ឧត្តមសេនីយ៍ទោ សិទ្ធិ ឡោះ ដឹកនាំកិច្ចប្រជុំស្តីពីការងារអនុវត្តនិតិវិធី ដើម្បីពង្រឹងសមត្ថភាពជំនាញ និងវិជ្ជាជីវៈដល់នគរបាលក្រោមឱវាទ
ភ្នំពេញ៖ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ នៅថ្ងៃទី១២ ខែកញ្ញា ឆ្នាំ២០២២ បានអញ្ជើញជាអធីបតី ដឹកនាំកិច្ចប្រជុំវិសាមញ្ញស្តីពីការងារ អនុវត្តនិតិវិធី ដល់លោក លោកស្រី ឧត្តមសេនីយ៍ វរសេនីយ៍ ស្នងការរង នាយ នាយរង ការិយាល័យ នាយ នាយរងផ្នែកជាច្រើនរូប។
កិច្ចប្រជុំនេះធ្វើឡើងក្នុងគោលបំណង ពង្រឹងដល់សមត្ថភាព ចំណេះ ជំនាញ វិជ្ជាជីវះ ដល់ផែននគរបាលទាំង៧ជំនាញ រួមមាន ១-ផែនការងារព្រហ្មទ័ណ្ឌ ២-ផែនការងារប្រឆាំងការជួញដូរមនុស្ស ៣-ផែនការងារប្រឆាំងគ្រឿងញៀន ៤-ផែនការងារប្រឆាំងបទល្មើសសេដ្ឋកិច្ច ៥-ផែនការងារសន្តិសុខ ៦-ផែនការងាគ្រប់គ្រងអន្តោប្រវេសន៍ ៧-ផែនការងារសណ្តាប់ធ្នាប់និងចរាចរណ៍ ៕
លោកឧត្តមសេនីយ៍ទោ សិទ្ធិ ឡោះ បានជម្រុញដល់ជំនាញទាំង៧ ត្រូវយកចិត្តទុកដាក់ ធ្វើការងារឲ្យបានល្អ ពាក់ពន្ធ័ការអនុវត្តន៍និតិវិធី ទាំងការឆែកឆេរ ការចាប់យកវត្ថុតាង ការឃាត់ខ្លួនជនសង្ស័យ ការកសាងសំណុំរឿង ត្រូវតែផ្អែកលើច្បាប់ ព្រោះផែនជំនាញទាំងអស់នេះ មានតួនាទីយ៉ាងសកម្មធ្វើការងារជាមួយស្ថាប័នតុលាការ។ កម្លាំងនគរបាលទាំងអស់ពេលអនុវត្តន៍ តួនាទី ភារកិច្ច ឥរិយាបទត្រូវមានសីលធម៌ គោរពវិន័យ និងគោរពវិជ្ជាជីវ: របស់ខ្លួននិងគោរពច្បាប់ឲ្យបានម៉ឺងម៉ាត់។
លោកឧត្តមសេនីយ៍ទោ ស្នងការ ក៏បានដាក់ ចេញនូវបទបញ្ជា ដល់កម្លាំងទូទាំងខេត្ត និងបណ្តាអធិការក្រុងស្រុក ត្រូវត្រៀមកម្លាំង២៤ ម៉ោងលើ២៤ម៉ោង សម្រាប់ជួយអន្តរាគន៍ គ្រោះថ្នាក់ ឬបទល្មើសកើតឡើងជាយថាហេតុ ក៏ដូចជាការ ការពារសន្តិសុខ សណ្តាប់ធ្នាប់ តាមមូលដ្ឋាន ទីរមនីយដ្ឋាន វត្តអារាមនានា ក្នុងឱកាសពិធីបុណ្យកាន់បិណ្ឌ និងបុណ្យភ្ជុំបិណ្ឌ ៕
