ឯកឧត្តមកិត្តិសេដ្ឋាបណ្ឌិត ជាម យៀប ដឹកនាំកិច្ចប្រជុំជាមួយតំណាងរាស្រ្តមណ្ឌលខេត្តព្រៃវែង ដើម្បីពិនិត្យវឌ្ឍនភាពការងារ និងលើកទិសដៅបន្ត

ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា នាព្រឹកថ្ងៃទី៦ ខែកញ្ញា ឆ្នាំ២០២២ បានអញ្ជើញដឹកនាំកិច្ចប្រជុំជាមួយតំណាងរាស្រ្តមណ្ឌលខេត្តព្រៃវែង ដើម្បីពិនិត្យមើលវឌ្ឍនភាពការងារ និងលើកទិសដៅបន្តដើម្បីធ្វើការអភិវឌ្ឃនៅមូលដ្ឋានអោយមានការីកចម្រើន។

ថ្លែងក្នុងកិច្ចប្រជុំ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា បានមានប្រសាសន៍ថា៖ តាងនាមសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ និងជាប្រធានក្រុមការងារចុះជួយខេត្តបាត់ដំបង និងខេត្តព្រៃវែង បានណែនាំឱ្យតំណាងរាស្រ្តមណ្ឌលខេត្តព្រៃវែងទាំងអស់ ត្រូវបន្តចុះផ្សព្វផ្សាយគោលនយោបាយគណបក្សប្រជាជនកម្ពុជា ជូនដល់ប្រជាពលរដ្ឋនៅមូលដ្ឋាន និងផ្សព្វផ្សាយជូនប្រជាពលរដ្ឋដែលដល់អាយុ១៨ឆ្នាំ និងប្រជាពលរដ្ឋដែលមិនទាន់ចុះឈ្មោះ ឬផ្លាស់ប្តូរទីលំនៅ បាត់ឯកសារ អញ្ជើញទៅចុះឈ្មោះបោះឆ្នោតនៅឃុំ សង្កាត់ដែលពួកគាត់រស់នៅចាប់ពីខែតុលាឆ្នាំ២០២២ នេះតទៅ។

ទន្ទឹមនឹងនោះ ឯកឧត្តមកិត្តិសេដ្ឋាបណ្ឌិត ជាម យៀប បានថ្លែងអំណរគុណជូនដល់តំណាងរាស្រ្តមណ្ឌលខេត្តព្រៃវែងទាំងអស់ ដែលបានយកចិត្តទុកដាក់ក្នុងការចុះទៅមូលដ្ឋានដោះស្រាយបញ្ហាប្រឈមនានា ជូនប្រជាពលរដ្ឋ និងបានចូលរួមអភិវឌ្ឍនៅមូលដ្ឋានទទួលបានការសាទរពីប្រជាពលរដ្ឋក្នុងការបោះឆ្នោតជ្រើសរើស ឃុំ សង្កាត់អណត្តិទី៥ ជូនគណបក្សប្រជាជនកម្ពុជានាពេលកន្លងទៅ ។

ឯកឧត្តមកិត្តិសេដ្ឋាបណ្ឌិត បានបន្តថា ការជួយដោះស្រាយបញ្ហាប្រឈមរបស់ប្រជាពលរដ្ឋ និងជួយអភិវឌ្ឍនៅមូលដ្ឋាននោះនឹងទទួលបានការគាំទ្រពីប្រជាពលរដ្ឋជាតំណាងរបស់គាត់បន្តអភិវឌ្ឍនៅមូលដ្ឋាននាថ្ងៃអនាគត៕