ឯកឧត្ដម នេត្រ ភក្ត្រា៖ សហគមន៍តំបន់ការពារធម្មជាតិប្រឡាយ ដើរតួនាទីសំខាន់ក្នុងការអភិរក្សសត្វ ក្ងោកទេព
ភ្នំពេញ៖ ឯកឧត្ដម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានថ្លែងឲ្យដឹងថា សហគមន៍តំបន់ការពារធម្មជាតិប្រឡាយ ដើរតួនាទីសំខាន់ក្នុងការអភិរក្សសត្វខ្សឹប «ក្ងោកទេព» ដែលជាសត្វស្លាបកម្រ ។
ឯកឧត្ដម នេត្រ ភក្ត្រា បានមានប្រសាសន៍ថា ប្រជាសហគមន៍បានដាំស្រូវនិរន្តរភាព ដោយមិនពង្រីកដីលើតំបន់អភិរក្ស មិនដាក់អន្ទាក់និងបរបាញ់សត្វព្រៃ គម្រោងបង្កើនសេដ្ឋកិច្ចមូលដ្ឋាន តាមរយៈការផ្តល់ពូជគោក្របី ដល់សហគមន៍ចិញ្ចឹម ។ កាលពីឆ្នាំ២០២១ ពួកគាត់បានទទួលក្របីចំនួន ៥០ក្បាលពីក្រសួងបរិស្ថាន ហើយបច្ចុប្បន្នកើនដល់ ៦៥ក្បាលដោយមួយឆ្នាំទទួលបានកូនចំនួន ១៥ ក្បាល។
ឯកឧត្ដមគូសបញ្ជាក់ថា ជាមួយគ្នានេះ ការអភិរក្សសត្វខ្សឹបនេះ បាន វាជាប្រភពចំណូលមិនចេះរីងស្ងួត សម្រាប់ប្រជាសហគមន៍ តាមរយៈទេសចរណ៍ធម្មជាតិ លើតំបន់ការពារទេសភាព។
សត្វខ្សឹបជា ប្រភេទសត្វតំបន់វាលស្មៅ មានដើមកំណើត នៅឧបទ្វីបឥណ្ឌា ប្រទេសកម្ពុជា និងក៏ធ្លាប់មាននៅវៀតណាមផងដែរ ។ វា ត្រូវ បាន ចុះបញ្ជី ជា ប្រភេទ បក្សី ជិត ផុត ពូជ បំផុត នៅលើ ពិភពលោក នៅក្នុង បញ្ជី ក្រហម របស់ អង្គការ IUCN ហើយ វា ត្រូវបាន ប៉ាន់ប្រមាណ ថា មាន ចំនួន ប្រមាណ ៨០០ ក្បាល នៅលើ ពិភពលោក ក្នុងនោះ កម្ពុជាមានប្រមាណ ៥៥០ ក្បាល (២៣០ ក្បាលជាសត្វខ្សឹបឈ្មោល) ដែលតំណាងឱ្យ ៧០% នៃវត្តមានសត្វខ្សឹប នៅលើពិភពលោក។
សត្វ ខ្សឹប រស់នៅ តាម តំបន់ វាលស្មៅ ធម្មជាតិ ដែលមាន លាយឡំ ជាមួយ នឹង គុម្ពោត ព្រៃ ដុះ រាយប៉ាយ ។ កត្តា គំរាមកំហែង ធំៗ ដល់ ការរស់នៅ របស់ សត្វខ្សឹប រួមមាន ការបាត់បង់ ទីជម្រក ពាក់ព័ន្ធ ទៅនឹង ការបំប្លែង តំបន់ វាលស្មៅ និង តំបន់ ដាំដុះ ស្រូវ បែប យថាផល ទៅជា តំបន់ ដាំដុះ ស្រូវ បែប ប្រពលវប្បកម្ម ( ពីរ ទៅ បី ដង ក្នុង មួយឆ្នាំ ) ការ ប្រមាញ់ ខុសច្បាប់។
រហូតមកដល់ពេលនេះ មិនទាន់អាចសន្និដ្ឋានថា សត្វខ្សឹបមានការថយចុះឬកើនឡើងនោះទេ។ យោងតាមប្រជាសហគមន៍ សំបុកសត្វខ្សឹបចំនួន ២២ (មានស៊ុតទាំងអស់ ២៤) ត្រូវបានរកឃើញ និងស៊ុត សត្វខ្សឹបចំនួន ២២ ត្រូវបានញាស់ និងកូនខ្សឹបរីកធំធាត់ បានរស់នៅក្នុងមជ្ឈដ្ឋានធម្មជាតិ ៕
