សម្តេច ស ខេង កោតសរសើរសមាជិក CWPUC ដែលបំពេញតួនាទីភារកិច្ចបានល្អ លើកិច្ចការងារជួយដោះស្រាយបញ្ហាកម្មករ
ភ្នំពេញ៖ សម្តេចក្រឡាហោម ស ខេង នាយករដ្ឋមន្ត្រីស្តីទី បានសម្តែងនូវការកោតសរសើរចំពោះសមាជិកសមាជិកាសហជីពរក្សាសិទ្ធិកម្មករកម្ពុជា(CWPUC) ដែលបានបំពេញតួនាទីភារកិច្ចបានយ៉ាងល្អ លើកិច្ចការងារ ជួយដោះស្រាយបញ្ហារបស់កម្មករ ។
សម្ដេចបានមានប្រសាសន៍បែបនេះ ក្នុងពេល អនុញ្ញាតឱ្យថ្នាក់ដឹកនាំនៃសហភាពសហជីពរក្សាសិទ្ធិកម្មករកម្ពុជា (CWPUC) ចូលជួបសម្តែងការគួរសម
នៅទី២៧ ខែកញ្ញា ឆ្នាំ២០២២។
សម្តេចក្រឡាហោម ស ខេង បានសម្តែងនូវការកោតសរសើរចំពោះសមាជិកសមាជិកាសហជីពរក្សាសិទ្ធិកម្មករកម្ពុជា(CWPUC) ដែលបានបំពេញតួនាទីភារកិច្ចបានយ៉ាងល្អ លើកិច្ចការងារ ជួយដោះស្រាយបញ្ហារបស់កម្មករ និយោជិក សហគ្រាស គ្រឹះស្ថាន និងកម្មករសេដ្ឋកិច្ចក្រៅប្រព័ន្ធ ដែលបង្ករបរិយាកាសល្អសម្រាប់អ្នកវិនិយោគបរទេសកាន់តែច្រើនមកវិនិយោគនៅក្នុងប្រទេសផងដែរ។
ជាមួយគ្នានេះ សម្តេចក្រឡាហោម បានធ្វើការណែនាំដល់សមាជិក សមាជិការសហភាពសហជីពរក្សាសិទ្ធិកម្មករកម្ពុជា(CWPUC) ឱ្យបន្តកិច្ចការងារនេះឱ្យកាន់តែល្អ ប្រសើរបន្ថែមទៀត ទន្ទឹមនឹងនេះ បន្តពង្រឹងការសាមគ្គីភាពរវាងគ្នាឱ្យកាន់តែល្អ និងកាន់តែមានវិសាលភាព ជាពិសេសធ្វើការណែនាំដល់កម្មករ និយោជិកឱ្យអនុវត្ត ការងារស្របតាមច្បាប់ការងារដែលជាច្បាប់មូលដ្ឋានសម្រាប់ការពារសិទ្ធិរបស់កម្មករ។
លើសពីនេះទៅទៀត សម្តេចក្រឡាហោម បានលើកទឹកចិត្ត និងណែនាំ ឱ្យសហភាពសហជីពរក្សាសិទ្ធិកម្មករកម្ពុជា(CWPUC)បម្រើកម្មករ និយោជិកឱ្យបានស្មើភាព មិនត្រូវប្រកាន់និន្នាការនយោបាយនោះឡើយ។
បើតាមលោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជា(CWPUC) បានធ្វើសេចក្តីរាយការណ៍សង្ខេបគោរពជូន សម្តេចក្រឡាហោម ដោយលោកបានលើកឡើងថា សហភាពសហជីពរក្សាសិទ្ធិកម្មករកម្ពុជា គឺជាស្ថាប័នអង្គការវិជ្ជាជីវៈ ដែលមានសហព័ន្ធសហជីពចំនួន១៦ និងសមាគម ចំនួន០៨ ចំណុះ និងមានសមាជិកសរុប ចំនួន៣៩,៩៧៨នាក់។
ក្នុងនោះផងដែរ លោក ហង្ស រ៉ាវី លើកឡើងអំពីសកម្មភាពការងារដែលអនុវត្តបានជោគជ័យក្នុងពេលកន្លងមកលើការការពារសិទ្ធិ ការងារមនុស្សធម៌ និងការដោះស្រាយបញ្ហាប្រឈមនានារបស់កម្មករ និយោជិក នៅតាមសហគ្រាស គ្រឹះស្ថាន និងបញ្ហារបស់កម្មករសេដ្ឋកិច្ចក្រៅប្រព័ន្ធ៕
