រៅចំពោះសិស្សានុសិស្សទាំងអស់ ដែលបានចំណាយពេលវេលា និងទទួលយកវគ្គបណ្ដុះបណ្ដាលមួយនេះ។

គូសបញ្ជាក់ផងដែរថា ការបើកវគ្គបណ្តុះបណ្តាលនាពេលនេះមានគោលបំណងចង់ឲ្យ យុវជនកាកបាទក្រហមកម្ពុជាយល់ច្បាស់ពីគោលការណ៍គ្រឹះកាកបាទក្រហម អឌ្ឍចន្ទក្រហម ច្បាប់មនុស្សធម៌អន្តរជាតិ និងគោលនយោបាយយុវជនកាកបាទក្រហមកម្ពុជា ឲ្យបានកាន់តែល្អប្រសើរបន្ថែមទៀត។ ដើម្បីបន្តនូវទិសដៅការងារប្រកបដោយគុណភាពខ្ពស់ផងដែរ៕