ឯកឧត្ដម ម៉ម សារិន ទទួលជួបពិភាក្សាការងារជាមួយគណៈប្រតិភូគណៈទាក់ទងបរទេស នៃគណៈកម្មាធិការមជ្ឈិមបក្សកុំមុយនីស្ដ វៀតណាម

ភ្នំពេញ៖ ឯកឧត្ដម ម៉ម សារិន ប្រធានខុទ្ទកាល័យគណៈកម្មាធិការកណ្ដាលគណបក្សប្រជាជនកម្ពុជា រួមជាមួយតំណាងមកពីស្ថាប័នជុំវិញគណៈកម្មាធិការកណ្ដាលគណបក្ស នាថ្ងៃទី២៣ ខែមិថុនា ឆ្នាំ ២០២២ បានទទួលជួបពិភាក្សាការងារជាមួយ ឯកឧត្ដម ឡេ ហាយជុង ប្រធានគណៈទាក់ទងបរទេសនៃគណៈកម្មាធិការមជ្ឈិមបក្សកុំមុយនីស្ដវៀតណាម នៅវិមាន ៧មករា ។

ក្នុងជំនួបពិភាក្សា ភាគីទាំងពីរបានឯកភាព និងវាយតម្លៃខ្ពស់ចំពោះទំនាក់ទំនងរវាងបក្ស រដ្ឋ និងប្រជាជននៃប្រទេសទាំងពីរកាន់តែត្រូវបានពង្រឹងពង្រីកកាន់តែរឹងមាំ ស្របតាមយុទ្ធសាស្រ្ត មិត្តភាពជាប្រពៃណី ភាពជាអ្នកជិតខាងល្អ និងកិច្ចសហប្រតិបត្តិការគ្រប់ជ្រុងជ្រោយ ទោះបីស្ថានភាពជំងឺកូវីដ ១៩ មិនអនុញ្ញាតឲ្យមានការជួបផ្ទាល់ក៏ថ្នាក់ដឹកនាំនៃគណបក្សទាំងពីរ និងតាមបណ្ដាផ្នែកដែលមានទំនាក់ទំនងជាមួយគ្នា បានបន្តជួបគ្នាតាមប្រព័ន្ធទូរស័ព្ទ និងប្រព័ន្ធអនឡានជាបន្តបន្ទាប់ ដើម្បីផ្លាស់ប្ដូរបទពិសោធន៍ការងារដឹកនាំ និងពង្រឹងទំទាក់ទំនងសាមគ្គីភាព។

ភាគីទាំងពីរ ក៏បានជំរុញការអនុវត្តតាមស្មារតីនៃកិច្ចព្រមព្រៀងដែលមានស្រាប់រវាងគណបក្សទាំងពីរ និងជំនួបកំពូលនៃគណបក្សទាំងពីរ ឲ្យមានកាន់តែប្រសិទ្ធភាព ក្នុងនោះផ្ដោតសំខាន់លើការងារអប់រំផ្សព្វផ្សាយដល់មន្រ្តីគណបក្ស សមាជិកគណបក្ស និងប្រជាជនអំពីសារសំខាន់នៃទំនាក់ទំនងសាមគ្គីភាពរវាងប្រទេសទាំងពីរ និងការជួយគាំទ្រគ្នាទៅវិញទៅមកតាំងពីការតស៊ូប្រឆាំងពួកអាណានិគមដើម្បីឯករាជ្យរហូតមកដល់បច្ចុប្បន្ន និងផ្លាស់ប្ដូរអំពីតួនាទី ភារកិច្ចរបស់គណៈជំនួយការនៃគណបក្សទាំងពីរ ពិសេសគណបក្សប្រជាជនកម្ពុជា ដែលស្ថិតក្នុងរបបប្រជាធិបតេយ្យ សេរី ពហុបក្ស ដែលត្រូវផ្ដាច់ចេញឲ្យដាច់ស្រឡះពីរដ្ឋ ។